Read tsonga Yeremiya 7 Bible Online

Yeremiya 7 - tsonga bible

Yeremiya 7

¹Rito leri humaka eka Yehovha ri tile eka Yeremiya, ri ku:

²“Yana, u ya yima enyangweni ya yindlu ya Yehovha, kutani u huwelela kona rito lero, u ku: ‘Yingisani rito ra Yehovha, n'wina hinkwenu va Yuda lava nghenaka hi tinyangwa leti ku ta khinsamela Yehovha.

³Yehovha wa tinyimpi, Xikwembu xa Israele u vula a ku: Hundzukani emitileni ya n'wina ni le emikhuveni ya n'wina kutani ndzi ta mi akisa exivandleni lexi.

⁴Mi nga titshembisi hi ku vula swahava, loko mi ku: “Tempele ya Yehovha, tempele ya Yehovha, tempele ya Yehovha hi yoleyo.”

⁵Ku nga ku loko mi hundzuka hakunene emikhuveni ya n'wina, ni le tindleleni ta n'wina, loko mi avanyisa hi ku lulama exikarhi ka munhu un'wana ni warikwavo.

⁶Loko mi nga xanisi wamatiko, ni xisiwana, ni noni; kambe mi nga halati ngati leyi nga riki na nandzu endhawini leyi; loko mi nga fambi eka swikwembu swin'wana ku tilavela khombo:

⁷Ndzi ta mi akisa endhawini leyi, etikweni leri ndzi ri nyikeke vatata wa n'wina hilaha ku nga heriki.

⁸“ ‘Kambe maswivo, mi titshembisa hi ku vulavula ka swahava loku nga pfuniki nchumu.

⁹I ku yini xana? Ku yiva! Ni ku dlaya! Ni ku oswa, ni ku hlambanya hi mavunwa, ni ku hisela Baali mirhi ya risuna, ni ku famba eka swikwembu swin'wana leswi mi nga swi tiviki!

¹⁰Kutani mi ta, mi ta yima emahlweni ka mina endlwini leyi vito ra mina ri vitiwaka eka yona, kutani mi ri: “Hi ta pona!” Kasi hileswaku mi endle manyala walawo hinkwawo.

¹¹Yindlu yoleyi, vito ra mina ri vuriwaka eka yona, xana i bako ra makhamba emahlweni ka n'wina xana? Kunene, na mina ndzi swi vonile sweswi, ku vula Yehovha.

¹²“ ‘Kambe yanani endhawini ya mina leyi nga eXilo, laha ngi ndzi akisile kona vito ra mina khale, kutani mi vona lexi ndzi xi endleke ha yona yindlu leyi hikwalaho ka vumbabva bya tiko ra mina ra Israele!

¹³Kambe sweswi, leswi mi endleke sweswo hinkwaswo, ku vula Yehovha, kambe ndzi tshama ndzi vulavula na n'wina, ndzi ri karhi ndzi pfuka ka ha ri mixo ndzi va ndzi vulavula, kambe a mi yingisanga; kutani ndzi tshama ndzi mi vita, kambe a mi pfumelanga.

¹⁴Hikwalaho ndzi ta endla hi yindlu yoleyo vito ra mina ri vuriwaka eka yona, yoleyo mi yi tshembaka, ni maakela walawo ndzi mi nyikeke wona ni vatata wa n'wina, kukotisa leswi ndzi swi endleke eXilo.

¹⁵Ndzi ta mi tshika leswaku mi susiwa emahlweni ka mina, kukotisa leswi ndzi tshamaka ndzi swi endla eka vamakwenu hinkwavo, ri nga rixaka ra Efrayimi hinkwaro.’

¹⁶“Loko u ri wena, u nga tshuki u khongelela tiko leri, kambe u nga tshuki u tlakusa rito, ni loko yi ri mikhongelo hikwalaho ka vona, kambe u nga tshuki u ndzi sindzisa hikuva ndzi nga ka ndzi nga ku yingisi.

¹⁷Xana a ku voni leswi va swi endlaka emitini ya Yuda, ni le mitsendzeleni ya Yerusalema?

¹⁸Vana va rhotela tihunyi, vatata wa vona va tshivela ndzilo, kutani vavasati va pfuva mbila, va endlela nkosikazi ya matilo swinkwa, kutani va chelela swikwembu swin'wana tinyiko ta swakunwa leswaku va ndzi karihisa.

¹⁹Xana hakunene va ndzi karihisa xana, ku vula Yehovha? A ndzi ri va tikarihisa va ri vona; va ta khomiwa hi tingana emimombyeni ya vona.

²⁰Hikwalaho, ku vula Hosi Yehovha: Langutani, vukari bya mina ni ku holova ka mina ku ta halatiwa endhawini leyi ehenhla ka vanhu, ni tihomu, ni mirhi ya tiko, ni mihandzu ya misava; kambe ka ha ta hisa, ku nga ka ku nga timiwi.”

²¹Yehovha wa tinyimpi, Xikwembu xa Israele u vula, a ku: “Engetelani magandzelo ya n'wina hi tiholokosta ta n'wina, kutani mi dya tinyama ta tona;

²²hikuva a ndzi byelanga vatata wa n'wina, kambe a ndzi va nyikangi ku lerisa hikwalaho ka tiholokosta ni hikwalaho ka magandzelo, siku ndzi va humeseke etikweni ra Egipta,

²³kambe hi yona mhaka leyi ndzi va byeleke yona, ndzi ku: ‘Yingisani rito ra mina, kutani ndzi ta va Xikwembu xa n'wina, kambe n'wina mi va tiko ra mina, mi famba endleleni hinkwayo leyi ndzi nga ta mi lerisa yona, hilaha mi nga ta kateka.’

²⁴Kambe a va yingisanga, ni loko ku ri ku rhiya tindleve; kambe va tifambela hi makungu ya vona ni le ku tinonon'hwiseni ka timbilu ta vona leto biha, kutani va tlhelele endzhaku, a va yanga emahlweni.

²⁵Ka ha ri mpfhuka ndzi humesa vatata wa n'wina va khale etikweni ra Egipta ku fika ni namuntlha, ndzi mi rhumela malandza ya mina hinkwawo va nga vaprofeta, ndzi ri karhi ndzi pfuka ka ha ri mixo hi siku rin'wana ni rin'wana ku va rhuma.

²⁶Kambe a va yingisanga, ni loko ku ri ku rhiya tindleve, kambe va tinonon'hwisile tinhamu, va dyohile ku tlurisa vatata wa vona.

²⁷U va byela timhaka teto hinkwato, kambe va nga ka va nga yingisi; u va vitana, kambe va nga ka va nga pfumeri.

²⁸U va byela, u ku: ‘Leri i tiko leri nga yingisiki rito ra Yehovha, Xikwembu xa rona leri nga amukeriki ku layiwa, ku lulama ku onhakile, ku susiwile emilon'wini ya vona.

²⁹“ ‘Byewula misisi, u yi cukumeta, kutani u endla nkosi eswitsungeni leswi tlakukeke, hikuva Yehovha u cukumetile rixaka rero a ri kariheleke, u ri sandzile.’

³⁰Hikuva vana va Yuda va endlile manyala emahlweni ka mina, ku vula Yehovha; va vekile manyala ya vona endlwini yoleyo vito ra mina ri vuriwaka eka yona, hileswaku va ndzi nyamisa.

³¹Kambe va akile exivandleni lexi tlakukeke xa Tofete, enkoveni wa n'wana Hinomu, va hisa hi ndzilo vana va vona va xinuna ni vi xisati, swi nga leswi ndzi nga ka ndzi nga va lerisanga swona, kambe a swi humanga embilwini ya mina.

³²Hikwalaho, vonani, ku ta ta masiku walawo, ku vula Yehovha, ku nga ha tiki vitaniwaka Tofete ha wona, ni loko wu ri nkova wa n'wana Hinomu, kambe wu ta vuriwa nkova wa rifu, kutani ku ta yimberiwa eTofete, hi ku pfumaleka ka ndhawu.

³³Mitsumbu ya tiko leri, yi ta va swakudya swa makoti ya tilo ni ya swiharhi swa misava, kambe ku nga ka ku nga vi na munhu la swi chavisaka.

³⁴Emitini ya Yuda ni le mitsendzeleni ya Yerusalema, ndzi ta miyeta rito ra ku tsaka ni rito ra ku tlanga, ni rito ra muteki ni ra mutekiwa; hikuva tiko ri ta va ri hundzukile mananga.