Read tsonga Yeremiya 8 Bible Online

Yeremiya 8 - tsonga bible

Yeremiya 8

¹“Enkarhini wolowo, ku vula Yehovha, marhambu ya tihosi ta Yuda, ni marhambu ya tindhuna ta vona, ni marhambu ya vaprista, ni marhambu ya vaprofeta, ni marhambu ya vaaki va Yerusalema, ma ta humesiwa emasirheni ya wona,

²ma ta hangalasiwa eku vonakaleni ka dyambu, ni ka n'weti, ni ka mavandla hinkwawo ya tilo, swi nga hinkwaswo leswi va nga swi rhandza, ni hinkwaswo leswi va nga swi tirhela, ni leswi va nga famba eka swona, ni leswi va tshamaka va ya vutisa eka swona, leswi va tshamaka va swi khinsamela; kambe ma nga ka ma nga hlengeletiwi ni loko ku ri ku yimberiwa; byi ta va vulongo etikweni leri.

³Kutani ku ta rhandziwa rifu ngopfu ku ri ni vutomi hi masalela hinkwawo lama saleke ya rixaka leri ro biha, ematikweni hinkwawo lawa ndzi nga ta ma hangalasa eka wona, ku vula Yehovha wa tinyimpi.

⁴“Kambe u va byela, u ku: Ku vula Yehovha: xana munhu a nga wa, a nga tlheri a pfuka xana? Xana munhu a nga hambuka, a nga tlheri xana?

⁵Tiko leri ra Yerusalema, ri hambuka hikwalaho ka yini hi ku hambuka loku nga heriki xana? Va titiyisa hi mano ya vona ha yini, kutani va alela yini ku hundzuka xana?

⁶Ndzi tshama ndzi yingisela kutani ndzi twa loko va vulavula, kambe a va vuli leswi lulameke; a ku na un'we la khomiwaka hi tingana hikwalaho ka ku biha ka yena, a tshamaka a ku: ‘Ndzi endle yini?’ Hinkwavo va tsutsuma kukotisa hanci leyi tsutsumelaka enyimpini.

⁷Hambi ri ri gumba, ri tiva mikarhi ya rona empfhukeni, ni tuva, ni mbewulana, ni ntsavila, swi tiva nkarhi wa ku tlhela ka swona; kambe tiko ra mina, a ri tivi ku lulama ka Yehovha.

⁸Mi nga vurisa ku yini leswaku: ‘Hi tlharihile hi ni nawu wa Yehovha?’ Hakunene peni ya vuhunguki bya vatsari yi hembile vunwa.

⁹Lavo tlhariha va ta khomiwa hi tingana, va ta rhurhumela, kutani va ta khomiwa va sandzile rito ra Yehovha, va ni vutlhari byihi-ke?

¹⁰“Hikwalaho ndzi ta nyika van'wana vasati va vona, ni vaphangi masimu ya vona; hikuva hinkwavo va tinyiketile ku navela ka rifuwo, ku sungula eka lontsongo ku yisa eka lonkulu, muprofeta ni muprista, va endla hi vunwa.

¹¹Kutani va ongola hi ku olova mbanga ya n'wana wa tiko ra mina, loko va ku: ‘Ku rhurile, ku rhurile!’ Kasi a ku na ku rhula.

¹²Va ta avanyiseriwa makumu, hikuva va endlile manyala; a va ha tshukisiwi, a va ha khomisiwi hi tingana, hikwalaho va ta khunguvanyeka lava khunguvanyekaka; siku ndzi va tshinyaka va ta wisiwa, ku vula Yehovha.

¹³“Ndzi ta va heta,” ku vula Yehovha, “leswaku ku ta pfumariwa mihandzu evhinyeni, ni loko ma ri makuwa enkuweni, ni matluka ma ta oma, kambe lexi ndzi va nyikeke xona xi ta va phonyomukela.”

¹⁴Hi tshamisela yini kwala? Hlengeletanani, hi ta nghena emitini ya makhokholo, hi fa kona, hikuva Yehovha, Xikwembu xa hina, u ta hi lovisa, u hi nwisile mati lama bavaka, hikuva hi dyohele Yehovha.

¹⁵A hi ri karhi hi langutele ku rhula, kambe a hi voni ku rhula; ni siku ra ku ongoriwa, kutani langutani, ka chavisa!

¹⁶Mpfumawulo wa tihanci ta yena wu twakala eDani, misava hinkwayo yi tsekatseka hi swirilo leswi chavisaka swa wona; va ta ku ta herisa tiko ni hinkwaswo leswi nga eka rona, ni miti, ni vaaki va yona;

¹⁷hikuva ndzi rhumela exikarhi ka n'wina tinyoka ni timhiri leti nga riki na ku yimbeleriwa, kutani ti ta mi luma, ku vula Yehovha.

¹⁸Ku chaveleriwa ka mina eku vavisekeni ka mina ku kwihi?

¹⁹Mbilu ya mina yi hela exifuveni xa mina. Yingisani rito ra swirilo ra n'wana wa tiko ra mina leri humaka etilweni leri nga ekule; ri ku: “Xana Yehovha a nga ha ri kona eSiyoni xana? Xana hosi ya yena a ya ha ri kona-ke?” “Va ndzi karihisela yini hi swifaniso swa vona leswi vatliweke, byi nga vuhava bya matiko?”

²⁰“Ku tshovela ku hundzile, ku hundzile ni hlovo kutani hina a hi ponisiwanga.”

²¹Ndzi vaviseka hikwalaho ka mbanga ya n'wana wa tiko ra mina, ndzi ni khombo, ndza rila, ndzi khomiwe hi ku chava.

²²Xana ku na murhi eGiliyadi, a ku na n'anga kona xana? Xana mbanga ya n'wana wa tiko ra mina a yi boheleriwanga ha yini?