Read tsonga Yeremiya 9 Bible Online

Yeremiya 9 - tsonga bible

Yeremiya 9

¹Loko ngi nhloko ya mina yi ri mati, ni mahlo ya mina ya ri miseledyana ya mihloti, vusiku ni nhlekanhi, a ndzi ta rilela vanhwanyana va tiko ra mina lava dlayiweke!

²Loko ngi ndzi ri ni xitsongana xa ku hambukela emananga, ingi ndzi tshika tiko ra mina, ndzi ya ekule na rona, hikuva i vaoswi hinkwavo, i huvo ya timbabva.

³“Va kongile tindzimi ta vona kukotisa vurha ku copa vunwa; kambe a hi hikwalaho ka ku lulama loko va ri ni matimba laha emisaveni, hikuva loko va huma eku dyoheni kun'wana, va hundzela eku dyoheni kun'wanyana, kutani a va ndzi tivi,” ku vula Yehovha.

⁴“Un'wana ni un'wana a a tilangute hikwalaho ka nakulobye, kutani mi nga tshuki mi tshemba warikwenu, hikuva munhu un'wana ni un'wana u tele ku kanganyisa, kutani munhu un'wana ni un'wana u lumbeta warikwavo.

⁵Un'wana ni un'wana u kanganyisa xaka ra yena, kutani a va vulavuri leswi tiyeke, va dyondzisile tindzimi ta vona ku hemba, va tikarhata eku hombolokeni.

⁶U akile exikarhi ka lavo homboloka; hi mano ya vona va ala ku ndzi tiva,” ku vula Yehovha.

⁷Hikwalaho, Yehovha wa tinyimpi u vula, a ku: “Ndzi ta va n'okisa, ndzi va ringa, hikuva ndzi nga endlisa ku yini eka n'wana wa tiko ranga xana?

⁸Tindzimi ta vona i miseve leyi dlayaka, va vulavula vunwa; hi milomu ya yena un'wana u byela warikwavo ku rhula, kambe exifuveni xa yena a n'wi rhiya hi xirimbana.

⁹Xana ndzi nga tshikisa ku yini ku tshinya swilo leswo tano xana,” ku vula Yehovha? “Kumbe moya wa mina wu nga tshikisa ku yini ku tirihisela eka tiko lero tano xana?”

¹⁰Ndzi ta tlakusa swirilo, ndzi vovola etintshaveni, ni le madyelweni ya mananga, hikuva ma hisiwile; a ka ha ri na munhu la hundzaka kona, kutani a ka ha twakari ku rila ka tihomu; tinyanyana ta matilo ni swiharhi swi balekile, swi fambile.

¹¹“Ndzi ta endla hi Yerusalema, tinhulu ta maribye ni ndhawu ya timhungubye; ni miti ya Yuda, ndzi ta yi endla rhumbi leri pfumalaka muaki.”

¹²Munhu la tlhariheke i mani la nga twisisaka timhaka leti? Ni loyi nomu wa Yehovha wu vulavuleke na yena, a nga hi tivisa leswaku tiko ri onhiwile, ha yini, ni loko ri hisiwile kukotisa loko ma ri mananga, ku nga ri na loyi a hundzaka kona xana?

¹³Yehovha a ku: “Leswi va lahleke nawu wa mina, lowu ngi ndzi wu vekile emahlweni ka vona, kutani a va yingisanga rito ra mina, a va fambanga ha rona;

¹⁴kambe va tifambele hi ku nonon'hwa ka timbilu ta vona, ni ku landzela va Baali, hilaha va dyondzisiweke hakona hi vatata wa vona.”

¹⁵Hikwalaho, ku vula Yehovha wa mavandla, Xikwembu xa Israele, a ku: “Vonani, ndzi ta dyisa tiko leri murhi wa absinta, kambe ndzi ta va nwisa mati lama bavaka.

¹⁶Kutani ndzi ta va hangalasa ematikweni lama nga tiviwiki hi vona, ni loko va ri vatata wa vona; kutani ndzi ta rhuma fumu endzhaku ka vona, ndzi ko ndzi va heta.”

¹⁷Ku vula Yehovha wa tinyimpi, a ku: “Lavani ni ku vitana vavasati lava tivaka ku rila; rhumelani ni lavo tlhariha leswaku va ta;

¹⁸a va hatlise va ta hi rilela leswaku mahlo ya hina ma humesa mihloti ni tinkohe ta hina ti tala hi mati!

¹⁹Hikuva rito ra ku rila ri twakala eSiyoni, ri ku: ‘Yowee! Hakunene hi onhiwile, hi ku khomiwa hi tingana, hikuva hi sukela tiko, hikuva va mbundzumuxile tindlu ta hina.’ ”

²⁰Hikwalaho, vavasati, yingisani rito ra Yehovha, kutani tindleve ta n'wina ti amukela rito ra nomu wa yena: Mi dyondzisa vana va n'wina ku yimbelela xirilo kutani mi dyondzisana risimu ra ku rila.

²¹Hikuva rifu ri tlulela hi mafasitere ya hina, ri nghena etindlwini ta hina leti sasekisiweke ku ta dlaya vana emitsendzeleni, ni majaha etihubyeni.

²²Vulavula, u ku: “Yehovha u vurisile, a ku: ‘Mitsumbu ya vanhu yi ta wa yi kotisa vulongo emasin'wini, ni kukotisa tinyandza endzhaku ka mutshoveri, ku nga ri na loyi a ti rholelaka.’ ”

²³Yehovha u vurisile, a ku: “La nga ni vutlhari a nga tshuki a tidzunisa hi vutlhari bya yena, la nga ni matimba a nga tidzunisi hi matimba ya yena; na yena mufuwi a nga tidzunisi hi rifuwo ra yena;

²⁴kambe la tidzunisaka a a tidzunisele emhakeni leyi: hileswaku u ni ku twisisa ni vutlhari bya ku ndzi tiva, hikuva hi mina Yehovha ndzi endlaka hi musa, ni mfanelo, ni lexi lulameke emisaveni; hikuva ndzi tsakisiwa hi swona,” ku vula Yehovha.

²⁵“Vonani, ma ta masiku walawo,” ku vula Yehovha, “ndzi nga ta tshinya ha wona lava yimbeke hinkwavo ni lava nga yimbangiki.

²⁶Egipta, na Yuda, na Edomu, ni vana va Amoni, na Mowabu, hinkwavo lava byewulaka malebvu, lava akeke emananga: hikuva i matiko hinkwawo lama nga yimbangiki; kambe ni yindlu hinkwayo ya Israele a yi yimbisangi mbilu.”