Read tsonga Swirilo 1 Bible Online

Swirilo 1 - tsonga bible

Swirilo 1

¹Wu tshamile wu ri woxe ha yini, muti lowu ingi wu ri ni vanhu vo tala xana? Muti lowu ngi wu ri nkulukumba exikarhi ka matiko, Wu hundzukile ha yini wu fana ni noni? Lowu ngi wu ri ntsindza exikarhi ka matiko, Wu hundzukile lowu fuyiweke ha yini-ke?

²U rila ni ku rila nivusiku, kutani mihloti ya xiririka emarhameni ya yena; Exikarhi ka varhandziwa va yena hinkwavo, a ku na la n'wi chavelelaka, Vanakulobye va yena hinkwavo va n'wi xisile. Va hundzukile valala va yena.

³Yuda u yile evukhumbini hi maxangu ni ku xaniseka lokukulu; U tshamile exikarhi ka matiko, Kambe a nga vonanga laha a wisaka kona, Vaxanisi va yena hinkwavo va n'wi kumile a ri laha ku manyaneke.

⁴Magondzo ya Siyoni ma rila, hikuva a ka ha ri na lava yaka emikhubyeni; Tinyangwa hinkwato ta yena ti onhakile, Vaprista hinkwavo va yena va hefemuteka, Vanhwanyana va yena va ni tingana, na yena u le nhlomulweni lowukulu.

⁵Lava nga valala va yena va n'wi hlula, lava n'wi vengaka va titsakela. Hikuva Yehovha u n'wi rhumerile maxangu Hikwalaho ka ku tala ka swidyoho swa yena; Vana va yena lavatsongo va yile evukhumbini, va byisiwa hi valala.

⁶Vubombi hinkwabyo bya nhwanyana wa Siyoni byi herile, Vakulu va yena va fana ni tinhongo Leti nga voniki madyelo, Leti balekaka emahlweni ka lava ti hlongorisaka, ti heleriwe hi matimba.

⁷Emasikwini ya mahlomulo ni ya ku onhaka ka yena, Yerusalema, u tsundzuka swilo swa yena hinkwaswo leswi rhandzekaka, leswi ngi a ri na swona emikarhini yo rhanga. U swi tsundzuka sweswi loko tiko ra yena ri wele emavokweni ya valala, Ku nga ri na loyi a n'wi pfunaka; Valala va n'wi vona, kutani va hlekela ku onhaka ka yena.

⁸Yerusalema, u dyohile, u dyohile; Hikwalaho-ke, u hundzukile manyala, Hinkwavo lava nga n'wi fundzha, sweswi va n'wi tsan'wa, hikuva va vona vusweti bya yena, Na yena, wa hefemuteka, kutani u tshinela endzhaku.

⁹Thyaka ra yena ri kona emadziveni ya nguvu ya yena, A nga anakanyangi ku hela ka yena, U wile hi mukhuva lowu hlamarisaka, a ku na loyi a n'wi chavelelaka. Yehovha, languta ku onhaka ka mina, hikuva nala wa tidzunisa.

¹⁰Nala u tshambulutile voko ra yena Eswilweni hinkwaswo swa yena leswi pfumalekaka, Hikuva u vone matiko ma nghena exikwetsimisweni xa yena, Lawa ingi u lerisile leswaku ma nga tshuki ma nghena enhlengeletanweni ya wena.

¹¹Vanhu va yena hinkwavo va hefumuteka, va lava vuswa; Va nyikile swilo swa vona leswi pfumariwaka ku lava swakudya Leswi nga pfuxaka vutomi bya vona. “Languta, Yehovha, u vona ku sandziwa ka mina.

¹²“Xana a hi nchumu eka n'wina hinkwenu lava mi fambaka endleleni! Tsundzukani, mi vona loko ku vaviseka ku ri kona loku fanaka ni loku ndzi humeleleke, Loku Yehovha a nga ndzi vavisa hakona Esikwini ra vukari lebyi pfurhaka bya yena.

¹³“U rhumerile ndzilo a ri ehenhla emarhambyini ya mina, kutani u ma hetile; U rhiyile vurimba emilengeni ya mina, U ndzi tlherisele endzhaku, A ndzi nyiketa eku onhakeni leswaku ndzi fa hi masiku.

¹⁴“Joko ra swidyoho swa mina ri bohiwile hi mavoko ya yena; Swi tsondzeriwile, swa tika enhan'wini ya mina; U herisile matimba ya mina; Hosi yi ndzi nyiketile emavokweni ya loyi ndzi tsandzekaka ku n'wi alela.

¹⁵“Hosi yi herisile exikarhi ka mina, tinhenha ta mina hinkwato, Kutani u rhambile nyimpi Ku ta dlayetela malandza ya mina lamantshwa; Hosi yi kandziyile exikandziyelweni xa nhwanyana, n'wana Yuda.

¹⁶“Hi swona leswi ndzi ririsaka, tihlo ra mina ri halaka mihloti; Hikuva muchaveleri la pfuxaka moya wa mina u le kule na mina. Ndzi ta hanyisiwa hi mani? Vana va xinuna va mina va khunarhile, hikuva nala u hlurile.

¹⁷“Siyoni u tshambulutile mavoko, Ku hava la n'wi chavelelaka. Yehovha u lerisile valala va Yakobo leswaku va n'wi rhendzela: Yerusalema, u hundzukile xisandzu exikarhi ka vona.

¹⁸“Yehovha u lulamile, kasi ndzi arile ku lerisa ka yena: Oho! Yingisani n'wina matiko hinkwawo, Kutani mi vona ku vaviseka ka mina; Vanhwanyana ni majaha ya mina va yile evukhumbini.

¹⁹“Ndzi vitanile varhandziwa va mina, hi vona lava nga ndzi yenga; Vaprista va mina ni vakulu va mina va lovile emutini, Loko va lava swakudya leswi nga pfuxaka mimoya ya vona.

²⁰“Yehovha, languta mahlomulo ya mina! Marhumbu ya mina ma pfuma, Mbilu ya mina yi hundzukile endzeni ka mina, Hikuva ndzi tiarisile ngopfu. Ehandle tlhari ri dlayile vana va mina; endzeni, i rifu ntsena.

²¹“Va ndzi twile loko ndzi ri karhi ndzi hefemuteka, ku hava loyi a nga ndzi chavelelaka! Valala va mina hinkwavo va twile khombo ra mina, Kutani va tsakela leswi u swi endleke; Va ta fana na mina siku leri u nga ta humelerisa mhaka leyi u yi vekeke.

²²“Ku biha hinkwako ka vona a ku humelele emahlweni ka wena, Kutani u va endla hilaha u nga ndzi endla hakona Hikwalaho ka ku homboloka ka mina! Hikuva ku hefemuteka ka mina kukulu, kutani mbilu ya mina ya vava.”