Read tsonga Swirilo 3 Bible Online

Swirilo 3 - tsonga bible

Swirilo 3

¹Hi mina munhu la voneke mahlomulo Hi nkhavi wa vukari bya wena.

²U ndzi fambisile, a ndzi yisa emunyameni, Ku nga ri eku vonakaleni.

³Kunene u yimile emahlweni ka mina, A ndzi hundzuluxela voko ra yena siku hinkwaro.

⁴U herisile nyama ya mina ni nhlonge ya mina, U tshovile marhambu ya mina.

⁵U ndzi manyile hi rirhangu, U ndzi rhendzele hi ku vaviseka ni makhombo.

⁶U ndzi tshamisisile etindhawini ta munyama Hi mukhuva wa lava feke khale.

⁷U ndzi rhendzele hi khumbi leswaku ndzi nga tshuki ndzi huma; U ndzi bohile hi tiketana leto tika.

⁸Na swona loko ndzi huwelela, ndzi kombela ku pfuniwa, U sivile xikhongelo xa mina,

⁹U ndzi sivele tindlela ta mina hi maribye lama vatliweke, U gombonyokisile tindlela ta mina.

¹⁰Eka mina, u kotise bere leyi ndzi bvutameleke, Ni nghala leyi tumbeleleke.

¹¹U hambukisile tindlela ta mina; a ndzi handzula; A ndzi endla la kotisaka mananga.

¹²A konga vurha bya yena, A ndzi veka tanihi pakana ya nseve.

¹³U nghenisile miseve ya gadzi ra yena Exisutini xa mina.

¹⁴Ndzi hundzukile xisandzu xa tiko ra mina hinkwaro, Ni risimu ra vona siku hinkwaro.

¹⁵U ndzi xurhisile leswo bava, U ndzi pyopyisile hi nkaka.

¹⁶Kambe u fayile meno ya mina hi maribye, U ndzi funengetile hi nkuma.

¹⁷U tsonile moya wa mina ku rhula, Kutani a ndza ha tivi leswaku ku kateka i yini;

¹⁸Kutani ndzi ri: “Ndzi helelwe hi matimba ya mina. Ni ku langutela ka mina eka Yehovha.”

¹⁹Ehleketa ku onhaka ka mina ni ku xaniseka ka mina; nkaka ntsena ni nyongwa.

²⁰Ndzi karhi ndzi titsundzuxa, Kutani moya wa mina wu hela matimba endzeni ka mina.

²¹Hi tona leti ndzi nga karhi ndzi lwaka na tona embilwini ya mina, Hikwalaho ndzi ta tshama ndzi ri karhi ndzi tshemba.

²²I tintswalo ta Yehovha leti ti endleke leswaku hi nga tshuki hi lova, Hikuva tintswalo ta yena a ti si hela;

²³Ti tshama ti ri kona hi mixo wun'wana ni wun'wana; Vunene bya wena byi kulukumba!

²⁴Ku averiwa ka mina i Yehovha, ku vula sweswo moya wa mina; Hikwalaho ndzi ta n'wi tshemba.

²⁵Yehovha u ni tintswalo eka lava n'wi tshembaka, Ni ka moya lowu n'wi lavaka.

²⁶Swi lulamile eka munhu ku langutela hi ku rhula Ku ponisiwa hi Yehovha.

²⁷Swi lulamile eka munhu Loko a rhwala joko ra yena evuntshweni bya yena.

²⁸Swi lulamile, ni loko a titshamela a ri swakwe, a timiyelela Nkarhi lowu Xikwembu xi n'wi leriseke wona.

²⁹Ni loko ku ri ku veka nomu wa yena entshurini, Swi ri leswaku kumbe ku tshemba ku kona.

³⁰Ni loko ku ri ku nyika rhama ra yena eka loyi a n'wi phakataka, Ni ku xurha xisandzu.

³¹Hikuva Hosi a nga ka a nga lahli munhu Hilaha ku nga heriki.

³²Kambe loko a n'wi ba hi nhlomulo, U n'wi twela vusiwana hikwalaho ka vunyingi bya tintswalo ta yena.

³³Hikuva mbilu ya yena a yi rhandzi ku twisa ku vaviseka Ni ku xanisa vana va vanhu.

³⁴Loko va kandziya hi milenge Vabohiwa hinkwavo va tiko,

³⁵Loko va hombolokisa ku lulama ka munhu Emahlweni ka mombo wa La tlakukeke.

³⁶Loko va tlherisa munhu enandzwini wa yena, Xana Hosi a nga swi voni xana?

³⁷I mani la nga ta vula mhaka, kutani yi humelela, Loko yi nga lerisiwanga hi Hosi xana?

³⁸Swilo leswo saseka ni leswo biha Xana a swi humi enon'wini wa La nge henhla?

³⁹Xana munhu la hanyaka a nga tivilerisa hi yini-ke? Munhu un'wana ni un'wana a a tivilerise hi swidyoho swa yena.

⁴⁰A hi lavisiseni tindlela ta hina, hi va hi tianakanya, Kutani hi tlhelela eka Yehovha.

⁴¹A hi yimiseni timbilu ta hina ni mavoko ya hina, Eka Xikwembu lexi nga ehenhla.

⁴²“Hi dyohile hi va hi tiarisa; Kutani wena a ku vanga u tsetselela.

⁴³“U funengele vukari bya wena, kutani u hi hlongorisa; U dlele, kutani a ku vanga u tsetselela.

⁴⁴U tifunengetile hi papa, Leswaku xikhongelo xa hina xi nga tshuki xi fika eka wena.

⁴⁵U hi endlile ntshuri ni xisandzu, Exikarhi ka matiko.

⁴⁶“Hinkwavo lava nga valala eka hina Va hi ahlamisele milomu ya vona.

⁴⁷Hi humeleriwile hi ku rhurhumela ni ku phasiwa Swin'we ni ku onhaka ni ku lova.

⁴⁸Tihlo ra mina ri halata milambu ya mati Hikwalaho ka ku onhaka ka nhwanyana wa tiko ra mina.

⁴⁹“Tihlo ra mina ri karhi ri halaka mihloti, a ri miyeri, A ku na laha ri nga tikhomaka,

⁵⁰Yehovha a kondza a hlometela Kutani a swi vona a ri ematilweni.

⁵¹Tihlo ra mina ri xanisa moya wa mina Hikwalaho ka vanhwana hinkwavo va muti wa mina.

⁵²“Lava ndzi vengeke ntsena Va ndzi rhiyile hi xirimbana tanihi loko ndzi ri xinyanyana.

⁵³Va tsemile vutomi bya mina ekheleni; Va hoxile ribye ehenhla ka mina.

⁵⁴Mati ma khapela enhlokweni ya mina, Kutani a ndzi ku: ‘Ndzi tsemiwile.’

⁵⁵Ndzi vitanile vito ra wena, oho Yehovha! Ndzi ri ehansi enceleni wa vafi.

⁵⁶“U yingisile rito ra mina, u nga tshuki u siva tindleve ta wena Loko ndzi hefemuteka, ni loko ndzi huwelela eka wena.

⁵⁷U ndzi tshinelele ekusuhi siku leri ndzi nga huwelela eka wena, U ku: ‘U nga tshuki u chava.’

⁵⁸“Hosi, u yimerile mhaka ya moya wa mina, U kutsule vutomi bya mina.

⁵⁹Yehovha, u vonile ku xanisiwa ka mina; U ndzi avanyisela hi ku lulama!

⁶⁰U vonile ku tirihisela hinkwako ka vona, Ni ku ngurhangurha hinkwako ka vona!

⁶¹“U yingisile xisandzu xa vona, oho Yehovha! Ni ku dzumadzuma hinkwako ka vona ehenhla ka mina,

⁶²Ni milomu ya lava ndzi pfukelaka matimba, Ni makungu ya vona ematshan'weni ya mina siku hinkwaro.

⁶³Languta loko va tshama ni loko va pfuka, Hi mina risimu ra vona.

⁶⁴“Yehovha, u ta hakela hi hakelo leyi ringanaka Mitirho ya mavoko ya vona,

⁶⁵U va nyika timbilu leto nonon'hwa, Ku rhukana ka wena a ku ve ehenhla ka vona.

⁶⁶U va hlongorisa hi vukari bya wena, Kutani u va herisa ehansi ka matilo, oho Yehovha!”