Read tsonga Ezekiyele 10 Bible Online

Ezekiyele 10 - tsonga bible

Ezekiyele 10

¹Ndzi languta, kutani ndzi vona empfhukeni lowu ngi wu ri ehenhla ka tinhloko ta tikerubu xilo lexi nga ribye ra safiri, ni xilo lexi nga fana ni xiluvelo a xi ri ehenhla ka wona.

²Kutani Yehovha a ku eka munhu la ambaleke nguvu ya ntsembyana: “Nghena exikarhi ku masondzo ehansi ka tikerubu, u tata mavoko ya wena hi makala lama vuvumelaka, lama humaka exikarhi ka tikerubu, u ma hangalasa ehenhla ka muti!” Kutani a ya kona ndzi ri karhi ndzi n'wi vona.

³Tikerubu a ti yimile hitlhelo ra xinene ra Yindlu loko munhu loyi a ya kona, kutani papa ri tata xivava xa le ndzeni.

⁴Kutani ku kwetsima ka Yehovha ku suka ehenhla ka tikerubu ku ya yima ehenhla ka nyangwa ya Yindlu, kutani yindlu yi tatiwa hi papa, na xona xivava xi tala hi ku vangama ka ku kwetsima ka Yehovha.

⁵Mpfumawulo wa timpapa ta tikerubu wu twakala ku fika exivaveni xa le handle, wu fana ni rito ra Xikwembu xa matimba loko xi vulavula.

⁶Yehovha a lerisa munhu loyi a ambaleke nguvu ya ntsembyana, a ku: “Oka ndzilo exikarhi ka masondzo, exikarhi ka tikerubu. Kutani munhu loyi a pfuka a ya yima ekusuhi ni masondzo.

⁷Kavaloko kerubu yi tshambuluta voko ra yona exikarhi ka tikerubu tlhelo ra ndzilo lowu nga exikarhi ka tikerubu,” yi okela ndzilo yi wu veka emandleni ya munhu la ambaleke nguvu ya ntsembyana; yena a wu teka a huma.

⁸Kambe a ku vonaka xivumbeko xa voko ra munhu ehansi ka timpapa ta tikerubu.

⁹Ndzi va ndzi languta, kutani ndzi vona mune wa masondzo ekusuhi ni tikerubu; sondzo rin'wana ni rin'wana a ri ri ekusuhi ni kerubu yin'wana ni yin'wana; nghohe ya masondzo a yi fana ni krisolita.

¹⁰Ma fanana hi vumune bya wona, sondzo rin'wana a ri hingakanya sondzo rin'wana.

¹¹Loko ma tshinelela emahlweni, ma famba hi matlhelo ya wona ya mune, a ma nga rhendzeleki, laha nhloko yi languteke kona, hilaha ma nga famba kona ma nga rhendzeleki.

¹²Mimiri ya tikerubu ni mihlana ya wona, ni mavoko ya wona, ni timpapa, ni masondzo ya wona ya mune a swi tele hi mahlo hi matlhelo hinkwawo.

¹³Loko ma ri masondzo, ndzi twa leswaku ma thyiwa vito ra xidzedze.

¹⁴Kerubu yin'wana ni yin'wana a yi ri ni mimombo ya mune; mombo lowo rhanga a wu ri mombo wa kerubu, wa lowa vumbirhi a wu ri mombo wa munhu; wa vunharhu, wa nghala; wa vumune, wa gama.

¹⁵Kutani tikerubu ti tlakuka; tona, a swi ri swivumbiwa leswi ndzi nga swi vona enambyeni wa Kebara.

¹⁶Loko tikerubu a ti famba, masondzo na wona a ma famba ekusuhi na tona; loko tikerubu ti tlakusa timpapa ku hahela ehenhla, wona masondzo a ma nga suki ekusuhi na tona.

¹⁷Loko ti yima, na wona masondzo a ma yima; loko ti tlakukela ehenhla, na wona masondzo ma titlakusa na tona, hikuva moya wa swivumbiwa leswi hanyaka a wu ri eka wona.

¹⁸Kutani ku kwetsima ka Yehovha ku suka enyangweni ya yindlu ku ya yima ehenhla ka tikerubu.

¹⁹Tikerubu ti tlakusa timpapa ta tona, ti haha ti suka emisaveni emahlweni ka mina, loko ti suka, na wona masondzo ma landza hi le kusuhi. Kutani ti yima enyangweni ya le vuxeni ya Yindlu ya Yehovha; ku kwetsima ka Xikwembu xa Israele a ku ri ehenhla ka tona.

²⁰Hi swona swivumbiwa leswi ndzi nga swi vona ehansi ka Xikwembu xa Israele, ekusuhi ni nambu wa Kebara, kutani ndzi vona leswaku a ti ri tikerubu.

²¹Yin'wana ni yin'wana a yi ri ni mune wa mimombo, yin'wana ni yin'wana a yi ri ni mune wa timpapa; xilo lexi fanaka ni voko ra munhu a xi ri ehansi ka timpapa ta tona.

²²Mimombo ya tona a yi fana kunene ni mimombo leyi ndzi yi voneke enambyeni wa Kebara, a yi fana hi nghohe, a ya ri yona hi xiviri. Yin'wana ni yin'wana a yi famba emahlweni ka yona.