Read tsonga Ezekiyele 21 Bible Online

Ezekiyele 21 - tsonga bible

Ezekiyele 21

¹Rito ra Yehovha ri ta eka mina, ri ku:

²“N'wana wa munhu, rhendzeleta mombo wa wena tlhelo ra dzonga, u vula rito ra wena tlhelo ra dzonga, u profetela xihlahla xa tiko ra dzonga,

³u ku eka xihlahla xa dzonga: Yingisa rito ra Yehovha! Hosi Yehovha u ri: Vona, ndzi ta tshivela ndzilo eka wena, wu ta heta mirhi leyo tsakama hinkwayo ni mirhi hinkwayo leya ku oma; langavi leri pfurhaka a ri nga timeki, kutani mimombo hinkwayo, ku suka le dzongeni, ku fikela le n'walungwini, yi ta tshwa;

⁴kutani nyama hinkwayo yi ta vona leswaku hi mina Yehovha ndzi tshiveleke ndzilo lowo; a wu nga timeki.

⁵“Kutani ndzi ku: ‘Yo; Hosi Yehovha!’ Va vula eka mina leswaku: ‘A nga vulavuli ha swifaniso, njiya xana?’ ”

⁶Rito ra Yehovha ri ta eka mina, ri ku:

⁷“N'wana wa munhu rhendzeleta mombo wa wena tlhelo ra Yerusalema, u humesela tlhelo ra xivandla lexo kwetsima rito ra wena, u profetela tiko ra Israele!

⁸U ku eka tiko ra Israele: Yehovha u ri: Vona, ndzi ta eka wena, ndzi ta hlomula ripanga ra mina enkotlotweni wa rona, ndzi tsema lavo lulama ni lavo biha lava nga eka wena.

⁹Leswi ndzi nga ta tsema lava lulameke ni lavo biha lava nga eka wena, hilaha ripanga ra mina ri nga ta huma enkotlotweni ku dlaya nyama hinkwayo, ku suka edzongeni ku fika en'walungwini.

¹⁰Kutani nyama hinkwayo yi ta swi tiva leswaku mina Yehovha ndzi hlomule ripanga ra mina enkotlotweni; ri nga ka ri nga tlheleri eka wona.

¹¹“Loko u ri wena, n'wana wa munhu, hefemuteka hi ku tsemeka nhlana, u hefemuteka hi ku vaviseka emahlweni ka vona.

¹²Kutakuloko va ku eka wena: U hefemutekela yini? U ta ku: Ndzi hefemutekela timhaka leti taka; hikuva timbilu hinkwato ti ta n'oka, mavoko hinkwawo ma ta hela matimba, mimoya hinkwayo yi ta chava, ni matsolo hinkwawo ma ta hundzuka mati; vonani, timhaka ta ta, ti tile, ku vula Hosi Yehovha.”

¹³Na kambe rito ra Yehovha ri ta eka mina, ri ku:

¹⁴“N'wana wa munhu, profeta, u ku: Yehovha u vulavula, a ku: Fumu hi lero! Fumu hi lero! Ri lotiwile, ri vuya ri hatimisiwile.

¹⁵Ri lotiwele ku dlaya lokukulu; ri lotiwe ri kondza ri vangama. Kumbe hi nga tsaka hi ku: Nhonga ya n'wananga yi sola mirhi hinkwayo.

¹⁶U humese fumu leswaku ri vangamisiwa, leswaku ri tameriwa hi voko; fumu ri lotiwile, ri vuya ri hatimisiwile, leswaku ri nghenisiwa evokweni ra mudlayi.

¹⁷“Rila, u huwelela, n'wana wa munhu, hikuva fumu ri ta va ehenhla ka vanhu va mina, ri ta va ehenhla ka tihosana hinkwato ta Israele; ti nyiketiwa fumu kun'we ni vanhu va mina. Loko swi ri tano, phakata endzhumbini wa wena!

¹⁸Hikuva ku ringa ku ta va kona, kutani swi ta va yini, loko nhonga leyi solaka yi herisiwa xana? Ku vula Hosi, Yehovha.

¹⁹“Kutani wena, n'wana wa munhu profeta, u phakata swandla swa wena; fumu a ri engete ri tlhava kambirhi kanharhu: I fumu leri dlayaka, i fumu leri dlayaka lavakulu, ri va rhendzela.

²⁰“Hi leswaku timbilu ti n'oka, ni leswaku swikhunguvanyiso swi va swi tala etihubyeni ta miti hinkwayo, loko ndzi rhumela ku laya ka fumu. Yo! Ri endliwe ku vangama, ri loteriwe ku dlaya.

²¹Oho fumu, u hlanganisa u tlhava eka lera xinene; angamela, u tlhava eka le ra ximatsi, ematlhelo hinkwawo laha ku kongomekaka kona.

²²Na mina, ndzi ta phokotela hi swandla swa mina, ndzi wisisa. Mina Yehovha, ndzi vurile.”

²³Rito ra Yehovha ri ta eka mina, ri ku:

²⁴“Oho n'wana wa munhu, titsalele tindlela timbirhi, laha fumu ra hosi ya le Babilona ri nga ta hundza kona; letimbirhi ti ta huma etikweni rin'we; u hlawula mfungho u tivekela wona exihlokweni xa ndlela ya muti.

²⁵“U endla ndlela yin'wana ya fumu ku ya eRhaba, emutini wa vana va Amoni, yin'wana ku ya eYerusalema, emutini wa matimba wa Yuda.

²⁶Hikuva hosi ya Babilona yi yime entileni lowukulu emahandzeni ya tindlela letimbirhi leswaku yi endla ku bvumbha; yi vangamisa miseve, yi vutisa swifaniso, yi kamba xivindzi.

²⁷Vonani lexi bvumbhaka xi le vokweni ra yena lera xinene, xi komba eYerusalema! Ku ta vekiwa tinsimbhi to wisa marhangu ya muti, ku endliwa tihuwa eku dlayeni, ku tlhaviwa mukhosi, ku vekiwa tinsimbhi ku faya timbanti ta tinyangwa, ku akiwa tinhulu, ku akiwa makhokholo.

²⁸Loko va ri vona, emahlweni ya vona, i ku bvumbha ka swahava; ndzi ri, eka vona lava hlambanyaka hi swihlambanyo; kambe yena u tsundzuxa vuhomboloki bya vona, leswaku va ta khomiwa.

²⁹“Loko swi ri tano, Hosi Yehovha u ri: Leswi ma ha tsundzukaka vuhomboloki bya n'wina, hilaha swidyoho swa n'wina swi vonakarisiwaka, leswaku swidyoho swa n'wina swi vonaka eswiendlweni swa n'wina hinkwaswo hikuva ma ha swi tsundzuka, mi ta khomiwa hi voko ra yena.

³⁰“Loko u ri wena, hosana ya Israele, leyi nyameke, leyo biha, leyi siku ra wena ri fikaka enkarhini lowu swo biha swi hetisekeke ha wona!

³¹Hosi Yehovha u ri: Susa xihuku, u susa musingasoro wa wena; lexi nga kona a xi nga ha vi kona; ku ta tlakusiwa lexi tsongahatiweke, ku ta tsongahatiwa lexi tlakukeke.

³²Ndzi ta xi cukumeta, ndzi xi cukumeta; ndzi xi cukumeta; lexi nga kona a xi nga ha vi kona, ku kondza ku fika loyi ku avanyisa ku nga ka yena, loyi ndzi nga ta n'wi nyika kona.

³³“Wena, n'wana wa munhu, profeta, u ku: Hosi Yehovha u vulavula ematshan'weni ya vana va Amoni, ni le matshan'weni ya swionho swa vona. U nge: Fumu, fumu ri hlomuriwile, ri vangamisiwele ku dlaya, ni ku heta, ni ku hatima;

³⁴loko va ri karhi va vona swahava eka wena, loko va ri karhi va bvumbha vunwa eka wena, ku ku yisa etinhan'wini ta lava dlaweke lavo biha, lavo siku ra vona ri fikaka enkarhini wa vuhomboloki byo hetelela.

³⁵Tlherisela fumu enkotlotweni wa rona! Ndzi ta ku avanyisa exivandleni lexi u vumbiweke eka xona, etikweni leri u velekiweke eka rona.

³⁶Ndzi ta chelela vukari bya mina ehenhla ka wena, ndzi ta pfurheta ndzilo wa vukari bya mina eka wena, ndzi ku nyiketa evokweni ra vanhu lava nga ni mona, lava tirhaka ro herisa.

³⁷U ta va swakudya swa ndzilo, ngati ya wena yi ta va exikarhi ka tiko, a ku nga ha tsundzukiwi, hikuva hi mina Yehovha ndzi vulavuleke.”