Read tsonga Ezekiyele 22 Bible Online

Ezekiyele 22 - tsonga bible

Ezekiyele 22

¹Rito ra Yehovha ri engeta ri ta eka mina, ri ku:

²“Wena n'wana wa munhu, u ta wu avanyisa, u ta wu avanyisa muti wa ngati xana? U ta wu tivisa manyala hinkwawo ya wona,

³u ku: Hosi Yehovha u ri: I muti lowu halataka ngati exikarhi ka wona, leswaku nkarhi wa wona wu fika kutani wu tiendlela swifaniso ku tinyamisa ha swona.

⁴U ni nandzu hi ngati leyo u yi halateke; u tinyamisile hi swifaniso leswo u swi endleke; u tshinetile masiku ya wena, u fikile ni le malembeni ya wena hilaha ndzi ku endleke xisolo eka vamatiko ni xihlekiso ematikweni hinkwawo.

⁵Lava nga ekusuhi, ni lava nga ekule na wena, va ta ku hleka, wena la nga ni vito lera thyaka, la teleke tingana.

⁶“Vona, tihosana ta Israele, yin'wana ni yin'wana hilaha matimba ya yona ma nga kona, ti lava ku halata ngati eka wena.

⁷Va rhukana vatata wa vona ni vamana wa vona eka wena; wamatiko wa xanisiwa exikarhi ka wena, eka wena, la feleke hi tata wa yena, ni wansati wa noni va kandziyeriwa.

⁸U tsan'wa swa mina leswo kwetsima, u nyamisa Tisavata ta mina.

⁹Ku ni vanhu lava hlevaka eka wena, leswaku ku ta ta halatiwa ngati; eka wena, va dyela etintshaveni; eka wena, va endla leswo biha.

¹⁰Eka wena, va tlomula vuhava bya vatatana; eka wena, ku etleriwa ni wansati la hlambaka.

¹¹Un'wana u endle manyala ni nsati wa loyi a akeke na yena, un'wana u nyamise n'wingi wa yena hi vuhomboloki bya yena, un'wana u wisa etinganeni makwavo wa xisati, a nga n'wana wa tata wa yena.

¹²Eka wena, ku amukeriwa tinyiko leswaku ku ta ta halatiwa ngati; u teka bindzu ni ku andzisa, u humesisa warikwenu mali hi ku vutla, u ri karhi u ndzi rivala, ku vula Hosi Yehovha.

¹³“Vona, hilaha ndzi beke mandla ya mina hikwalaho ka ku phanga ka wena loku u ku endleke, ni hikwalaho ka ngati ya wena leyi ingi yi ri kona exikarhi ka wena.

¹⁴Xana mbilu ya wena yi ta tiya, kumbe mandla ya wena ma nga va ni matimba emasikwini walawo ndzi nga ta tirha na wena ha wona xana? Hi mina Yehovha ndzi vulavuleke, ndzi ta swi endla.

¹⁵Ndzi ta ku hangalasa exikarhi ka matiko, ndzi ku hangalasela ematikweni, ndzi hlangula thyaka ra wena eka wena.

¹⁶Kutani u ta tiendla lowa thyaka ekaya ka wena emahlweni ka matiko, u ta tiva leswaku hi mina Yehovha.”

¹⁷Rito ra Yehovha ri ta eka mina, ri ku:

¹⁸“N'wana wa munhu, va yindlu ya Israele eka mina va hundzuke manyelo. Vona hinkwavo i koporo, ni thini, ni nhumbu, ni ntsopfu, exikarhi ka fulo; hinkwavo ka vona i manyelo ya silivhere.

¹⁹“Hikwalaho, ku vula Hosi Yehovha: Leswi hinkwenu mi hundzukeke manyelo, languta, ndzi ta mi hlengeleta exikarhi ka Yerusalema.

²⁰Kukotisa loko ku hlengeletiwa silivhere, ni koporo, ni nhumbu, ni ntsopfu, ni thini exikarhi ka fulo, ku pfurhetela ndzilo ehenhla ka swona leswaku swi n'oka ndzi ta mi hlengeletisa sweswo evukarini bya mina ni le ku holoveni ka mina, kutani ndzi ta mi veka kona efulweni, ndzi mi n'okisa.

²¹Ndzi ta mi hlengeleta, ndzi pfurheta ehenhla ka n'wina ndzilo wa vukari bya mina, mi ta n'okisiwa exikarhi ka wona.

²²Kukotisa leswi silivhere yi n'okisiwaka efulweni, na n'wina mi ta n'okisiwa exikarhi ka wona, mi ta swi tiva leswaku hi mina Yehovha ndzi cheleke vukari bya mina ehenhla ka n'wina.”

²³Kutani rito ra Yehovha ri ta eka mina, ri ku:

²⁴“N'wana wa munhu, u nge eka Yerusalema: U tiko leri nga hlantswiwangiki, leri pfumalaka mpfula esikwini ra vukari.

²⁵Ku ni ku pfumelelana ka ku tiarisa eka vaprofeta lava nga eka rona, ku fana ni nghala leyi dzumadzumaka, leyi handzulelaka mbhari; va dya mimoya ya vanhu, va teka rifuwo ni swilo swo kala, va andzisa vavasati va tinoni exikarhi ka tiko.

²⁶Vaprista va rona va tlula nawu wa mina, va nyamisa swa mina leswi kwetsimaka, a va avanyisi exikarhi ka leswo kwetsima ni leswi nga riki swo kwetsima, a va kombi swangi ku hambana ku kona exikarhi ka leswi nga tengangiki ni leswi tengeke; va siva mahlo ya vona leswaku va nga voni Tisavata ta mina, kutani ndzi nyamisiwa exikarhi ka vona.

²⁷“Tihosana ta rona exikarhi ka rona ti fana ni timhisi leti handzulaka mbhari; ti halata ngati, ti lovisa mimoya ya vanhu leswaku ti andzisa rifuwo ra tona.

²⁸Vaprofeta va rona va swi tota hi ndzhope va vona swahava, va bvumbha vunwa eka vona va ku: ‘Hosi Yehovha u vule swo karhi,’ kasi Yehovha a nga vulangi.

²⁹Loko va ri vanhu va tiko leri, va endla ku xanisa, va titekela hi ku yiva; va xanisa xisiwana ni vapfumari; va xanisa wamatiko ku nga ri hi mfanelo.

³⁰Kutani ndzi lave munhu exikarhi ka vona leswaku xana a nga va kona la nga biyaka rihlampfu, a yima exivangweni emahlweni ka mina ku lwela tiko, leswaku ndzi nga ti ri lovisa, kambe a ndzi n'wi kumangi.

³¹Hikwalaho ndzi ta chela vukari bya mina ehenhla ka vona; ndzi va lovisa hi ndzilo wa vukari bya mina, ndzi veka nandzu wa tindlela ta vona etinhlokweni ta vona, ku vula Hosi Yehovha.”