Read tsonga Ezekiyele 3 Bible Online

Ezekiyele 3 - tsonga bible

Ezekiyele 3

¹A ku eka mina: “N'wana wa munhu dyana lexi u xi kumaka, dyana buku leyi u famba, u vulavula eka yindlu ya Israele.”

²Ndzi ahlamisa nomu wa mina, kutani a ndzi dyisa buku leyi.

³A ndzi byela, a ku: “N'wana wa munhu, u dya, u xurhisa khwiri ra wena ni marhumbu ya wena hi buku leyi ndzi ku nyikaka yona.” Kutani ndzi yi dya; enon'wini wa mina, a yi fana ni vulombe hi ku tsokombela.

⁴A engeta a ku eka mina: “N'wana wa munhu, yana eka yindlu ya Israele, u va byela marito ya mina.

⁵A ndzi ku rhumi eka tiko leri nga ni ririmi leri nonon'hwaka, kumbe leri nga twisisekiki; ndzi ku rhuma eka yindlu ya Israele.

⁶A ndzi ku rhumi eka matiko layo tala lama vulavulaka ririmi leri nonon'hwaka, leri nga twisisekiki, leri nga ta ku hlula. Loko ngi ndzi ku rhuma eka valavo, ingi va ta ku yingisa.

⁷Kambe yindlu ya Israele yi nga ka yi nga ku yingisi, hikuva a va rhandzi ku ndzi yingisa, yindlu hinkwayo ya Israele yi ni tinhamu leti tiarisaka.

⁸Vona ndzi ta nonon'hwisa nghohe ya wena leswaku u lwa ni tinghohe ta vona, ndzi ta honokisa mombo wa wena leswaku u kota ku lwa ni mimombo ya vona,

⁹ndzi ta ku nonon'hwisa, ndzi ku ringanisa ni dayimani, leswaku u lwa na vona. U nga va chavi, u nga chavisiwi hi mimombo ya vona hambi va ri va yindlu leyi tiarisaka.”

¹⁰A engeta a ku eka mina: “N'wana wa munhu, amukela embilwini ya wena marito hinkwawo ya mina, u ma yingisa hi tindleve!

¹¹Famba u ya eka vabohiwa, eka vana va tiko ra wena; u ta vulavula na vona, hambi va yingisa, kumbe va nga yingisi, u ku: ‘Ku vula Hosi Yehovha.’ ”

¹²Kutani moya wu ndzi tlakusa, kavaloko ndzi twa endzhaku ka mina huwa ya mavandla lamakulu, va ku: “A ku dzunisiwe ku kwetsima ka Yehovha exivandleni xa vutshamo bya yena!”

¹³Ndzi twa mpfumawulo wa timpapa ta swivumbiwa leswi hanyaka, leti khumbaneke, ni mpfumawulo wa masondzo ekusuhi na tona, ni wa pongo lerikulu.

¹⁴Moya wu ndzi tlakula, wu ndzi susa, kutani ndzi tifambela hi ku vaviseka ni ku kariha; kambe voko ra Yehovha a ri tirha ehenhla ka mina hi matimba.

¹⁵Kavaloko ndzi fika eka vabohiwa va Tel-Avhivhi, lava tshameke ekusuhi ni nambu wa Kebara, ni le magoveleni ya vona, ndzi tshama eka vona hi masiku ya 7, ndzi ri karhi ndzi hlamala.

¹⁶Loko ku hundzile masiku ya 7, rito ra Yehovha ri fika eka mina, ri ku:

¹⁷“N'wana wa munhu, ndzi ku endla mulanguteri wa yindlu ya Israele. U ta yingisa rito leri nga ta huma enon'wini wa mina, kutani u ta va tlharihisa hi vito ra mina.

¹⁸Loko ndzi ta ku eka lowo biha: ‘U ta fa kunene!’ Loko u nga n'wi tsundzuxi, u nga vulavuli na yena ku n'wi hundzukisa endleleni ya yena leyo biha, leswaku u ponisa vutomi bya yena, munhu lowo biha loyi u ta fa eku hombolokeni ka yena, kambe ngati ya yena ndzi ta yi lava evokweni ra wena.

¹⁹Loko u tsundzuxa mubihi, kambe a nga hundzuki eku biheni ka yena, u ta fa eku hombolokeni ka yena; loko u ri wena, u ta va u ponisile moya wa wena.

²⁰Loko munhu lowo lulama a hundzuka eku lulameni ka yena, a dyoha loko ndzi n'wi ringa, u ta fa; leswi-ke u nga n'wi tsundzuxangiki, u ta fa eku dyoheni ka yena; ku lulama ka yena ku nga ka ku nga tsundzukiwi, kambe ngati ya yena ndzi ta yi lava evokweni ra wena.

²¹Ntsena loko u tlharihisa la lulameke leswaku a nga dyohi, kutani a nga dyohi, u ta hanya hikuva u ta va a yingisile; loko u ri wena, u ta ponisa moya wa wena.”

²²Na kona, voko ra Yehovha ri va ehenhla ka mina, a ku eka mina: “Pfuka u ya erivaleni, ndzi ta vulavula na wena kona.”

²³Kavaloko ndzi pfuka ndzi famba erivaleni, ndzi vona ku kwetsima ka Yehovha hilaha ndzi ku voneke ekusuhi ni nambu wa Kebara. Kutani ndzi wa hi mombo wa mina.

²⁴Moya wu nghena eka mina, wu ndzi yimisa emilengeni ya mina, kutani Yehovha a vulavula na mina, a ku: “Famba u ya tipfalela endlwini ya wena.

²⁵Vona, n'wana wa munhu, va ta ku vekela mapindza ehenhla, va ku boha ha wona leswaku u nga tlheleli exikarhi ka vona.

²⁶Ndzi ta namarheta ririmi ra wena enon'wini wa wena, ndzi ku endla mbheveve leswaku u tsandzeka ku va tshinya hikuva i yindlu ya lava tiarisaka.

²⁷Kambe loko ndzi ta vulavula na wena, ndzi ta ahlamisa nomu wa wena, kutani u ta va byela, u ku: ‘Ku vula Hosi Yehovha.’ La yingisaka, a a yingise, ni la nga yingisiki, u n'wi tshika a nga yingisi, hikuva i yindlu ya lava tiarisaka.”