Read tsonga Ezekiyele 38 Bible Online

Ezekiyele 38 - tsonga bible

Ezekiyele 38

¹Rito ra Yehovha ri ndzi humelela, ri ku:

²“N'wana wa munhu, rhendzelekisa mombo wa wena tlhelo ra ka Gogo, etikweni ra Magogo, hosi leyi fumaka Mexeke na Tubala, u profeta ha yena, u ku:

³Hosi Yehovha u vulavula sweswo, a ku: Ndzi ta eka wena, Gogo, hosi ya Mexeke na Tubala!

⁴Ndzi ta ku humesa, ndzi ta nghenisa swove etinhlayeni ta wena, ndzi ku humesa wena ni nyimpi ya wena hinkwayo, tihanci ni vakhandziyi va tona lava havaxeleke hinkwavo mahavelo ya vona hinkwawo; ntshungu lowukulu lowu tamelaka xitlhangu ni nhlungula, hinkwavo vatameri va ripanga;

⁵Vaperesi, ni Vaetiyopiya, ni Valibiya va ta famba na vona, hinkwavo va ni switlhangu ni swintlontlo;

⁶Gomere ni mitlawa ya yena hinkwayo, yindlu ya Togarima, emakumu ya n'walungu, ni mitlawa ya yena hinkwayo; matiko lamanyingi ma ta va na wena.

⁷“Tilunghise! U lunghisa hinkwaswo, wena, ni ntshungu wa wena hinkwawo lowu hlengeletanaka ekusuhi na wena. U va mufambisi wa vona.

⁸Loko ku herile masiku yo tala, hilaha u nga ta lerisiwa; emikarhini ya le mahlweni, u ta ta lwa ni tiko leri poneke eka fumu, leri nga hlengeletiwa ematikweni yo tala, etintshaveni ta Israele leti ingi ti sele hi nkarhi wo leha ti nga ri na vanhu, va humile exikarhi ka matiko, va tshama hinkwavo hi ku rhula.

⁹U ta khandziya, u fika kukotisa xidzedze, u ta fana ni papa leri nga ta funengeta misava, wena ni mitlawa ya wena hinkwayo, ni matiko layo tala hinkwawo lama nga na wena.

¹⁰“Hosi Yehovha u vulavula sweswo, a ku: Hi siku rero mianakanyo yi ta humelela embilwini va wena, u ta endla makungu layo biha.

¹¹U ta ku: ‘Ndzi ta khandziya, ndzi ya lwa ni tiko leri ra swimitana, ndzi ta wa ehenhla ka vanhu lava vo rhula, lava tshamaka hi ku tshemba, lava akeke va nga biyi hi rirhangu, va nga ri na tinghole, hambi ti ri timbanti.’

¹²U ta ya u ya hlasela ni ku phanga; u ta tshambuluta voko ra wena ehenhla ka marhumbi lawa, lama nga ni vanhu sweswi, ehenhla ka tiko leri hlengeletiwaka exikarhi ka matiko, leri tifuwelaka mitlhambi ni xuma, leri tshamaka exikarhi ka misava.

¹³Xeba na Dedani, ni vapindzuri va le Tarxixi, ni tinghalanyana ta kona hinkwato ti ta ku byela, ti ku: ‘A ku telanga ku hlasela xana? A ku hlengeletangi mitlawa ya wena ku ta phanga, ku ta vutla silivhere ni nsuku, ku ta teka mitlhambi ni xuma, ku titekela mbhari leyikulu xana?’

¹⁴“Hikwalaho, n'wana wa munhu, profeta, u byela Gogo, u ku: Hosi Yehovha a vulavula sweswo, a ku: Hi siku rero, loko tiko ra mina ra Israele ri ta tshama hi ku rhula, xana u nga ka u nga ri tivi xana?

¹⁵U ta pfa hilaha u nga kona, le makumu ya n'walungu, wena ni matiko layo tala na wena, hinkwavo vakhandziyi va tihanci, ntshungu lowukulu ni nyimpi ya matimba.

¹⁶Kutani u ta khandziya u ya lwa ni tiko ra mina ra Israele, u kotisa papa leri lavaka ku funengeta misava. Emikarhini ya makumu, hilaha ndzi nga ta ku rhuma hakona ku lwa ni tiko ra mina, leswaku matiko ma ta ndzi tiva loko ndzi ta tikwetsimisa ha wena emahlweni ka vona, wena Gogo!

¹⁷“Hosi Yehovha a vulavula sweswo, a ku: Xana a hi wena loyi ndzi n'wi vuleke emikarhini ya khale, hi nomu wa malandza ya mina, vaprofeta va Israele, lava nga profeta emasikwini lawa hi malembe yo tala, va ku: Ndzi ta ku rhuma ku lwa na vona?

¹⁸Hi siku rero loko Gogo a ta nghena etikweni ra Israele, ku vula Hosi Yehovha, mbilu ya mina yi ta tala vukari,

¹⁹kutani hikwalaho ka rilondzo ra mina, ni ndzilo wa ku kariha ka mina, ndzi tiyisa, ndzi ri: Ku ta va ni ku tsekatseka lokukulu ka misava ya Israele hi siku rero.

²⁰Emahlweni ka mina ku ta tsekatseka tinhlampfi ta lwandle, ni tinyanyana ta matilo ni swiharhi swa nhova, ni swikokovi hinkwaswo leswi kokovaka ehansi, ni munhu un'wana ni un'wana la nga erivaleni ra misava, tintshava ti ta mbundzuka, maribye ma ta wa, ni khumbi rin'wana ni rin'wana ri ta hlanhliwa.

²¹Kutani ndzi ta vitana ripanga, ri lwa na yena etintshaveni ta mina hinkwato, va ta tlhavana hi fumu, ku vula Hosi Yehovha.

²²“Hilaha ndzi nga ta tenga na yena hi ntungu ni ngati, ndzi ta nisa mpfula leyikulu, ni maribye, ni ndzilo, ni xivavula ehenhla ka yena, ehenhla ka mitlawa ya yena, ni le henhla ka matiko lamanyingi lama nga ta va na yena.

²³Kutani ndzi ta titwarisa ni ku tikwetsimisa, ndzi ta titivisa emahlweni ka matiko lamanyingi, ma ta tiva leswaku hi mina Yehovha.