Read tsonga Ezekiyele 41 Bible Online

Ezekiyele 41 - tsonga bible

Ezekiyele 41

¹Kutani a ndzi nghenisa etempeleni, a pima marimba ya yona; ku anama ka wona swisungunhu swa ntlhanu na xin'we haleno, ni swisungunhu swa ntlhanu na xin'we hala, swi ringana ni ku anama ka tende.

²Ku anama ka nyangwa swisungunhu swa khume; matsheve ya nyangwa ntlhanu wa swisungunhu haleno, ni hala, ntlhanu; kutani a pima ku leha ka tempele, mune wa makume ya swisungunhu, ni ku anama makume mambirhi.

³Kutani a nghena exikarhi, a pima marimba ya nyangwa ya le xikarhi, swisungunhu swimbirhi; nyangwa ya kona ntlhanu na xin'we; ni ku anama ka nyangwa ntlhanu na swimbirhi.

⁴Kutani a pima ku leha ka swisungunhu swa makume mambirhi, ni ku anama ka swisungunhu swa makume mambirhi emahlweni ka tempele; kutani a ku eka mina: “Kwalaho i xikwetsimisiso.”

⁵Kutani a pima khumbi ra yindlu, swisungunhu swa ntlhanu na xin'we, ni ku anama ka vuako bya matlhelo, swi ringana mune wa swisungunhu hi matlhelo hinkwawo ya yindlu hinkwayo.

⁶Makamara ya le matlhelo a ma yimile, rin'wana ni rin'wana ehenhla ka rin'wana, ya endla tinxaxa tinharhu, ya hela sweswo ya ri makume manharhu: A ma hikiwile hi khumbi, ma lulama ni yindlu leswaku ma tiyisiwa hi rona kambe ma nga ngheni ekhumbini ra yindlu.

⁷Xivandla lexi ngi va fambafamba eka xona a xi engeteriwile erixaxeni ra le henhla, hikuva yindlu a yi ri ni rikupakupa leri rhendzelaka yindlu erixaxeni rin'wana ni rin'wana hi matlhelo hinkwawo; hikwalaho yindlu a yi engeteriwa ku anama erixaxeni rin'wana ni rin'wana; hi sweswo rikupakupa ra le hansi a ri larile ku tlula ra le henhla; rikupakupa ra le xikarhi ri landze ra le henhla.

⁸Kutani ndzi vona yindlu a yi tlakukile hinkwayo exitsunganeni; makamara ya matlhelo a ya ri ni masungulo kwalaho: Ku tlakuka ka wona a yi ri nhonga leyi teleke, hileswaku swisungunhu swa ntlhanu na xin'we ku ya fikela egombyeni.

⁹Ku anama ka khumbi ra le handle ra makamara ya matlhelo a ku ri kantlhanu wa swisungunhu. A ku sele handle masungulo ya vuako bya le matlhelweni ka yindlu;

¹⁰ku fika emakamareni ya le matlhelweni a ku ri ni ku anama ka swisungunhu swa makume mambirhi, ku rhendzela yindlu hinkwayo.

¹¹Nyangwa ya vuako bya le matlhelweni ka yindlu a yi pfuleriwile ehenhla ka masungulo; yin'wana nyangwa a yi languta en'walungwini, yin'wana nyangwa a yi languta edzongeni; kutani ku anama ka xivandla xa masungulo a ku ri ka swisungunhu swa ntlhanu hinkwako.

¹²Vuako lebyi ngi byi lavana ni xivandla xo pfariwa, hitlhelo ra vupeladyambu a byi ri ni ku anama ka swisungunhu swa 70. Khumbi ra vuako lebyo a ri ri ni ku anama kantlhanu wa swisungunhu hi matlhelo hinkwawo, ni ku leha ka rona, swisungunhu swa 90.

¹³Kutani a pima yindlu: Ku leha ku va dzana ra swisungunhu; xivandla xo pfariwa, ni vuako, ni khumbi ra byona, swi ringana dzana ra swisungunhu hi ku anama.

¹⁴Ku anama ka le mahlweni ka yindlu ni ka xivandla xo pfariwa xa le vuxeni, swisungunhu swa dzana.

¹⁵Kutani a pima ku leha ka vuako ku lavana ni xivandla xo pfariwa lexi nge endzhaku ka yindlu, ni swihubyana swa byona, haleno ni hala, a kuma dzana ra swisungunhu. Etempeleni, exikwetsimisisweni ni le rikupakupeni leri lavanaka ni rivala ra le xikarhi,

¹⁶a ku ri ni mapulangi yo vatliwa le vukhandziyweni bya tinyangwa, emafasitereni yo hambanyisiwa ni le swihubyaneni swa le matlhelo, hi vunharhu bya swona, ku ringana ni tinyangwa. Ku sukela ehansi ku fikela emafasitereni lama ngi ma pfariwile,

¹⁷ku fika ehenhla ka nyangwa ni le ndzhaku ka yindlu, ni le handle ehenhla ka khumbi rin'wana ni rin'wana, hi matlhelo hinkwawo, ehandle ni le ndzeni, hinkwaswo a swi funengetiwa hi tinguvu; a ti sasekisiwile hi tikerubu ni mahanga;

¹⁸kerubu a yi ri kona exikarhi ka mahanga mambirhi: Kerubu yin'wana ni yin'wana a yi ri ni mimombo mimbirhi;

¹⁹wun'wana wu ri nghohe ya munhu yi languta tlhelo ra hanga ra haleno, wun'wana wu ri nghohe ya nghala yi languta hanga ra hala, swi endle sweswo endlwini hi matlhelo hinkwawo.

²⁰Ku suka ehansi ku fikela ehenhla ka nyangwa, ku endliwile tikerubu ni mahanga; a ri ri khumbi ra tempele.

²¹Tempele a yi ri ni marimba ya matsheve ya mune lama ringanaka; emahlweni ka xikwetsimisiso a ku ri ni xilo lexi fanaka ni alitari ya mapulangi;

²²ku tlakuka ka yona a swi ri swisungunhu swinharhu, ni ku leha, swisungunhu swimbirhi; a yi ri ni tinhla; matsheve ya yona a ma ri mapulangi eku leheni hinkwako ka yona. Kutani a ku eka mina: “Leri tafula ri le mahlweni ka Yehovha.”

²³Tempele a yi ri ni nyangwa ya yona, ni xikwetsimisiso a xi ri ni nyangwa ya xona.

²⁴Tinyangwa a ti ri ni timbanti timbirhi. Timbanti a ti petsiwa hi le xikarhi, hi leswi rivanti rin'wana ni rin'wana ri nga ni mapulangi mambirhi.

²⁵Etimbantini teto ta tempele a ku endliwile tikerubu ni mahanga ku fana ni leswi endliweke emakhumbini. Kutani xisirhelo xa mapulangi a xi akiwile ehandle emahlweni ka rikupakupa.

²⁶Kambe a ku ri ni mafasitere yo hambanyisiwa hi tinhi, ni mahanga haleno ni hala emahlweni ka rikupakupa, ni le makamareni ya le matlhelo ya yindlu, swin'we ni swisirhelo.