Read tsonga Ezekiyele 44 Bible Online

Ezekiyele 44 - tsonga bible

Ezekiyele 44

¹Kutani a tlhela a ndzi tisa ekusuhi ni nyangwa ya vukwetsimelo leyi lavanaka ni tlhelo ra vuxa; kambe yi pfariwile.

²Kutani Yehovha a ku eka mina: “Nyangwa leyi, yi ta tshama yi pfariwile; yi nga ka yi nga pfuriwi, a ku na munhu la nga ta nghena ha yona, hikuva Yehovha, Xikwembu xa Israele u nghenile ha yona; yi ta tshama yi pfariwile hakona.

³Loko yi ri hosi, yona hosi, yi ta tshama kona ku dyela vuswa kona emahlweni ka Yehovha; yi ta nghena hi ndlela ya rikupakupa ra nyangwa, yi ta tlhela yi huma hi ndlela yoleyo.”

⁴Kutani a ndzi nghenisa emahlweni ka yindlu, hi nyangwa ya tlhelo ra n'walungu, Ndzi languta, kutani ndzi vona ku kwetsima ka Yehovha ku tatile yindlu ya Yehovha; ndzi wela ehansi hi mombo wa mina.

⁵Kutani Yehovha a ku eka mina: “N'wana wa munhu xiyisisa, u vona hi mahlo ya wena, u yingisela hi tindleve ta wena hinkwaswo leswi ndzi ku byelaka swona swa milawu ya yindlu ya Yehovha, ni swa ku lerisa ka yona hinkwako; u xiya swinene leswi nghenaka endlwini ya Yehovha hi tinyangwa hinkwato ta vukwetsimelo.

⁶Kutani u byela vatiarisi valavo va yindlu ya Israele, u ku: Hosi Yehovha u ri: Manyala hinkwawo ya n'wina ma ringene, yindlu ya Israele,

⁷lawa mi nga nghenisa ha wona vamatiko lava va makhuna etimbilwini, ni le nyameni, evukwetsimelweni bya mina, va tshama eka byona ku nyamisa yindlu ya mina, loko mi humesa vuswa bya mina, ni mafurha, ni ngati; hi sweswo va tlurile ntwanano wa mina hikwalaho ka manyala hinkwawo ya n'wina.

⁸A mi hlayisanga swilo swa mina leswi kwetsimaka leswi ndzi nga swi veka emavokweni ya n'wina, mi veka vamatiko lava ku va endla valanguteri va vukwetsimelo bya mina, mi ta tipfuna ha vona.

⁹Loko swi ri tano, Hosi Yehovha u ri: A ku na n'wana wa vamatiko, loyi a nga khuna embilwini ni le nyameni, la nga nghenaka evukwetsin'weni bya mina; ndzi vula sweswo eka vana va matiko lava va tshamaka exikarhi ka vana va Israele.

¹⁰“Swi tsandza ni Valevhi va ndzi fularheleke siku Vaisraele va hambukaka va hambuka ku ya landzela swikwembu swa vona swa tingana, va ta rhwala ku homboloka ka vona.

¹¹Evukwetsin'weni bya mina, va ta endla valanguteri va tinyangwa ta yindlu ya mina, va endla ntirho wa yindlu. Hi vona va nga ta tlhavela tiko timhamba ta tiholokosta ni ta magandzelo, va ta yima emahlweni ka tiko va ri tirhela.

¹²Leswi va ri tirheleke emahlweni ka swikwembu swa rona swa tingana, va khunguvanyisa yindlu ya Israele eku hombolokeni; hikwalaho ndzi nga va yimisela voko ra mina ra xinene, ku vula Hosi Yehovha, ndzi hlambanya, ndzi ku: Va ta rhwala ku homboloka ka vona.

¹³Va nga ka va nga tshineleli emahlweni ka mina ku tirha swa vuprista bya mina, hambi ku tshinelela swilo swa mina swo kwetsima evukwetsimisweni: kambe va ta rhwala milandzu ya swisandzu swa vona, ni hakelo ya manyala ya vona, lawa va ma endleke.

¹⁴Ndzi ta va veka valanguteri va yindlu ku tirha ntirho hinkwawo wa yindlu, ni hinkwaswo leswi fanelaka ku tirhiwa kona.

¹⁵“Loko va ri vaprista va Valevhi, vana va Sadoki, lava hlayiseke milawu ya vukwetsimelo bya mina, loko vana va Israele va ndzi hambukele, vona va ta tshinelela emahlweni ka mina ku tirha ntirho wa mina, va ta yima emahlweni ka mina, va ndzi humesela mafurha, ni ngati, ku vula Hosi Yehovha.

¹⁶Vona, va ta nghena evukwetsimisweni bya mina, va tshinelela tafula ra mina ku ndzi tirhela, va ta hlayisa milawu ya mina.

¹⁷“Kutakuloko va nghena hi tinyangwa ta rivala ra le xikarhi, va ta ambala swiambalo swa ntsembyana: va nga ambali voya loko va tirha etinyangweni ta le rivaleni ra le xikarhi ni le ndlwini.

¹⁸Va ta vehela swihuku swa ntsembyana etinhlokweni ta vona, va vehela maburuku ya ntsembyana eswisutini swa vona; va nga tshuki va tikhama hi leswi nyukisaka.

¹⁹Kutakuloko va humela erivaleni ra le handle va ya hlangana ni tiko, va ta susa tinguvu ta vona leti va tirhaka ha tona, va ti veka emakamareni ya vukwetsimelo, va ambala tin'wana leswaku va nga tshuki va tisa swo kwetsima kusuhi ni tiko.

²⁰Va nga tshuki va byewula tinhloko ta vona, na kona va nga undli misisi ya vona; va to yi tsemeta ntsena.

²¹A ku na muprista la nga ta nwa vhinyo loko a nghena erivaleni ra le xikarhi.

²²Va nga teki noni, kumbe nsati la tshikiweke, va ta teka ntsena va vanhwana va rixaka ra yindlu ya Israele; noni leyi nga noni ya muprista, va nga teka.

²³Va ta dyondzisa tiko ra mina ku avanyisa swo kwetsima ni leswi nga kwetsimiki, va va tsundzuxa ku hlawula leswi nga tengangiki ni leswi tengeke.

²⁴Va ta yima va avanyisa timhaka; va ta avanyisa hi ku avanyisa ka mina; va ta hlayisa milawu ya mina ni ku lerisa ka mina emikhubyeni ya mina hinkwayo, va kwetsimisa Tisavata ta mina.

²⁵Muprista, hambi a ri un'we, a nga tshineleli ntsumbu, a nga ti nyama; hambiloko wu ri wa tata wa yena ni mana wa yena, ni n'wana wa wanuna kumbe wa wansati, ni makwavo wa xisati la kalaka nuna, a nga tinyamisa ha wona.

²⁶Kutakuloko a hlambile a ha ta hlayeriwa masiku ya ntlhanu na mambirhi.

²⁷Hi siku rero a nga ta nghena evukwetsimelweni, erivaleni ra le xikarhi, ku tirha evukwetsin'weni, u ta tlhava magandzelo ya yena ya swidyoho, ku vula Hosi Yehovha.

²⁸“Va ta va ni ndzhaka; ndzhaka ya vona hi mina; mi nga va nyiki tiko eIsraeleni: tiko ra vona hi mina.

²⁹Va ta dya timhamba, ni magandzelo ya swidyoho, ni ya milandzu; kutani swilo hinkwaswo leswi yirisiweke eIsraeleni swi ta va swa vona.

³⁰Swirhangana swa mihandzu ya tinxaka hinkwato ni mihlengo hinkwayo ya hinkwaswo leswi mi avelaka Xikwembu, swi ta va swa vaprista; mi ta nyika vaprista na swona swirhangana swa mapa ya n'wina, leswaku mi tisa mikateko etindlwini ta n'wina.

³¹Vaprista va nga dyi nyama ya ku fa, hambi swi ri leswi handzuriweke, swa nyanyana, kumbe xiharhi.