Read tsonga Ezekiyele 45 Bible Online

Ezekiyele 45 - tsonga bible

Ezekiyele 45

¹“Kutakuloko mi avelana tiko hi ximhondzwana, mi ta pambulela Yehovha kun'wana, xivandla lexo kwetsima, xa swisungunhu swa 25 000 hi ku leha, ni ku anama ka swisungunhu swa 10 000; xi ta kwetsima emindzilekaneni hinkwayo ya xona.

²Vukwetsimelo byi ta pambuleriwa xivandla xa swisungunhu swa madzana ya ntlhanu hi ku leha, ni swa madzana ya ntlhanu hi ku anama, xa mune wa matlhelo lama ringanaka; xivandla xa ku anama ka swisungunhu swa ntlhanu wa makume xi ta xi rhendzela hinkwako.

³Endhawini yoleyo yo pimiwa u ta pima ku leha ka swisungunhu swa 25 000 ni ku anama ka swisungunhu swa 10 000; exivandleni xo lexo ku ta yima vukwetsimelo bya ku kwetsima.

⁴Ku pambula loku ka tiko loku kwetsimaka, ku ta va ka vaprista lava tirhaka mitirho ya vukwetsimelo, lava tshinelelaka ku tirhela Yehovha; yi ta va ndhawu ya tindlu ta vona ni xivandla xo hlawuriwa xa ku aka vukwetsimelo.

⁵“Swisungunhu swa 25 000 eku leheni, ni swa 10 000 eku anameni, xi ta va xa Valevhi lava nga ta endla mitirho ya yindlu, va ta kuma kona makamara ya makume mambirhi.

⁶Loko wu ri muti, wu ta averiwa xivandla xa ku anama ka swisungunhu swa 5 000, ni ku leha ka swisungunhu swa 25 000, ku ta lulama ni tiko leri averiweke vukwetsimelo. Xi ta va xa yindlu hinkwayo ya Israele.

⁷“Loko yi ri hosi, mi ta yi pambulela tiko hi matlhelo mambirhi ya xivandla xo kwetsima lexi pimiweke, ni ya xivandla xa muti, ku lavana ni xivandla xo kwetsima ni xivandla xa muti; hi le vupeladyambyini ku lavana ni vupeladyambu, ni le vuxeni ku lavana ni vuxa; ku va ku leha loku ringanaka ni xivandla xin'we xa kona, ku suka endzilakaneni wa vupeladyambu ku ya fika endzilakaneni wa vuxa.

⁸Ri ta va rona tiko ra yona, ni rifuwo ra yona eIsraeleni; kutani tihosi ta mina ti nga ka ti nga ha karhati tiko ra mina, va ta nyika yindlu ya Israele tiko hi ku ya hi tinxaka ta vona.

⁹Hosi Yehovha u ri: Oho tihosi ta Israele, swi ringene! Tshikani ku leva ni ku phanga, endlani hi nawu ni ku lulama mi nga tshami mi xanisa tiko ra mina, ku vula Hosi Yehovha.

¹⁰“Mi va ni mpimo wa xikalo xo lulama, ni mpimo wa efa yo lulama, ni bati yo lulama.

¹¹Efa ni bati wu va mpimo wun'we, leswaku bati yi ta ringana ni mpimo wa vukhume wa homere; efa, yona, yi ringana ni mpimo wa vukhume wa homere: Mpimo wa swona wu ta pimiwa hi yona homere.

¹²Loko yi ri xikele, yi ringana ni tigera ta makume mambirhi. Eka n'wina, mina yi ta va ya tixikele ta makume mambirhi, ni tixikele ta makume mambirhi na ntlhanu, ni tixikele ta khume na ntlhanu.

¹³“Hi wona nhlengo lowu mi nga ta wu pambula: Wu ta va mpambulo wa vuntlhanu na wun'we wa efa hi homere yin'we ya koro, ni mpambulo wa vuntlhanu na wun'we wa efa hi homere yin'we ya barley.

¹⁴Milawu ya mafurha hi leyi: swa vukhume swa bati ya mafurha hi koro, leyi ringanaka ni homere ya tibati ta khume (hikuva homere yin'we yi endla khume ra tibati).

¹⁵Eka tinyimpfu ku ta humesiwa yin'we eka madzana mambirhi ta le madyelweni leyo nona ya Israele, ku endla mhamba ni tiholokosta ni magandzelo yo khensa, ku ta tilavela nkateko wa vona, ku vula Hosi Yehovha.

¹⁶Tiko hinkwaro ri ta fanela ku humesela hosi ya Israele nhlengo wolowo.

¹⁷Loko yi ri hosi, hi yona yi nga ta lavela mikhuvo, ni n'weti loko wu vonaka, ni Tisavata, tiholokosta, ni timhamba, ni leswi cheleriwaka Yehovha. Emikhubyeni hinkwayo ya yindlu ya Israele, hi yona yi nga ta humesa magandzelo ya swidyoho, ni mhamba, ni holokosta, ni magandzelo ya mikhenso, ku lavela yindlu ya Israele nkateko ha swona.

¹⁸“Hosi Yehovha u ri: Hi n'hweti yo rhanga, hi siku ro rhanga ra n'hweti, u ta teka nkuzana, leyi nga riki na xivati; ha yona u ta susa nandzu wa vukwetsimelo.

¹⁹Muprista u ta teka ngati ya mhamba ya xidyoho, a tota ha yona marimba ya yindlu, ni tinhla ta mune ta mapulangi ya alitari, ni marimba ya nyangwa ya le xikarhi.

²⁰U ta tlhela u endla sweswo hi siku ra ntlhanu na mambirhi ra n'hweti, hikwalaho ka la hoxeke ni hikwalaho ka swiphukuphuku, mi ta lavela yindlu ku kateka kwalaho.

²¹“Hi n'hweti yo rhanga, hi siku ra khume na mune ra n'hweti, mi ta va ni Paseka, nkhuvo wa masiku ya ntlhanu na mambirhi. Ku ta dyiwa swinkwa swo kala comela.

²²Siku rolero hosi yi ta titlhavela ni ku tlhavela tiko hinkwaro nkunzi, ma va magandzelo ya vudyoho.

²³Kambe hi masiku ya ntlhanu na mambirhi ya nkhuvo, yi ta tlhavela Yehovha holokosta ya tinkunzi ta ntlhanu na timbirhi, ni makhuna ya ntlhanu na mambirhi lama kalaka xivati, hi siku rin'wana ni rin'wana, eka masiku ya ntlhanu na mambirhi, kambe yi ta tlhava xiphongo hi siku rin'wana ni rin'wana, yi va mhamba ya xidyoho.

²⁴Yi ta neha efa ya mapa hi nkunzi yin'wana ni yin'wana, ni efa hi khuna rin'wana ni rin'wana; swin'we ni hino yin'we ya mafurha hi efa yin'wana ni yin'wana.

²⁵“Hi n'hweti ya ntlhanu na timbirhi, hi siku ra khume na ntlhanu ra nkhuvo, yi ta tlhava hi masiku ya ntlhanu na mambirhi magandzelo man'we ya swidyoho, ni tiholokosta tin'we, ni timhamba tin'we, ni mafurha lama ringanaka.