Read tsonga Ezekiyele 47 Bible Online

Ezekiyele 47 - tsonga bible

Ezekiyele 47

¹Kutani a ndzi tlherisela enyangweni ya yindlu; kutani vonani! Mati a ma huma hi le hansi ka vukhandziyo bya nyangwa ya yindlu, hitlhelo ra vuxa; mati a ma xika le tlhelweni ra xinene ra yindlu, edzongeni ra alitari.

²A ndzi humesa ehandle hi ndlela ya nyangwa ya n'walungu, a ndzi fambisa ku rhendzeleka yindlu hi ndlela ya le handle ku ya fika enyangweni ya le handle, ku languta tlhelo ra vuxa; kutani vonani! Mati a ma khuluka, ma huma exineneni.

³Kuteloko wanuna yeloyi a humile hitlhelo ra vuxa â€” a a ri ni nghole evokweni ra yena â€” a pima khume ra madzana ya swisungunhu, a ndzi perisa mati: mati walawo a ma fika emahlakaleni ya milenge.

⁴A tlhela a pima swisungunhu swa khume ra madzana, a ndzi perisa mati: a ma fika ematsolweni. A tlhela a pima swisungunhu swa khume ra madzana, a ndzi perisa kona: Mati a ma fika exisutini.

⁵A tlhela a pima swisungunhu swa khume ra madzana: A wu ri nambu lowu ndzi hlulekaka ni ku pela, hikuva mati a ma tele; ma ri mati lama periwaka hi ku hlambela; nambu lowu nga periwiki.

⁶Kutani a ku eka mina: “Xana u swi vonile, n'wana wa munhu?” Kutani a ndzi fambisa, a ndzi tlherisela eribuwini ra nambu.

⁷Loko ndzi languta ndzhaku, ndzi vona eribuwini ra nambu mirhi yo talatala ntlhandluko wa haleno, ni ntlhandluko wa hase.

⁸A ku eka mina: “Mati walawo ma tiyela ematlhelo ya le vuxeni, ma ta xikela erivaleni, ma ya nghena elwandle; kutakuloko ma halakele elwandle, mati ya lwandle ma ta ntsantsuka, ma va lamanene.

⁹Kutani swivumbiwa swin'wana ni swin'wana leswi andzeke swi ta hanya hinkwako laha ku nga ta fika milambu leyimbirhi, tinhlampfi, tona, ti ta tala; hikuva mati walawo ma ta ko ma fika kona, elwandle ri ta ntsantsuka leswi nga ta kumiwa hi nambu swi ta hanya.

¹⁰Vaphasi va tinhlampfi va ta yima kona eribuwini ra lwandle lero; ku suka eEni-Gedi, ku yisa eEni-Gilayimi, hilaha va nga ta andlala tinkoka. Tinhlampfi ta tinxakaxaka ti ta kotisa ta Lwandle Lerikulu, ti ta va leto tala ngopfu.

¹¹Loko ma ri mativa ni tinhlanga ta kona laha mati ma nga ka ma nga ntsantsuki, va ta kuma munyu kona.

¹²Kutani eribuwini ra xinambyana, entsungeni wa haleno, ni le ntsungeni wa hase, ku ta mila mirhi hinkwayo ya mihandzu; matluka ya yona ma nga ka ma nga vuni, mihandzu ya yona yi nga ka yi nga heri. Yi ta vupfa hi tin'hweti hinkwato, hikuva mati ya nambu hi lama pfelelaka evukwetsimelweni; mihandzu ya yona yi ta va swakudya, matluka ya yona wu ta va murhi.”

¹³Hosi Yehovha u ri: “Nkova wu ta va ndzilakana wa misava leyi yi nga ta averiwa eka tinxaka ta khume na timbirhi ta Israele. Yena Yosefa u ta averiwa matiko mambirhi.

¹⁴Hinkwenu mi ta nyikiwa ku averiwa kun'we ka tiko leri ndzi yimiseleke vatata wa n'wina voko ra mina, ndzi ku: Ndzi ta va nyika rona, tiko rolero mi ta avelana, yi va ndzhaka ya n'wina.

¹⁵Ndzilakana wa tiko rolero hi lowo: Hi tlhelo ra n'walungu, ndzilakana wu ta suka eLwandle Lerikulu ku famba hi ndlela ya Hetiloni, ni ku ya Sedada;

¹⁶tiko ra Hamata, Beroto na Sibirayimi, exikarhi ka ndzilakana wa Damaska ni ndzilakana wa Hamata; ku nga Hasari-Hatikoni endzilakaneni wa Hawurana.

¹⁷Ndzilakana ku ya fika elwandle, hi lowo, Hasari-Enana, ni ndzilakana wa Damaska lowu kongomaka en'walungwini, ni ndzilakana wa Hamata. Hi lowo ndzilakana tlhelo ra n'walungu.

¹⁸“Le vuxeni, ndzilakana wu ta suka exikarhi ka Hawurana na Damaska, wu ta famba exikarhi ka Giliyadi ni tiko ra Israele, hi yena Yordani. Mi ta pima ku suka endzilakaneni wa n'walungu ku fika elwandle ra vuxa. Hi wona ndzilakana wa tlhelo ra vuxa.

¹⁹“Tlhelo ra dzonga ri ta languta tlhelo ra le hansi, ku sukela eTamari ku yisa ematini ya Meriba wa Kadexe ri ta famba hi xinambyana lexi chelaka eLwandle Lerikulu. Hi wona ndzilakana wa dzonga, hitlhelo ra le hansi.

²⁰“Tlhelo ra vupeladyambu hi rona Lwandle Lerikulu ku suka kona ku lavana ni ndlela ya ku nghena le Hamata. Hi wolowo ndzilakana hitlhelo ra vupeladyambu.

²¹“Mi ta pambulelana tiko, mi ya hi tinyimba ta Israele.

²²Mi ta avelana tiko hi vuhlolotwana exikarhi ka n'wina ni vamatiko lava akeke exikarhi ka n'wina, va nga vamatiko lava velekeke vana exikarhi ka n'wina. Eka n'wina va ta kotisa va khale ka vana va Israele va ta averiwa ndzhaka ya vona exikarhi ka tinyimba ta Israele swin'we na n'wina.

²³Enyimbeni leyi munhu wa matiko a akeke eka yona, mi ta n'wi nyika ndzhaka ya yena kona: Ku vula Hosi Yehovha.