Read tsonga Ezekiyele 48 Bible Online

Ezekiyele 48 - tsonga bible

Ezekiyele 48

¹“Mavito ya tinxaka hi lawa: Ku suka emakumu ka tlhelo ra n'walungu, ku famba hi ndlela ya Hetiloni ku ya etlhelo ra Hamata ku fika le Hasari-Enana (ndzilakana wa Damaska, ni le tlhelo ra n'walungu ku landza ndzilakana wa Hamata), va ta va ni ndzhaka leyi: Ku suka endzilakaneni wolowo, ku fika endzilakaneni wa vupeladyambu, i ka Dani, tiko rin'we.

²Endzilakaneni wa Dani, ku suka evuxeni ku fika evupeladyambu: I ka Asere, xipandzwa xin'we.

³Endzilakaneni wa Asere, ku suka evuxeni ku fika evupeladyambu: I ka Neftali, xipandzwa xin'we.

⁴Endzilakaneni wa Neftali, ku suka evuxeni ku fika evupeladyambu: I ka Manase, xipandzwa xin'we.

⁵Endzilakaneni wa Manase, ku suka evuxeni ku fika evupeladyambu: I ka Efrayimi, xipandzwa xin'we.

⁶Endzilakaneni wa Efrayimi ku sukela evuxeni ku fika evupeladyambu: I ka Rhuveni, xipandzwa xin'we.

⁷Endzilakaneni wa Rhuveni, ku suka evuxeni ku fika evupeladyambu: I ka Yuda, swipandzwa xin'we.

⁸“Endzilakaneni wa Yuda, ku suka evuxeni ku fika evupeladyambu, hilaha ku nga ta va xipandzwa lexi mi nga ta avela Yehovha, ra ku anama ka swisungunhu swa 25 000 ni ku leha ku ringana ni matiko man'wana, ku suka evuxeni ku fika evupeladyambu; vukwetsimiso byi ta va kona exikarhi ka rona.

⁹Tiko leri mi nga ta avela Yehovha ku leha ku ta va swisungunhu swa 25 000, ni ku anama ka 10 000.

¹⁰Ku avela loku, ku ta va ka vaprista; tlhelo ra n'walungu swisungunhu swa 25 000; hitlhelo ra vupeladyambu ku anama ka 10 000; tlhelo ra le vuxeni, na kona, ku anama ka 10 000 edzongeni ku va ku leha ka swisungunhu swa 25 000. Hilaha vukwetsimo bya Yehovha byi nga ta va kona;

¹¹ku ta va ka vaprista, vana va Sadoki, lava nga hlayisa lexi ndzi nga xi vekela eka vona, lava nga hambukangiki siku vana va Israele va hambukeke, ni siku Valevhi, na vona, va hambukeke.

¹²Ku ta va kona ku averiwa ka vona etikweni leri averiweke Yehovha, ri ta va leri kwetsimisiweke, endzilakaneni wa Valevhi.

¹³Loko va ri Valevhi vona, va ta va ni tiko leri lavanaka ni tiko leri averiweke vaprista ku leha ka swisungunhu swa 25 000 ni ku anama ka 10 000: ku leha hinkwako ku ta va ka swisungunhu swa 25 000; ku anama hinkwako ka 10 000.

¹⁴Va nga tshuki va xavisa nchumu wa rona, va nga lombani: Ku nga tshuki ku yisiwa kun'wana swirhangana swa tiko leri, hikuva hi leswi hlawuleriweke Yehovha.

¹⁵“Loko swi ri swisungunhu swa 5 000 leswi seleke eku anameni, swi lavana ni swa 25 000 xi ta va xivandla lexi nga kwetsimiki xa ku aka muti, hambi ti ri tindlu, hambi swimitana; muti wu ta va exikarhi ka tiko rolero.

¹⁶Mpimo wa muti wolowo hi lowu: Tlhelo ra n'walungu, swi ta va swisungunhu swa 4 500; tlhelo ra dzonga, swisungunhu swa 4 500; tlhelo ra le vuxeni swisungunhu swa 4 500; tlhelo ra vupeladyambu, swisungunhu swa 4 500.

¹⁷Muti wu ta engeteriwa hi swisungunhu swa 250 tlhelo ra n'walungu; tlhelo ra dzonga kambe, swisungunhu swa 250; tlhelo ra vuxa swisungunhu swa 250; tlhelo ra le vupeladyambu, swisungunhu swa 250.

¹⁸Leswi nga ta sala eku leheni, swi lavana ni ku averiwa ka ku kwetsima, swi nga swisungunhu swa 10 000 tlhelo ra vuxa, ni swisungunhu swa 10 000 tlhelo ra vupeladyambu, swi lavana ni ku averiwa ka ku kwetsima, swakudya swa kona swi ta va swakudya swa vatirhi va muti.

¹⁹Vatirhi va muti lava nga ta rima kona va ta huma etinxakeni hinkwato ta Israele.

²⁰“Xivandla hinkwaxo lexi averiweke xi ta va xa ku leha ka swisungunhu swa 25 000, ni ku anama ka swisungunhu swa 25 000; kutani mi ta pambulela muti xivandla lexi ringanaka ni ti ku avanyisiwa ka vumune ka xivandla xolexo xo kwetsima.

²¹“Laha ku seleke ku ta va ka hosi haleno ni hala ka xivandla xo kwetsima, ni ka tiko leri fumiweke hi muti, ku sukela swisungunhu swa 25 000 swa tiko leri averiweke Yehovha ku ya fika endzilakaneni wa le vuxeni; na kona, le vupeladyambu, ku sukela swisungunhu swa 25 000 ku ya fikela endzilakaneni wa vupeladyambu, ku lavana ni leswi averiweke, swi ta va swa hosi; ku averiwa loku kwetsimeke xin'we ni vukwetsimiso bya yindlu, swi ta va exikarhi ka tiko.

²²Hi sweswo, loko ku tshikiwa tiko leri fumiweke hi Valevhi, ni leri fumiwaka hi muti, ri nga exikarhi ka tiko ra hosi, xivandla hinkwaxo, ku suka endzilakaneni wa Yuda ku ya fika endzilakaneni wa Benjamini, xi ta va xa hosi.

²³“Tin'wana tinxaka hi leti: Ku suka evuxeni ku ya fika evupeladyambu: Hi yena Benjamini, xipandzwa xin'we.

²⁴Endzilakaneni wa Benjamini, ku suka evuxeni ku fika evupeladyambu: i ka Simiyoni, xipandzwa xin'we.

²⁵Endzilakaneni wa Simiyoni, ku suka evuxeni ku yisa evupeladyambu: i ka Isakara, xipandzwa xin'we.

²⁶Endzilakaneni wa Isakara, ku suka evuxeni ku fika evupeladyambu: i ka Zebuloni, xipandzwa xin'we.

²⁷Endzilakaneni wa Zebuloni, ku suka evuxeni ku yisa evupeladyambu: i ka Gadi, xipandzwa xin'we.

²⁸Endzilakaneni wa Gadi, tlhelo ra dzonga, ndzilakana wu ta kongoma ehansi; ku suka eTamari, ku ya fika ematini ya Meriba-Kadexe ni le nambyeni, wu ta ya fikela eLwandle Lerikulu.

²⁹Hi rolero tiko leri mi nga ta ri avanyisa hi vuhlolotwana, leswaku yi va ndzhaka ya tinxaka ta Israele; hi swoleswo swipandzwa swa tona, ku vula Hosi Yehovha.

³⁰“Timharana ta muti hi toleti: hitlhelo ra n'walungu, mpimo, wona, i wa swisungunhu swa 4 500

³¹(tinyangwa ta muti ti ta thyiwa mavito ya tinxaka ta Israele); hitlhelo ra n'walungu, ku ni tinyangwa tinharhu; yin'wana i ya ka Rhuveni, yin'wana ya ka Yuda yin'wana ya ka Levhi.

³²Hi tlhelo ra le vuxeni, mpimo hi wa swisungunhu swa 4 500; kona ku ni tinyangwa tinharhu; yin'wana i ya ka Yosefa, yin'wana ya ka Benjamini, yin'wana ya ka Dani.

³³Hi tlhelo ra dzonga, mpimo i wa swisungunhu swa 4 500; kona ku ni tinyangwa tinharhu; yin'wana i ya ka Simiyoni, yin'wana i ya ka Isakara, yin'wana i ya ka Zebuloni.

³⁴Hi tlhelo ra vupeladyambu, mpimo i wa swisungunhu swa 4 500; kona ku ni tinyangwa tinharhu; yin'wana i ya ka Gadi, yin'wana i ya ka Asere, yin'wana i ya ka Neftali.

³⁵Loko ku tingiwa, va pima swisungunhu swa 18 000. Ku suka siku rolero, vito ra muti va ta ku: ‘Yehovha u kona la.’ ”