Read tsonga Ezekiyele 5 Bible Online

Ezekiyele 5 - tsonga bible

Ezekiyele 5

¹“Wena, n'wana wa munhu, teka nsimbhi ya ku kariha, ri nga rikari ra mubyewuri, u byewula nhloko ya wena ni malebvu ya wena, teka ni xikalo xa ku pima, u avanyisa misisi.

²U ta hisa ku avanyisa ka vunharhu hi ndzilo exikarhi ka muti, loko masiku ya ku hlaseriwa ka muti ma ta va ma herile; u vuya u teka ku avanyisa ka vunharhu kun'wana, u ku tsemelela hi rikari ematlhelweni ya muti, kutani ku avanyisa ka vunharhu loku seleke, u ta ku cukumeta ku hahisiwa hi moya; kutani ndzi ta swi hlongorisa hi tlhari.

³U ta teka kambe misisi yin'wana, u yi phutsela engubyeni ya wena.

⁴U engeta u pambula eka swona, u swi hoxa exikarhi ka ndzilo u swi hisa, kwalaho ku ta huma ndzilo lowu nga ta hisa yindlu hinkwayo ya Israele.”

⁵Ku vula Hosi Yehovha: Hi loyi Yerusalema! Ndzi n'wi veke exikarhi ka matiko, ma n'wi rhendzele.

⁶Kambe wu hombolokile, wu tlurile ku lerisa ka mina ku tlurisa matiko, ni milawu ya mina ku tlurisa matiko lama n'wi rhendzeleke, hikuva wu cukumetile swileriso swa mina, a nga fambanga hi milawu ya mina.

⁷Hikwalaho, Hosi Yehovha a ku: Leswi mi dyoheke ku tlula matiko lama mi rhendzeleke, a mi fambanga hi milawu ya mina, hambi ku ri ku hlayisa ku lerisa ka mina; a mi endlanga hi ku lerisa ka matiko lama mi rhendzeleke,

⁸hikwalaho, Hosi Yehovha a ku: “Ndza ku holovela; ndzi ta hetisa ku avanyisa ka mina exikarhi ka wena emahlweni ka matiko.

⁹Hikwalaho ka manyala hinkwawo ya wena, ndzi ta ku endla lexi ndzi nga siki xi endla ni lexi ndzi nga taka ndzi nga ha xi endli kambe.

¹⁰Vona, vatatana va ta dya vana va vona exikarhi ka n'wina, ni vana va ta dya vatata wa vona; ndzi ta hetisa exikarhi ka vona ku avanyisa ka mina, ndzi hangalasa hi matlhelo hinkwawo leswi nga ta sala swa wena.

¹¹Hikwalaho ndza hanya, ku vula Hosi Yehovha, hikuva u nyamisile yindlu ya mina hi swilo hinkwaswo swo biha swa wena, ni manyala hinkwawo ya wena, na mina ndzi ta ku onha, tihlo ra mina ri ta leva, ndzi nga ka ndzi nga ku tweli vusiwana.

¹²Ku avanyisa ka vunharhu ka vaaki va n'wina ku ta lova hi ntungu ni ndlala; ni ku avanyisa kun'wana ka vunharhu ku ta lova hi tlhari ekusuhi na wena, kutani ku avanyisa ka vunharhu kun'wana, ndzi ta ku hangalasa hi matlhelo hinkwawo, ndzi va hlongorisa hi tlhari.

¹³“Vukari bya mina byi ta va pfurhela hi ku hetiseka. Ndzi ta tirihisela, va ta tiva leswaku mina Yehovha, ndzi Xikwembu lexi nga ni rilondzo, loko ndzi va ndzi hetisela vukari bya mina ehenhla ka vona.

¹⁴Ndzi ta ku endla rhumbi, u va u soriwa exikarhi ka matiko emahlweni ka vanhu hinkwavo lava endzaka.

¹⁵U ta va xisolo ni xihlamariso emahlweni ka matiko lama ku rhendzeleke, siku ndzi ku humeselaka ku avanyisa ka mina hi vukari ni ku tshinya loku vavisaka. Hi mina Yehovha la vulaka timhaka teto.

¹⁶Va ta hlamala ni ku chava siku ndzi nga ta rhumela miseve leyo biha ya ndlala leyi lovisaka, leyi ndzi nga ta yi rhumela ku mi lovisa ha yona, hikuva ndzi ta engetela makhombo ya n'wina hi ndlala, ndzi mi tsonela timbuva ta vuswa.

¹⁷Ndzi ta mi rhumela swivandzana leswo biha, leswi nga ta mi dlayela vana va n'wina, ni ntungu, ni ngati, ku ta mi hetisa, ndzi va ndzi rhumela tlhari ehenhla ka wena. Hi mina Yehovha ndzi vulavulaka sweswo.”