Read tsonga Ezekiyele 8 Bible Online

Ezekiyele 8 - tsonga bible

Ezekiyele 8

¹Hi lembe ra vuntlhanu na rin'we hi n'hweti ya vuntlhanu na yin'we, hi siku ra vuntlhanu ra n'hweti, a ndzi tshamisile endlwini ya mina, ni vakulukumba va Yuda va tshamile emahlweni ka mina, kutani voko ra Hosi, ri nga ra Yehovha, ri ndzi wele ehenhla.

²Ndzi languta, kutani ndzi vona xifaniso xa munhu lexi a xi fana ni ndzilo. Ku sukela exisutini xa yena ku ya ehansi, a xi fana ni ndzilo, ni ku sukela exisutini ku ya ehenhla a xi kwetsima ngopfu, ku fana ni koporo leyi vangamaka.

³A tshambuluta xilo lexi nga voko, xi ndzi khoma hi misisi, kutani moya wu ndzi tlakulela empfhukeni, enorhweni, wu ndzi tisela Yerusalema, enyangweni ya le ndzeni leyi langutaka en'walungwini, laha ku nga ni xitshamo xa xifaniso xa rilondzo lexi pfuxaka rilondzo.

⁴Kutani, vonani, ku kwetsima ka Xikwembu xa Israele a ku ri kona, a ku fana ni ku kwetsima loku ndzi ku voneke erivaleni.

⁵A ku eka mina: “N'wana wa munhu, tlakusa mahlo ya wena, u languta le n'walungwini.” Kutani ndzi tlakusa mahlo ya mina hitlhelo ra n'walungu, ndzi vona xifaniso xa rilondzo en'walungwini ya nyangwa ya alitari evunghenweni.

⁶A ku eka mina: “N'wana wa munhu, xana wa swi vona leswi va swi endlaka? Manyala lamakulu lawa yindlu ya Israele yi ma endlaka laha, leswaku ndzi suka evukwetsimelweni bya mina. Kambe u ta engeta u vona manyala man'wana lamakulu.”

⁷Kavaloko a ndzi yisa enyangweni ya xivava, kuteloko ndzi languta ndzi vona mbhovo ekhumbini.

⁸A engeta, a ku: “N'wana wa munhu, boxa khumbi.” Kuteloko ndzi boxile khumbi, vonani, a ku ri ni nyangwa.

⁹A engeta a ku eka mina: “Nghena, u vona manyala layo biha, lawa va ma endlaka kwala.”

¹⁰Kavaloko ndzi nghena, ndzi vona swifaniso leswo tala swa swikokovi ni swa swivandzana leswi yilaka, ni swa swikwembu hinkwaswo swa yindlu ya Israele, swi tsariwile emakhumbini ematlhelweni hinkwawo.

¹¹A ku yimile emahlweni ka swona vavanuna va 70 va ri vakulukumba va yindlu ya Israele; exikarhi ka vona a ku yimile Yaazaniya, n'wana Xafani, va yimile emahlweni ka swona un'wana ni un'wana a tamele mbita ya yena ya mirhi ya risuna, kutani musi wa mirhi ya risuna wu tlhandluka.

¹²Kutani a ku eka mina: “N'wana wa munhu, xana u swi vonile leswi vakulukumba va Israele va endlaka swona emunyameni, un'wana ni un'wana ekamareni ra yena ra swifaniso? Hikuva va ku: ‘Yehovha a nga hi voni, Yehovha u fularhele tiko leri.’ ”

¹³A engeta a ku eka mina: “U ta vona kambe manyala lamakulu, lawa va ma endlaka.”

¹⁴Kutani a ndzi yisa enyangweni ya yindlu ya Yehovha leyi langutaka en'walungwini, kutani maswivo, va vasati va tshamile kona, a va rilela Tamuzi.

¹⁵A ku eka mina: “Xana u swi vonile, n'wana wa munhu? U ta engeta u vona manyala lamakulu lama tlulaka lawa.”

¹⁶Kutani a ndzi yisa exivaveni xa le xikarhi ka yindlu ya Yehovha; kona ndzi vona enyangweni ya tempele ya Yehovha, exikarhi ka nyangwa ni alitari, vavanuna lava lavaka ku va 25 va yimile; mihlana ya vona yi langutene ni tempele ya Yehovha, kasi mimombo ya vona yi langutile evuxeni, a va gandzela dyambu tlhelo ra vuxa.

¹⁷A ku eka mina: “Xana u swi vonile, wena, n'wana wa munhu? Xana i xilo lexitsongo eka yindlu ya Yuda, manyala lawa va ma endlaka halenu? Va tatisa tiko hi vuhunguki bya vona, va nga tshiki ku ndzi pfuka hi byona. Vona, va tshineta rhavi etinhompfini ta vona!

¹⁸Loko ndzi ri mina, ndzi ta endla hi vukari bya mina; tihlo ra mina ri nga ka ri nga tsetseleri, ri ta pfumala tintswalo. Hambi va ta huwelela etindleveni ta mina hi rito lero tlakuka, ndzi nga ka ndzi nga va yingisi.”