Read tsonga Daniyele 4 Bible Online

Daniyele 4 - tsonga bible

Daniyele 4

¹Mina, hosi Nebukadnetsara, ndzi tsalela vanhu hinkwavo, ni matiko, ni va tindzimi hinkwato, lava akeke ematikweni hinkwawo, ndzi ri: Ku tsaka a ku mi talele!

²Ndzi kumile leswaku swi nga saseka loko ndzi mi tivisa swikombiso ni masingita lawa Xikwembu lexi nge henhlahenhla xi ma tirheke eka mina.

³Swikombiso swa xona, kasi swonghasi! Ni masingita ya xona ma ni matimba wonghasi! Vuhosi bya xona i vuhosi Lebyi nga heriki, ni ku fuma ka xona ku tshama etinxakeni leti nga heriki.

⁴Mina, Nebukadnetsara, a ndzi hanya hi ku tsaka endlwini ya mina, ndzi ri ni ku kateka endlwini ya mina ya vuhosi.

⁵Ndzi va ni norho lowu ndzi tshuketeke, kutani mianakanyo ya mina loko ndzi ri emasangwini ya mina, ni leswi ndzi swi voneke enhlokweni ya mina, swi ndzi rhurhumerisa.

⁶Ndzi kondza ndzi lerisa leswaku ku tisiwa emahlweni ka mina lava vutlhari hinkwavo va Babilona va ta ndzi funungulela norho wolowo.

⁷Kutani ku tisiwa lavo tlhariha ni vangoma, ni Vakalediya, ni va vun'anga bya tinyeleti; kutani ndzi va byela norho, kambe va hluleka ku ndzi hlavutela wona.

⁸Eku heleni, ku humelela Daniele emahlweni ka mina, la thyiweke Beltexatsara, ha vito ra xikwembu xa mina, yeloyi moya wa swikwembu leswi hlawuriweke wu nga eka yena, kutani ndzi n'wi byela norho, ndzi ku:

⁹“Wena Beltexatsara, n'wini wa lavo tlhariha, hikuva ndzi tiva leswaku moya wa swikwembu leswi hlawuriweke wu kona eka wena, ni leswaku a ku tsandziwi hi xihundla, hambi xi nga va xihi ni xihi, u ndzi hlamusela swivono leswi ndzi swi voneke enorhweni wa mina, ni nhlamuselo ya swona.

¹⁰“Kutani swivono leswi ndzi swi voneke emoyeni wa mina loko ndzi ri emasangwini ya mina, a swi ri leswi: A ndzi languta, kutani ndzi vona ku ri ni murhi lowu tlakukeke ngopfungopfu exikarhi ka misava.

¹¹Murhi lowu a wu kula, wu kuma matimba kutani xicapila xa wona xi fika etilweni, kutani a wu voniwa hi lava nga emakun'wini ya misava.

¹²Matluka ya wona a ma saseka ngopfu, ni mihandzu ya wona a yi tala, a wu ri ni swakudya leswi enetaka vanhu hinkwavo; swiharhi swa nhova a swi ta endzhutini wa wona; tinyanyana ta le tilweni ti aka emarhavini ya wona, kutani leswi hanyaka hinkwaswo swi kuma swakudya eka wona.

¹³Eku voneni ka moya wa mina, loko ndza ha ri vulawini bya mina, ndzi vona ku humelela un'wana wa valanguteri lava hlawuriweke a xika etilweni.

¹⁴A huwelela hi rito leri tlakukeke, a vulavula, a ku: ‘Tsemani murhi, mi khutulela marhavi ya wona; hundlani matluka ya wona mi hangalasa mihandzu ya wona; swiharhi swi tsutsuma swi tshuka endzhutini wa wona, ni tinyanyana ta le tilweni emarhavini ya wona.

¹⁵Hambiswiritano, mi siya xikundzu ni timitsu ta wona emisaveni, ntsena wu kulekiwa hi timpecana ta nsimbhi ni ta koporo exikarhi ka byanyi bya nhova, wu tsakamisiwa hi mberha ya le tilweni, wu avanyiseriwa byanyi bya nhova swin'we ni swiharhi.

¹⁶Mbilu ya wona yi nga ha tshuki yi va ya munhu, kambe yi hundzuka mbilu ya vuharhi; a ku hundze mikarhi ya ntlhanu na mimbirhi ehenhla ka wona.

¹⁷Ku avanyisa kuloko ku huma emakungwini ya valanguteri mhaka yoleyi yi lerisiwile hi vahlawuriwa, leswaku lava hanyaka va tiva leswaku La nge henhlahenhla u ni ku fuma ehenhla ka vuhosi bya vanhu, ni leswaku u byi nyika loyi a rhandzaka ku n'wi nyika byona, ni leswaku a nga tlakusela eka byona la hundzisaka hi vutsongo.’

¹⁸“Hi wolowo norho ndzi wu lorheke, mina hosi Nebukadnetsara, kutani wena, Beltexatsara, u ndzi byela nhlamuselo ya wona, leswi tintlhari hinkwato ta ku fuma ka mina ti hlulekeke ku ndzi tivisa yona; kambe wena u nga swi tiva, hikuva moya wa swikwembu leswi hlawuriweke wu le ka wena.”

¹⁹Kutani Daniele, vito ra yena a nga Beltexatsara, a sala a kayakayeka hi nkarhi, a pfulunganyiwa hi mianakanyo ya yena. Hosi yi tlhela yi vulavula, yi ku: “Beltexatsara, norho ni nhlamuselo ya wona swi nga tshuki swi ku pfulunganya.” Beltexatsara a hlamula, a ku: “Hosi yanga, norho lowu, a wu humeleli eka lava ku vengaka, ni nhlamuselo ya wona eka lava lwaka na wena!

²⁰Murhi lowu u wu voneke wu mila, wu kuma matimba, lowu xicapila xa wona xi fikaka etilweni, lowu voniwaka hi va misava hinkwayo;

²¹lowu matluka ya wona ma sasekeke, ni mihandzu ya wona yi teleke, lowu hinkwavo va kumaka swakudya eka wona, lowu endlelaka swiharhi swa nhova ndzhuti, ni tinyanyana ta le tilweni ti akelaka emarhavini ya wona,

²²wu ringanisa wena, hosi, wena u nga kula u kuma matimba, wena loyi vukulu bya wena byi kuleke byi fika etilweni, ni ku fuma ka wena ku naveke ku yisa emakumu ka misava.

²³Leswi u nga vona un'wana wa valanguteri, wa vahlawuriwa, a xika etilweni, a ku: ‘Wisani murhi, mi wu onha; ntsena mi siya xikundzu ni timitsu emisaveni, xi kulekiwa hi timpecana ta nsimbhi ni ta koporo, xi va exikarhi ka byanyi bya nhova, xi ko xi tsakamisiwa hi mberha ya le tilweni, kutani xi va ni ku averiwa ka xona swin'we ni swiharhi swa nhova, mikarhi ya ntlhanu na mimbirhi yi ko yi hundza ehenhla ka xona.’

²⁴Nhlamuselo ya kona hi yoleyi, wena hosi! I makungu ya La nge henhlahenhla lama nga ta hetiseka henhla ka hosi, n'wini wa mina:

²⁵U ta hlongoriwa u suka exikarhi ka vanhu, u ta tiakela ni swiharhi swa nhova; u nyikiwa ku dya byanyi kukotisa tihomu, u tsakamisiwa hi mberha ya le tilweni, kutani mikarhi ya ntlhanu na mimbirhi yi ta hundza ehenhla ka wena, u ko u tivisisa leswaku La nge henhlahenhla u ni ku fuma ehenhla ka vuhosi bya vanhu, ni leswaku a nga byi nyika loyi a rhandzaka ku n'wi nyika byona.

²⁶Loko yi ri mhaka leyi nga vuriwa leswaku ku ta siyiwa xikundzu ni timitsu ta murhi hileswaku vuhosi byi ta tlherisiwa eka wena, loko kutani u swi tivile leswaku ku fuma tilo.

²⁷Loko swi ri tano, hosi, amukela ku tsundzuxa ka mina. Herisa ku dyoha ka wena hi ku endla hi ku lulama, ni ku homboloka ka wena hi ku tsetselela xisiwana, loko kumbexana ku kateka ka wena ka ha ri ni nkarhi.”

²⁸Timhaka leti hinkwato ti humelerile hosi Nebukadnetsara.

²⁹Loko ku herile tin'hweti ta khume na timbirhi, a a tifambela ehenhla ka yindlu ya vuhosi ya Babilona.

³⁰Kutani hosi yi vulavula, yi ku: “Xana a hi yena Babilona lonkulu, loyi ndzi n'wi akeke hi matimba ya mina lamakulu leswaku byi endla vuako bya hosi, a va a dzunisa vukulukumba bya mina xana?”

³¹Mhaka loko ya ha ri enon'wini wa hosi, rito ri xika etilweni, ri ku: “U tivisiwa, hosi Nebukadnetsara, leswaku vuhosi byi susiwile eka wena;

³²u ta hlongoriwa exikarhi ha vanhu, kutani u ta aka ni swiharhi swa nhova; u ta hanya u dya byanyi kukotisa tihomu, kutani mikarhi ya ntlhanu na mimbirhi yi ta hundza ehenhla ka wena, u ko u tiva leswaku La nge henhlahenhla u ni ku fuma ehenhla ka vuhosi bya vanhu, ni leswaku a nga byi nyika loyi a rhandzaka ku n'wi nyika byona.”

³³Hi nkarhi wolowo rito lero ri hetiseka ehenhla ka Nebukadnetsara; a hlongoriwa exikarhi ka vanhu; a dya byanyi kukotisa tihomu, miri wa yena wu tsakamisiwa hi mberha ya tilo, ni misisi ya yena yi ko yi n'wi milela kukotisa ya magama, ni min'wala kukotisa ya tinyanyana.

³⁴Eku heleni ka masiku walawo, mina, Nebukadnetsara, ndzi tlakuse mahlo ya mina ehenhla, kutani ku titiva ku tlhelela eka mina. Ndzi vonga La nge henhlahenhla, ndzi dzunisa, ndzi kurisa loyi a hanyaka hilaha ku nga heriki, loyi ku fuma ka yena ku nga ku fuma loku nga heriki, loyi vuhosi bya yena byi sukaka erixakeni rin'wana ku yisa etinxakeni leti nga heriki.

³⁵Vaaki hinkwavo va misava va kotisa swahava emahlweni ka yena; a endla hi mavandla ya matilo ni vaaki va laha emisaveni hilaha a rhandzaka hakona; kutani a ku na un'wana la nga n'wi sivelaka, a ku eka yena: “U endla yini?”

³⁶Enkarhini wolowo ku tiva ku tlhelele eka mina, ku kwetsima ka vuhosi bya mina, ni vukulukumba bya mina, ni vulombi bya mina swi tlherisiwe eka mina; vatsundzuxi va mina, ni tindhuna ta mina va ta ndzi teka, kutani ndzi vuya ndzi vekiwa evuhosini, kutani ndzi engeteleriwa hi vukulukumba lebyi tlurisaka.

³⁷Sweswi, mina, Nebukadnetsara, ndza dzunisa, ndza vonga, ndza kurisa Hosi ya le matilweni hikuva mitirho ya yena i ya xiviri, ni tindlela ta yena i ku lulama, kutani u ni matimba ya ku tsongahata lava fambaka hi ku tikurisa.