Read tsonga Daniyele 5 Bible Online

Daniyele 5 - tsonga bible

Daniyele 5

¹Hosi Belxatsara a endlela tihosana ta yena ta khume ra madzana nkhuvo lowukulu; kutani a nwa vhinyo emahlweni ka lava khume ra madzana.

²Belxatsara, loko a sungule ku pyopyiwa hi vhinyo, a lerisa leswaku ku tisiwa mindzheko ya nsuku ni ya silivhere, leyi tata wa yena, Nebukadnetsara, ingi a yi tekile etempeleni ya Yerusalema, leswaku hosi ni tihosana ta yena, ni vasati va yena, ni swigangu swa yena, va nwa hi mindzheko yeleyo.

³Kutani ku tisiwa mindzheko ya nsuku leyi ngi yi tekiwile etempeleni ya yindlu ya Xikwembu eYerusalema, kutani hosi ni tihosana ta yena, ni vasati va yena, ni swigangu swa yena va nwa hi mindzheko yoleyo.

⁴Va nwa vhinyo, kutani va dzunisa swikwembu swa nsuku, ni swa silivhere, ni swa koporo, ni swa nsimbhi, ni swa mitsandze, ni swa maribye.

⁵Hi nkarhi wolowo, ku humelela tintiho ta voko ra munhu leti tsalaka ekalakeni ra khumbi ra yindlu ya hosi, ku lavana ni kandelari. Kutani hosi yi vona yinhla ya voko loko ri tsala.

⁶Kavaloko mombo wa hosi wu hundzuka vala kutani miehleketo ya yona yi yi rhurhumerisa; masenge ya xisuti xa yona ma lungalunga, ni matsolo ya yena ma gundzagundza.

⁷Kutani hosi yi huwelela hi matimba leswaku ku tisiwa vangoma, ni Vakalediya ni va vungoma bya tinyeleti. Kutani hosi yi vulavula ni lava vutlhari va Babilona, yi ku: “Munhu, hambi a ri mani na mani, la nga ta hlaya leswi tsariweke la, la nga ta ndzi hlamusela swona, u ta ambexiwa nguvu ya xivunguvungu, u ta veheriwa ritlama ra nsuku enhan'wini, a nyikiwa ni xitshamo xa vunharhu eku fumeni ka mina.”

⁸Kavaloko tintlhari hinkwato ta hosi ti nghena, kambe ti tsandzeka ku hlaya leswi tsariweke ni loko ku ri ku hlavutela hosi timhaka ta swona.

⁹Kavaloko hosi Belxatsara a pfulungana ngopfu, mombo wa yena wu hundzuka, ni tihosana ta yena ti tsemeka nhlana.

¹⁰Kuteloko nkosikazi a twa timhaka leto ta hosi ni ta tihosana ta yena, a nghena endlwini ya nkhuvo. Kutani nkosikazi a vulavula, a ku: “Hosi, hanya hilaha ku nga heriki! Mianakanyo ya wena yi nga tshuki yi pfulungana, ni mombo wa wena wu nga tshuki wu hundzuka!

¹¹Munhu u kona eku fumeni ka wena loyi moya wa swikwembu leswo kwetsima wu nga eka yena; emikarhini ya tata wa wena, ku kumiwe eka yena ku vonakala, ni mano, ni vutlhari lebyo ngi i vutlhari bya swikwembu; kutani hosi Nebukadnetsara, tata wa wena, a n'wi vekile ndhuna ya tintlhari ni ya vangoma, ni ya Vakalediya, ni ya va vungoma bya tinyeleti, a ri tata wa wena, hosi;

¹²hikuva moya wa ku tlakuka, ni ku tiva, ni ku twisisa ni ku hlamusela milorho, ni ku hlamusela swihundla, ni ku hlavutela ka swivutiso leswo nonon'hwa swi tshamile swi kumiwa eka yena, a nga Daniele, loyi hosi yi n'wi chuleke vito ra Beltexatsara. Loko swi ri tano, a ku vitaniwe Daniele, kutani u ta ku hlamusela.”

¹³Kavaloko Daniele a tisiwa emahlweni ka hosi. Kutani hosi yi vulavula, yi ku eka Daniele: “Xana hi wena Daniele wa vakhomiwa va va Yuda, volavo hosi, tata wa mina, a nga va humesa eYudiya a va tisa halenu xana?

¹⁴Ndzi twile loko ku vuriwa, va ku: ‘Moya wa swikwembu wu le ka wena, ni leswaku ku kumiwile eka wena ku vonakala, ni mano, ni vutlhari lebyi tlurisaka.’

¹⁵Kasi tintlhari ni vangoma va tisiwile emahlweni ka mina ku ta hlaya leswi tsariweke la, ni ku hlamusela timhaka ta swona, kambe va tsandzekile ku ndzi byela nhlamuselo ya swona.

¹⁶Kambe ndzi twile leswaku wena wa swi tiva ku nyika munhu nhlamuselo, ni ku hlamusela swivutiso leswo nonon'hwa. Loko kunene u nga hlaya leswi tsariweke ni ku ndzi tivisa timhaka ta swona, u ta ambexiwa nguvu ya xivunguvungu, u ta veheriwa ritlama ra nsuku enhan'wini ya wena, kutani u ta vekiwa exitshan'weni xa vunharhu eku fumeni ka mina.”

¹⁷Kavaloko Daniele a hlamula emahlweni ka hosi, a ku: “Tinyiko ta wena a ti tshame na wena, u nyika un'wana xuma xa wena! Hambiswiritano, ndzi ta hlayela hosi leswi tsariweke, ndzi n'wi hlavutela nhlamuselo ya swona.

¹⁸Wena hosi, Xikwembu lexi nge henhlahenhla a xi nyikile Nebukadnetsara, tata wa wena, vuhosi, ni vukulukumba, ni ku twakala, ni ku vonakala.

¹⁹Kutani hikwalaho ka vukulukumba lebyo ngi xi n'wi nyikile byona, vanhu va tinxaka hinkwato, ni va matiko hinkwawo, ni va tindzimi hinkwato, a va ri ni ku chava, va rhurhumela emahlweni ka yena; a tshama a dlaya loyi a rhandzaka ku n'wi dlaya, a hanyisa loyi a rhandzaka ku n'wi hanyisa, a tlakusa loyi a rhandzaka ku n'wi tlakusa, a tsongahata loyi a rhandzaka ku n'wi tsongahata.

²⁰Kambe leswi mbilu ya yena yi kukumukeke, ni moya wa yena wu nga tikurisa hi ku tlurisa mpimo, u susiwile exiluvelweni xa yena xa vuhosi, a tekeriwa ni vukulukumba bya yena.

²¹A hlongoriwa exikarhi ka vana va vanhu, mbilu ya yena yi endliwa leyi fanaka ni ya swiharhi, a aka ni maduva, a dya byanyi kukotisa tihomu, ni miri wa yena wu tsakamisiwa hi mberha ya tilo ku fikela nkarhi lowu a tiveke ha wona leswaku Xikwembu lexi nge henhlahenhla, hi xona lexi nga ni ku fuma ehenhla ka vuhosi bya vanhu ni leswaku hi xona lexi vekaka loyi xi rhandzaka ku n'wi veka eka byona.

²²Na wena, n'wana wa yena, wena Belxatsara, a ku tsongahatanga mbilu ya wena, ni loko u tivile timhaka teto hinkwato.

²³Kambe u tikurisile emahlweni ka Hosi ya matilo; ku tisiwile emahlweni ka wena mindzheko ya yindlu ya yena; kutani wena, ni tindhuna ta wena, ni vasati va wena, ni swigangu swa wena, mi nwile vhinyo emindzekweni yoleyo, kutani u dzunisile swikwembu swa silivhere, ni swa nsuku, ni swa koporo, ni swa nsimbhi ni swa mitsandze, ni swa maribye, leswi nga riki na ku vona, ni ku yingisa, ni ku tiva; kasi Xikwembu lexi nga fumbarhela ku hefemula ka wena, ni mitila hinkwayo ya wena evokweni ra xona, a ku xi dzunisanga.

²⁴Hikwalaho-ke voko leri ri rhumiweke hi xona, ku ta tsala leswi tsariweke la.

²⁵Kutani leswi tsariweke la, hi swoleswi: Mene, mene, tekele, uparisini.

²⁶“Nhlamuselo ya marito lawa hi yoleyi: Mene (ku hlayiwa), hileswaku Xikwembu xi hlayile ku fuma ka wena, xi ku tsemile.

²⁷Tekele (ku ringanisiwa): U ringanisiwile hi xikalo, kutani u kumiwe la vevukeke.

²⁸Parisini (ku avanyisiwa): Vuhosi bya wena byi avanyisiwile, byi nyikiwile Vameda ni Vaperesi.”

²⁹Kutani hi ku lerisa ka Belxatsara Daniele a ambexiwa hi xivunguvungu, a veheriwa ritlama ra nsuku enhan'wini, kutani ku twarisiwa emahlweni ka yena leswaku u ta tshama exitshan'weni xa vunharhu xa ku fuma.

³⁰Hi byona vusiku byebyo, Belxatsara, hosi ya Vakalediya, a dlawa.

³¹Kutani Dariyosi, wa ka Meda, a kuma vuhosi a ri ni malembe ya 62.