Read tsonga Hosiya 10 Bible Online

Hosiya 10 - tsonga bible

Hosiya 10

¹Israele i vhinya leyi kuleke ngopfu; mihandzu ya yona yi n'wi ringanile. Mihandzu ya yena loko yi ri karhi yi engeteleka, hilaha a engetaka ku aka tialitari; hikuva hilaha tiko ra yena ri nga riki rinene, hi kona a engetaka ku bombisa swifaniso.

²Timbilu ta vona ti ni mano; kutani va ta hlayeriwa milandzu. Xikwembu xi ta mbundzuxa tialitari ta vona, xi herisa swifaniso swa vona.

³Sweswi, va ta ku: “A hi na hosi, hikuva ni loko a ri Yehovha, a hi n'wi chavanga, kutani hosi yi nga hi endlela yini?”

⁴Va vulavula swa misava, va hlambanya hi vuhava; va endla swinakulobye; kutani ku avanyisa ku ta mila, kukotisa ximudyana xa vuhlungu lexi milaka evuhaluleni.

⁵Vaaki va Samariya va chava hikwalaho ka rhole ra Beta-Avene; hikuva tiko ra kona ri le nkosini ni vaprista va kona va rhurhumela hikwalaho ka rona, ni hikwalaho ka ku twala ka rona, hikuva ku sukile eka rona.

⁶Ri ta yisiwa eAsiriya, yi va nyiko ya hosi ya Yarebe. Efrayimi u ta khomiwa hi tingana, na Israele u ta nyuma hikwalaho ka leswi a swi hanyeleke.

⁷Ku hele Samariya; hosi ya kona yi kotisa mavatlo lama yaka ehenhla ka mati!

⁸Ku hele ni swivandla leswi tlakukeke swa Beta-Avene, leswi nga swidyoho swa Israele. Mitwa ni swinhlehlwana swa mila etialitarini ta vona: Kutani va ta ku eka tintshava: “Mi hi funengeta!” ni ka switsunga: “Hi weleni ehenhla!”

⁹Hi masiku ya le Gibeya, u dyohile wena Israele! Va tiyisele kona; kasi nyimpi leyi nga humelela vakanganyisi eGibeya, a yi va khomanga!

¹⁰Ndzi ta va tshinya hi ku tirhandzela ka mina, kutani matiko ma ta hlengeletiwa ehenhla ka vona ku va bohelela emakhombyeni ya vona lamambirhi.

¹¹Efrayimi i thokazi leri dyondzisiweke ri rhandzaka ku hula mavele. Kambe mina, ndzi ta veka joko ehenhla ka nhamu ya rona leyinene. Ndzi ta pana Efrayimi, Yuda, yena, a rima, Yakobo a fayetela mabuwu.

¹²Mi tibyalela hi ku lulama, mi tshovela hi vunene; mi tirimela vuhalulo lebyintshwa; hikuva i nkarhi wa ku lava Yehovha, a kondza a ta, a mi nisela ku lulama.

¹³Mi rimile ku homboloka, mi va mi tshovela ku biha, kutani mi dyile swakudya swa mavunwa; hikuva u tshembile ku famba ka wena, ni vunyingi bya tinhenha ta wena.

¹⁴Mikitsikitsi yi ta humelelela tiko ra wena, ni makhokholo ya wena ma ta herisiwa hinkwawo, kukotisa loko ku herisiwe Beta-Arabele hi Xalimani hi siku ra nyimpi, loko vana va fayiwa kun'we ni vamana wa vona.

¹⁵Betele u ta mi tumbuluxela makhombo lawa hikwalaho ka ku homboloka ka n'wina loku tlurisaka. Ni mixo hosi ya Israele yi ta herisiwa kunene.