Read tsonga Hosiya 11 Bible Online

Hosiya 11 - tsonga bible

Hosiya 11

¹Israele loko a ha ri ntsongwana, ndzi n'wi rhandzile, ndzi vita n'wananga a huma eEgipta.

²Kakuloko vaprofeta va va vita, ku va laha va va fularhelaka; va tlhavela va Baali, va hisela swifaniso magandzelo.

³Kasi mina ndzi dyondzisile Efrayimi ku famba, ndzi ri karhi ndzi n'wi khoma hi mavoko, kambe a va tsundzukanga loko ndzi va horisa.

⁴A ndzi va koka hi mapindza ya vanhu, hi swiboho swa rirhandzu. Ndzi ri tanihi loyi a tshunxaka joko etinhlayeni ta vona, a ndzi ri karhi ndzi va tshinelela hi musa ku va phamela.

⁵Efrayimi a nga ka a nga tlheleri eEgipta, kambe u ta fumiwa hi Asiriya; hikuva va arile ku tlhelela eka mina.

⁶Fumu ri ta onha miti ya yena, ri herisa swipfalo swa yena, ri va heta hikwalaho ka mitengo ya vona.

⁷Tiko ra mina ri tiyiserile ku ndzi hundzukela, ni loko va vitiwela ehenhla, a ku na un'we la yimiselaka mbilu ya yena kona.

⁸Xana ndzi nga ku lahla, Efrayimi! Ndzi ku tshika, wena Israele! Xana ndzi nga ku lahla, kukotisa muti wa Adama, ndzi ku endla ku fana na Seboyimi! Kambe e-e, mbilu ya mina yi hundzuka endzeni ka mina, mitsetselelo ya mina hinkwayo yi pfukile.

⁹Ndzi nga ka ndzi nga endli hi ku pfurha ka vukari bya mina, ndzi nga ka ndzi nga tlheri ndzi lahla Efrayimi, hikuva mina ndzi Xikwembu, a ndzi munhu, hi mina la twalaka exikarhi ka wena; ndzi nga ka ndzi nga ti hi vukari.

¹⁰Va ta landzela Yehovha. Kukotisa nghala u ta dzumadzuma; yena u ta dzumadzuma, kutani vana va yena va ta rhurhumela, va ta eka yena, va pfa hitlhelo ra lwandle.

¹¹Va ta rhurhumela kukotisa nyanyana, va huma eEgipta, ni kukotisa tuva va huma emisaveni ya Asiriya; kutani ndzi ta va akisa etindlwini ta vona, ku vula Yehovha.