Read tsonga Hosiya 2 Bible Online

Hosiya 2 - tsonga bible

Hosiya 2

¹“Vitanani vamakwenu ‘Ami’, (tiko ranga), ni vamakwenu va xisati, ‘Ruhama’, (Mutsetseleriwa).

²Kanetanani ni mana wa n'wina, kanetani! Hikuva a hi nsati wa mina, na mina a ndzi nuna wa yena: A a suse vuoswi bya yena emahlweni ka yena, ni vumbhisa bya yena emaveleni ya yena.

³Loko swi nga ri tano, ndzi ta n'wi tlomulela, a famba ntsena, ndzi n'wi endla tanihi siku leri a nga velekiwa ha rona, ndzi n'wi vita a va tanihi mananga, ndzi n'wi veka tanihi tiko leri omeke, ndzi n'wi dlaya hi torha.

⁴“Na swona, ndzi nga ka ndzi nga tsetseleri vana va yena, hikuva i vana va vuoswi.

⁵Hikuva mana wa vona a a ri ni vuoswi; loyi a va velekeke u tiendlile tingana; hikuva u te: ‘Ndzi ta landzela varhandziwa va mina lava nga ndzi nyika vuswa bya mina ni mati ya mina, ni voya bya mina bya tinyimpfu, ni ntsembyana wa mina, ni mafurha ya mina, ni swo nwa swa mina.’

⁶“Hikwalaho, vonani, ndzi ta siva ndlela ya yena hi mitwa! Ndzi aka ribuwu kona, ku ko a nga kumi ntila va yena.

⁷Kutakuloko a landzelela varhandziwa va yena, a nga ka a nga kumani na vona, u ta va lavisisa, kambe a nga ka a nga va kumi. Kwalaho u ta ku: ‘Ndzi ta famba ndzi tlhelela eka nuna wa mina lowo sungula, hikuva a swi sasekile eka mina enkarhini wolowo ku tlurisa sweswi.’

⁸“Kambe a a nga tivi leswaku hi mina loyi ndzi n'wi nyikaka koro, ni vhinyo, ni mafurha, ndzi n'wi andziselaka silivhere, ni nsuku lowu va wu humeselaka Baali.

⁹Hikwalaho ndzi ta n'wi tekela koro ya mina enkarhini wa yona, ni vhinyo leyintshwa ya mina enkarhini wa yona ndzi n'wi tekela ni voya bya mina, ni ntsembyana wa mina, leswi a tifunengetaka vusweti bya yena ha swona.

¹⁰Sweswi-ke, ndzi ta funungula vuhava bya yena emahlweni ka swigangu swa yena, ku nga ri na munhu la nga n'wi lamulelaka evokweni ra mina.

¹¹Ndzi ta herisa mitsako ya yena hinkwayo ndzi herisa mikhuvo ya yena ni mitlango ya ku vonaka ka n'weti, ni Tisavata ta yena, ni tinhlengeletano ta yena hinkwato.

¹²Ndzi ta onha masimu ya yena ya vhinya ni ya makuwa, lawa a nga ku: ‘I hakelo leyi ndzi yi nyikiweke hi swigangu swa mina!’ Kambe ndzi ta ma hundzula xihlahla lexi nga ta dyiwa hi swiharhi swa le handle.

¹³Kutani ndzi ta n'wi tshinya hi masiku ya va Baali lawa a va hiseleke gandzelo ha wona, a vuya a landzela swigangu swa yena, a tibombisa hi swingwavila ni vuhlalu; kasi mina wa ndzi rivala, ku vula Yehovha.

¹⁴“Hikwalaho, vonani, ndzi ta n'wi khorwisa, ndzi n'wi yisa emananga, ndzi vulavula leswi nga ta khorwisa mbilu ya yena.

¹⁵Hilaha ndzi nga ta n'wi vuyisela masimu ya yena ya vhinya, ndzi n'wi nyika ni nkova wa Akora (dzolonga) yi va nyangwa ya ku tshemba; kutani kwalaho u ta hlamula kukotisa emasikwini ya vuntshwa bya yena, ni kukotisa esikwini leri a nga huma ha rona loko a suka etikweni ra Egipta.

¹⁶Kutani hi siku rero, ku vula Yehovha, u ta ndzi vula nuna wa wena, a ku nga ha ndzi vuli Baali wa wena.

¹⁷Kutani ndzi ta susa mavito ya va Baali enon'wini wa wena, leswaku mavito ya vona ma nga ha vuriwi.

¹⁸Kambe hi siku lero, ndzi ta va endlela ntwanano ni swiharhi swa nhova, ni tinyanyana ta tilo, ni leswi kokovaka emisaveni, kutani ndzi ta tshova vurha ni tlhari ndzi va ndzi herisa ku lwa emisaveni, kutani ndzi va akisa hi ku rhula.

¹⁹Kutani ndzi ta ku teka, u va wa mina hilaha ku nga heriki, ndzi ku teka hi ku lulama ni ku avanyisa, ni nsovo, ni ku tsetselela.

²⁰Ndzi ku teka ni le ku tshembekeni, kutani u ta tiva Yehovha.

²¹“Enkarhini wolowo, ndzi ta hlamula, ku vula Yehovha, ndzi hlamula matilo, wona ma hlamula misava,

²²kutani misava yi ta hlamula koro, ni vhinyo, ni mafurha, sweswo swi hlamula Yizriele.

²³Kutani ndzi ta tibyalela yena emisaveni; ndzi va ndzi tsetselela Lo-Ruhama, kutani ndzi ta ku eka Lo-Ami: ‘U tiko ra mina’; kutani yena u ta ku eka mina: ‘U Xikwembu xanga’.”