Read tsonga Hosiya 4 Bible Online

Hosiya 4 - tsonga bible

Hosiya 4

¹Twanani rito ra Yehovha, n'wina vana va Israele! Hikuva Yehovha u tengisa vaaki va tiko, hikuva a ku na vunene, ni ku tsetselela, ni ku tiva Xikwembu etikweni.

²Ka hlambanyiwa ka rhukaniwa, ka dlayiwa, ka yiviwa, ka oswiwa, ku pfukeriwa vanhu hi matimba, kambe ngati yi karhi ya halatiwa.

³Hikwalaho tiko ri ni swirilo, ni vanhu lava akeke eka rona va tsanile, kun'we ni swiharhi swa tiko ni tinyanyana ta matilo, swi tsandza ni tinhlampfi ta lwandle, ta lova.

⁴Ku nga tshuki ku va na la kanetaka, ku nga tshuki ku va na la karihelaka! Hikuva va tiko ra wena va fana ni lava kanetanaka ni muprista.

⁵Hikwalaho u ta wa ninhlekanhi, ni muprista a wa na wena nivusiku, kutani ndzi ta herisa mana wa wena.

⁶Vanhu va mina va hela hi ku pfumala ku tiva. Leswi wena u sandzeke ku tiva, ndzi ta ku sandza, u nga ha vi muprista wa mina; leswi u riveleke nawu wa Xikwembu xa wena, na mina ndzi ta rivala vana va wena.

⁷Loko va ri karhi va andza, hilaha va ndzi dyohelaka hi ku tlurisa; ku twala ka vona ndzi ta ku hundzula tingana.

⁸Vaprista va tiphamela hi xivi xa tiko ra mina, va navela ku homboloka ka rona.

⁹Hikwalaho, tiko ri ta humelela hi mhaka yi ri yin'we ni muprista, kutani ndzi ta karihela mikhuva ya vona, ndzi va endla hi swiendlo swa vona.

¹⁰Va ta dya, kambe va nga ka va nga xurhi; va ta oswa, kambe va nga ka va nga andzi, hikuva va tshikile ku yingisa Yehovha.

¹¹Vooswi, ni vhinyo, ni byalwa swi herisa miehleketo.

¹²Tiko ra mina ri vutisa mirhi ya rona, kutani nkhavi wa rona wu ri tsundzuxa; hikuva moya wa vuoswi wu va hundzuluxile va oswa ekule ni Xikwembu xa vona.

¹³Va endla magandzelo etinhlohlorhini ta tintshava, ni le henhla ka switsunga va hisa magandzelo, va endlisa sweswo ehansi ka nkuhlu, ni popolere, ni nkanyi, hikuva ndzhuti wa swona wa nandzika Hikwalaho vanhwanyana va n'wina va tiendla swigangu, ni vasati va n'wina va tiendla vaoswi.

¹⁴Ndzi nga ka ndzi nga tshinyi vanhwanyana va n'wina, loko va tiendla swigangu, ni vasati va n'wina loko va oswana; hikuva n'wina mi ya hitlhelo ni vasati va mbiri, kutani mi endla magandzelo, n'wina, ni tinghwavava. Tiko leri a ri na ku twisisa; ra lahleka.

¹⁵Loko ku oswana wena, Israele, Yuda yena a nga tshuki a tilavela nandzu! Mi nga tshuki mi ya Giligala, mi nga tlhandlukeli eBeta-Avene; mi nga tshuki mi hlambanya mi ku: “Ha Yehovha la hanyaka!”

¹⁶Hikuva Israele wa tiarisa u fana ni thokazi leri nga xitlalu. Sweswi, Yehovha u ta va risa ku fana ni xinyimpfana emananga.

¹⁷Efrayimi u pfangene ni swifaniso; n'wi sukele!

¹⁸Ku nwa ka vona ku borile; va oswa ni ku oswana; lava nga switlhangu eka vona, va rhandza swa tingana.

¹⁹Xidzedze xi va tekela etimpapeni ta xona; va ta tlhaviwa hi tingana hikwalaho ka magandzelo ya vona.