Read tsonga Yuwele 1 Bible Online

Yuwele 1 - tsonga bible

Yuwele 1

¹Rito ra Yehovha leri rhumeriweke Yuwele n'wana Petuwele.

²Yingisani leswi, n'wina swidyuhati! Rhiyani ndleve, n'wina hinkwenu vaaki va tiko! Xana mhaka leyo tano yi tshama yi humelela emikarhini ya n'wina kumbe emikarhini ya vatata wa n'wina?

³Ambelani vana va n'wina, ni vana va n'wina eka vana va vona ni vana va vona eka rixaka rin'wana.

⁴Leswi siyiweke hi timhera, swi phorhiwile hi njiya; leswi siyiweke hi njiya, swi dyiwile hi magerere; leswi siyiweke hi magerere, swi phorhiwile hi swidzedzane.

⁵Hanyanyani, swidakwa, mi kolola! Na n'wina hinkwenu, vanwi va vhinyo, rilelani dzova ra vhinyo leri vutliwaka enon'wini wa n'wina!

⁶Hikuva tiko ri hlasele karikwerhu, i tiko ra matimba leri nga hlayiwiki. Meno ya rona i meno ya tinghala, ni tinhlaya, i tinhlaya ta nghala ya ntswele.

⁷Ri onhile masimu ya mina ya vhinya, ri tshovile mikuwa yanga; ri swi phaphile, ri hangalasa makamba ehansi; marhavi ya swona ma tshama ma basile.

⁸U kolola kukota wanhwana la ambaleke xuka ro khwaxa, a rilela nuna wa vuntshwa bya yena!

⁹Mihlengo ni magandzelo swi susiwa endlwini ya Yehovha; vaprista lava tirhelaka Yehovha, va le nkosini.

¹⁰Tinhova ti onhiwile, misava yi le ku rileni, hikuva tikoro ti herisiwile, dzova ra Vhinyo ri phyile, ni mafurha ma omile.

¹¹Varimi va tsemeke nhlana, ni varimi va vhinya va kolola hikwalaho ka koro ni barley, hikuva ntshovelo wa masimu wu onhakile.

¹²Vhinya yi ni gome, ni mikuwa ya vuna, ni mirhi hinkwayo ya nhova yi omile. Hikuva ku tsaka ku herile exikarhi ka vana va vanhu.

¹³N'wina vaprista, ambalani maxuka mi tiba swifuva! Rilani, n'wina lava mi tirhelaka alitari. Tanani mi tshama nivusiku, mi funengele maxuka, n'wina lava mi tirhelaka Xikwembu xa mina! Hikuva mihlengo ni magandzelo a swa ha fiki endlwini ya Xikwembu xa n'wina!

¹⁴Lerisani siku ra ku titsona swakudya, mi rhamba nhlengeletano! Hlengeletani vakulukumba ni vaaki hinkwavo va tiko, va ta endlwini ya Yehovha, Xikwembu xa n'wina, mi huwelela eka Yehovha, mi ku: “Yo! Siku leri!”

¹⁵Hikuva siku ra Yehovha ri tshinele, ra ta kukota xirha xa Lowa matimba hinkwawo.

¹⁶Xana swakudya a swi vutliwanga emahlweni ya hina? Ku tsaka ni mikulungwana a swi herisiwanga endlwini ya Xikwembu xa n'wina xana?

¹⁷Timbewu ti bolela ehansi ka mabuwu, tingula a ta ha ri na nchumu, madulu ma hlakala hikuva ku ri hava koro.

¹⁸A hi ku cema ka swifuwo! Mitlhambi ya tihomu a yi tivi laha yi yaka yona, hikuva a ka ha ri na madyelo, swi tsandza ni mitlhambi ya swifuwana swi le ku vavisekeni!

¹⁹Ndzi huwelela eka wena, Yehovha! Hikuva ndzilo wu dyile madyelo ya mananga, malangavi ma hisile mirhi hinkwayo ya nhova.

²⁰Swi tsandza ni swiharhi swi huwelela eka wena, hikuva mati ya milambu, ma phyile, ni madyelo ya mananga ma tshwile.