Read tsonga Yuwele 3 Bible Online

Yuwele 3 - tsonga bible

Yuwele 3

¹“Hikuva emasikwini walawo, ni le mikarhini yoleyo, siku ndzi tlherisaka lava khomiweke va Yuda ni va Yerusalema,

²ndzi ta hlengeleta matiko hinkwawo, ndzi ma xikisela enkoveni wa Yoxafati, ndzi ta tengisana na vona hikwalaho ka Israele tiko ra mina, ni ndzhaka ya mina, loyi va n'wi hangalaseke exikarhi ka matiko va ko va avelana tiko ra mina.

³Va avelene vanhu va mina hi vuhlolotwana, va humesile wandzisanyana ku va hakelo ya muoswi, va xavile vhinyo hi wanhwana, va nwile.

⁴“Na n'wina Tiri na Sidoni mi ni mhaka yihi na mina? Na wena tiko hinkwaro ra Vafilista? Xana mi ri mi ta tirihisela eka mina? Kumbe mi ta ndzi endla swin'wana xana? Loko mi ku mi ta tirihisela, hi ku hatlisa ndzi ta tlherisela ku rihisa ka n'wina ehenhla ka tinhloko ta n'wina.

⁵“Hikuva mi tekile silivhere ya mina ni nsuku wa mina, mi ko mi yisa mitirho ya mina leyi pfumalekaka etitempeleni ta n'wina.

⁶Loko va ri vana va Yuda ni va Yerusalema, mi xavisile hi vona eka vana va Yavhani, leswaku va yisiwa ekule ni tiko ra vona.

⁷Vonani, ndzi ta va humesa exivandleni lexi mi va xaviseke eka xona, mitirho ya n'wina ndzi yi tlherisela ehenhla ka tinhloko ta n'wina.

⁸Ndzi xavisa vana va n'wina va xinuna ni va xisati eka vana va Yuda, leswaku va xavisiwa eka va Xeba, tiko ra le kule; hikuva Yehovha u vurile.”

⁹Banani nkosi exikarhi ka matiko leswaku va hloma, va pfuxa tinhenha! A va te, a va tshinele, vavanuna hinkwavo va nyimpi!

¹⁰Fulani ma banga hi swikomu swa n'wina; hi mikwana ya n'wina mi fula matlhari! La tsaneke a nge: “Ndzi nhenha!”

¹¹Hatlisani mi ta, n'wina matiko hinkwawo ya matlhelo mi hlengeletana! Wena, Yehovha, xikisela tinhenha ta wena kona.

¹²Vamatiko a va pfuke, a va te enkoveni wa Yoxafati; hikuva kona ndzi ta tshamisa ku avanyisa matiko hinkwawo ya le matlhelweni.

¹³Nghenisani sikela hikuva mavele ma vupfile; tanani, mi kandziya, hikuva xikhuvuto xi tele, ni makhuwana ma halaka; hikuva ku biha ka vona kukulu.

¹⁴I mitshungu! I mitshungu! Enkoveni wa ku avanyisa, hikuva ri le kusuhi siku ra Yehovha leri nga ta va kona enkoveni wa ku avanyisa.

¹⁵Dyambu ni n'weti swi endla ntima, ni tinyeleti ti tlherisa ku vangama ka tona.

¹⁶Yehovha u ta dzumadzuma eSiyoni; a twarisa rito ra yena a ri Yerusalema, tilo ni misava swi ta tsekatseka. Kambe Yehovha! Xichavelo eka tiko ra yena, i khokholo eka vana va Israele.

¹⁷“Kutani mi ta tiva leswaku hi mina Yehovha, Xikwembu xa n'wina; mina la tshameke eSiyoni, entshaveni ya mina leyi hlawuriweke, Yerusalema, u ta va xivandla lexi hlawuriweke; vamatiko a va nga ha hundzi eka yena.

¹⁸“Enkarhini wolowo, tintshava ti ta pfelela dzova ra vhinyo, switsunga swi ta khuluka ntswamba, ni milambu hinkwayo ya Yuda yi ta tshama yi va ni mati lama khulukaka, kutani nseledyana yi ta huma endlwini ya Yehovha yi tsakamisa rivala ra Xitimi.

¹⁹Egipta u ta hundzuka mananga, na Edomu u ta va makwandzasi hikuva va pfukele vana va Yuda matimba, va halatile ngati leyi nga riki na nandzu etikweni ra vona.

²⁰Kambe Yuda u ta tshama hilaha ku nga heriki, na Yerusalema, ku yisa etinxakeni ta tinxaka.

²¹Ndzi ta hlantswa ngati ya vona, leyi ndzi nga siki yi hlantswa, kutani Yehovha u ta aka eSiyoni.”