Read tsonga Amosi 4 Bible Online

Amosi 4 - tsonga bible

Amosi 4

¹“Yingisani rito leri, n'wina matswele ya Baxani, lama nga entshaveni ya Samariya, n'wina lava xanisaka lavatsongo, mi xanisaka swisiwana, mi nge eka vanuna va n'wina: ‘Tisani, hi nwa!’

²“Hosi Yehovha u hlambanyile hi ku kwetsima ka yena, a ku: ‘Vonani, ma ta masiku lawa mi nga ta phasiwa hi swove, ni lava seleke va n'wina, va nga ta kokiwa hi tindzovo.

³Mi ta huma emutini hi timbhovo, un'wana ni un'wana eka leyi nga emahlweni ka yena, mi balekela ekule ni khokholo ra n'wina,’ ” ku vula Yehovha.

⁴“Yanani eBetele, mi dyoha, yanani eGiligala, mi andzisa ku dyoha kona! Humesani magandzelo ya n'wina nimixo siku rin'wana ni rin'wana, hi siku ra vunharhu mi humesa vukhume bya leswi mi swi fuweke.

⁵Magandzelo ya n'wina ya mikhenso mi endla ni comela; mi lerisa ni mihlengo leyi humesiwaka hi ku tirhandzela ka munhu, hikuva hi leswi mi swi rhandzaka, n'wina, vana va Israele,” ku vula Hosi Yehovha.

⁶“Kasi a ndzi mi rhumerile ndlala emitini ya n'wina hinkwayo, ni ku pfumaleka ka vuswa ematlhelweni hinkwawo; hambiloko swi ri tano, a mi tlhelelanga eka mina,” ku vula Yehovha.

⁷“Kambe, a ndzi mi tsonile mpfula, ka ha sele tin'hweti tinharhu mi nga si tshovela; ndzi nisela muti wun'wana, wun'wana ndzi nga wu niseri; nsimu yin'wana yi niseriwa, nsimu leyi nga niseriwangiki yi oma;

⁸va miti mimbirhi, kumbe minharhu va ya emutini wun'wana ku ya nwa mati kambe va nga kolwi; kambe, ni loko swi ri tano, a mi tlhelelanga eka mina,” ku vula Yehovha.

⁹“Ndzi bile mavele ya n'wina hi rivungu ni ku vuna; masimu ya n'wina layo tala ya mirhi ni ya vhinya, ni mikuwa ya n'wina, ni mitlhwari swi dyiwa hi tinjiya; hambiswiritano a mi tlhelelanga eka mina,” ku vula Yehovha.

¹⁰“Ndzi mi rhumele ntungu lowu fanaka ni wa le Egipta, ndzi dlayile majaha ya n'wina hi tlhari, tihanci ta n'wina ti phangiwa, ku nun'hwa loku humaka emixaxeni ya n'wina ndzi ku fikisile etinhompfini ta n'wina; hambiswiritano, a mi tlhelelanga eka mina,” ku vula Yehovha.

¹¹“Ndzi mi humesele makhombo exikarhi ka n'wina kukota siku Xikwembu xi onhaka Sodoma na Gomora, kutani mi ponile ku kota xisa lexi humesiweke endzilweni; hambiswiritano, a mi tlhelelanga eka mina,” ku vula Yehovha.

¹²“Hikwalaho u ta vona leswi ndzi nga ta swi endla eka wena, Israele! Kutani leswi ndzi nga ta endla sweswo eka wena, kwalaho u tilunghisela ku hlangana ni Xikwembu xa wena Israele!”

¹³Hikuva vona, la tumbuluxeke tintshava, la endleke moya, la tivisaka munhu leswi anakanyiweke hi yena, la hundzulaka nhlekanhi munyama, la fambaka eswivandleni leswi tlakukeke swa misava, vito ra yena i Yehovha, Xikwembu xa mavandla.