Read tsonga Amosi 8 Bible Online

Amosi 8 - tsonga bible

Amosi 8

¹Hi lexi xikombiso lexi Hosi Yehovha a nga ndzi kombisa xona. Ndzi vone xirhundzu lexi teleke mihandzu leyi vupfeke.

²A ku eka mina: “U vona yini Amosi?” Ndzi ku: “Ndzi vona xirhundzu lexi teleke mihandzu leyi vupfeke.” Kutani Yehovha a ku eka mina: “Ku hela ka tiko ra mina ra Israele ku fikile, a ndzi nga ha tshami ndzi va rivalela.

³Tinsimu ta yindlu ya vuhosi, ti ta hundzuka swirilo hi siku rero,” ku vula Hosi Yehovha. “Ku ta tala mitsumbu, yi ta cukumetiwa hinkwako, ku miyeriwile.”

⁴Yingisani mhaka leyi, n'wina lava tiyiselaka ku dya xisiwana ni ku lovisa vapfumari etikweni; n'wina lava nge: “Siku ra ku tshama ka n'weti ri ta hundza rini, hi ta xavisa mavele?

⁵Ni Savata yi ta hundza rini, hi ta pfula swivuya, hi ta hunguta mpimo, hi kurisa nxavo, hi hoxisa xikalo hi ku kanganyisa?

⁶Hilaha hi nga ta xava swisiwana hi mali, ni vapfumari hi tintanghu, hi xavisa ni vudyangwana bya mavele!”

⁷Yehovha u hlambanyile hi ku kwetsima ka Yakobo, a ku: “Ndzi nga ka ndzi nga rivali mitirho ya n'wina ni wun'we, hilaha ku nga heriki.

⁸Xana misava yi nga ka yi nga tsekatseki hikwalaho ka sweswo-ke? Lava akeke eka rona hinkwavo va ta va ni tingana? Misava yi ta tlakuka hinkwayo ku fana ni nambu; yi ta tlakuka, yi tlhela yi phya kukota nambu wa Egipta.”

⁹“Hi siku rero,” ku vula Hosi Yehovha, “ndzi ta perisa dyambu ninhlekanhi lowukulu, ndzi humesa munyama etikweni ninhlekanhi.

¹⁰Ndzi ta hundzula mikhuvo ya n'wina mikosi, ni tinsimu hinkwato to tsaka, ndzi ti hundzula mahlomulo; ndzi ta ambexa swisuti hinkwaswo hi tinguvu to khwaxa, ndzi endla tinhloko hinkwato mimpandhla; e xirilo ndzi xi endla lexi fanaka ni xirilo lexi endleriwaka n'wana la nga swakwe, ku hetelela ka xona ku fana ni siku lero vava.

¹¹“Vonani,” ku vula Yehovha, “ma ta masiku lawa ndzi nga ta rhumela ndlala emisaveni, yi nga ri ndlala ya vuswa, ni loko ri ri torha ra mati, kambe yi nga ndlala ya marito ya Xikwembu.

¹²Va ta famba va huma elwandle rin'wana va ya eka rin'wana, va ta tsutsuma va huma en'walungwini ku ya fika evuxeni, va tsendzeleka va ri karhi va lava rito ra Yehovha, kambe va nga ka va nga ri kumi!

¹³“Hi siku lero vanhwana vo saseka ni majaha, va ta karhala hi torha.

¹⁴Vona lava hlambanyaka hi ku dyoha ka Samariya, va ku: ‘A ku hanye xikwembu xa wena Dani!’ Kumbe: ‘A ku hanye ndlela leyi yaka eBerexeba!’ ... va ta wa, a va nga ha tlheri va pfuka.”