Read tsonga Yonasi 1 Bible Online

Yonasi 1 - tsonga bible

Yonasi 1

¹Rito ra Yehovha ri ta eka Yonasi, n'wana Amitayi, ri ku:

²“Suka u ya eNinivha, muti lowukulu, u wu vulavulela, hikuva ku homboloka ka wona ku tlhandlukile emahlweni ka mina.”

³Kambe Yonasi a suka, a balekela eTarxixi, kule ni mombo wa Yehovha; kutani a ngirimela eYopa, a kuma kona byatso lebyi yaka eTarxixi, a humesa mali ya riendzo, kutani a nghena ebyatsweni leswaku a ta va eTarxixi kun'we ni vini va byona, kule ni mombo wa Yehovha.

⁴Kambe Yehovha a pfuxa mheho leyikulu elwandle, kutani ku pfuka xihuhuri lexikulu elwandle, byatso byi ko byi lava ku handzuka.

⁵Vatluti va chava, kutani un'wana ni un'wana a huwelela eka xikwembu xa yena, va ko va cukumeta elwandle xuma lexi ngi xi ri ebyatsweni ku hunguta ku tika ka byona. Kambe Yonasi a a rhelele exikarhi ka rona, a seketele ehansi, a etlele vurhongo.

⁶Kutani n'wini wa byatso a n'wi tshinelela, a ku eka yena: “U etlelela yini? Pfuka u khongela Xikwembu xa wena; kumbexana xi ta hi anakanya, hi nga ti lova.”

⁷Kutani va byelana, va ku: “Tanani hi hlahluva, hi ta tiva xana khombo leri, ri hi humelele hikwalaho ka mani.” Kavaloko va hlahluva, kutani tinhlolo ti khoma Yonasi.

⁸Kutani va ku eka yena: “Hi byele leswaku khombo leri, ri hi humelele hikwalaho ka mani! Ntirho wa wena hi lowo yini? U pfa kwihi? Eka rikwenu, hi kwihi? U wa tiko rihi xana?”

⁹Yena a ku eka vona: “Ndzi Muheveru, ndzi chava Yehovha, Xikwembu xa matilo, la endleke lwandle ni misava.”

¹⁰Kavaloko vavanuna volavo va khomiwa hi ku chava lokukulu, kutani va ku eka yena: “U endlele yini sweswo?” Kasi vavanuna volavo a va tiva leswaku a a balekile emahlweni ka Yehovha, hikuva a a va byerile.

¹¹Kutani va ku eka yena: “Hi ta ku endla yini leswaku lwandle ri hi miyelela?” Hikuva lwandle a ri ri karhi ri engeta ku kariha.

¹²A ku eka vona: “Ndzi tlakuleni mi ndzi hoxa lwandle, kutani lwandle ri ta mi miyelela, hikuva ndza swi tiva leswaku xihuhuri lexikulu lexi, xi mi humelele hikwalaho ka mina.”

¹³Hambiswiritano, vavanuna volavo va tluta hi matimba ku ya fika eribuwini, kambe va tsandzeka, hikuva lwandle a ri ri karhi ri engeta ku va karihela.

¹⁴Kavaloko va huwelela eka Yehovha, va ku: “Oho Yehovha! U nga hi lovisi hikwalaho ka vutomi bya wanuna loyi, kambe u nga hi rhwarisi ngati leyi nga riki na nandzu, hikuva wena, Yehovha, u endla hilaha u tirhandzelaka hakona.”

¹⁵Kutani va teka Yonasi, va n'wi hoxa elwandle kutani lwandle ri tshika ku kariha.

¹⁶Kutani vavanuna volavo va khomiwa hi ku chava lokukulu ka Yehovha, va humesela Yehovha magandzelo, va tiboha eka yena hi ku hlambanya.