Read tsonga Tinhlayo 14 Bible Online

Tinhlayo 14 - tsonga bible

Tinhlayo 14

¹Nhlengeletano hinkwayo yi tlakusa rito, yi ba huwa, kutani tiko ri rila vusiku byebyo.

²Vana va Israele va dzumadzumela Muxe na Aroni, kutani nhlengeletano yi ku eka vona: “Mawako nge hi file etikweni ra Egipta, kumbe hi file emananga!

³Xana Yehovha u hi yisela yini etikweni leri leswaku hi ya wa kona hi tlhari, ni leswaku vasati va hina, ni vananyana va hina va khomiwa? Xana a swi nga hi sasekeli loko hi tlhelela eEgipta-ke?”

⁴Kutani va byelana, va ku: “A hi tivekeleni hosi, hi ta tlhelela eEgipta.”

⁵Kavaloko Muxe na Aroni va tiwisa ehansi hi mimombo ya vona emahlweni ka nhlengeletano hinkwayo ya vana va Israele.

⁶Kutani Yoxuwa, n'wana Nuni, na Kalebe n'wana Yefune va ri va lava kambeke tiko, va tihandzulela tinguvu,

⁷va vulavula ni nhlengeletano hinkwayo ya vana va Israele va ku: “Tiko leri hi hundzeke eka rona ku ri kamba ri sasekile ngopfungopfu.

⁸Loko Yehovha a titsakele ha hina, u ta hi nghenisa etikweni leri, u ta hi nyika rona, ri nga tiko leri pfelelaka hi ntswamba ni vulombe.

⁹Ntsena mi nga tshuki mi pfukela Yehovha; loko mi ri n'wina, mi nga chaveni vanhu va tiko leri, hikuva swi ta va swakudya swa hina; ndzhuti wa vona wu sukile ehenhla ka vona, kasi Yehovha u na hina, mi nga tshuki mi va chava.”

¹⁰Kutani nhlengeletano hinkwayo yi lava ku va khandla ni maribye. Kavaloko ku kwetsima ka Yehovha ku humelela ehenhla ka tabernakela ya nhlengeletano, emahlweni ka vana va Israele hinkwavo.

¹¹Kutani Yehovha a ku eka Muxe: “Tiko leri ri ta ndzi sandza ku yisa kwihi xana? Ri ta ndzi kaneta ku yisa kwihi; hambi ndzi endlile masingita hinkwawo lawa exikarhi ka rona!

¹²Ndzi ta ri ba hi ntungu ndzi ri heta, kutani ndzi ta endla ha wena tiko lerikulu, leri nga ni matimba ku tlula rona!”

¹³Muxe a ku eka Yehovha: “Vaegipta va swi twile leswaku u humesile tiko leri exikarhi ka vona hi matimba ya wena;

¹⁴kutani va swi byerile vaaki va tiko leri. Va swi twile leswaku wena Yehovha u le xikarhi ka tiko leri, ni leswaku u va kombisa mombo wa wena; ni leswaku papa ra wena ri tshama ehenhla ka vona, ni leswaku u famba emahlweni ka vona u ri epapeni ninhlekanhi, nivusiku kambe u ri mbulukweni wa ndzilo.

¹⁵Kungakuloko u dlaya tiko leri kukotisa munhu un'we, vamatiko lava yingiseke timhaka ta wena, va ta ku:

¹⁶‘Hi leswi Yehovha a tsandzekeke ku nghenisa tiko leri emisaveni leyi a va hlambanyeleke leswaku a ta va nyika yona, kutani u va dlayile emananga.’

¹⁷Sweswi Hosi a yi kombise vukulu bya matimba ya yona hi laha u nga vula leswaku:

¹⁸‘Yehovha u hlwele ku kariha, u tele tintswalo, wa khomela nandzu ni ku dyoha; kambe xidyohi, a nga xi vuri la nga riki na nandzu, kutani a londza ku dyoha ka vatatana ehenhla ka vana va vona, ku fika erixakeni ra vunharhu ni ra vumune.’

¹⁹Wa nga rivalela tiko leri nandzu wa rona hi vukulu bya tintswalo ta wena, kukotisa leswi u rivaleleke tiko leri ku suka eEgipta, ku fika kwala.”

²⁰Kutani Yehovha a ku: “Ndzi va rivalele hilaha u nga vula hakona.

²¹Kambe ndzi loyi a hanyaka, ku kwetsima ka Yehovha ku ta tata misava hinkwayo.

²²Loko va ri vanhu lava voneke ku kwetsima ka mina ni masingita lawa ndzi ma endleke eEgipta ni le mananga, va ri lava va ndzi ringeke ka khume, kambe va nga yingisangi rito ra mina,

²³hinkwavo lava va nga ka va nga voni tiko leri ndzi ri hlambanyeleke vatata wa vona leswaku ndzi ta va nyika rona. A ku na un'we wa lava va ndzi sandzeke, la nga ta ri vona.

²⁴Loko a ri nandza wa mina, Kalebe, leswi moya wun'wana ingi wu ri eka yena, ni leswi a nga landza swinene ndlela ya mina, ndzi ta n'wi nghenisa etikweni leri a yeke eka rona, ri ta va ra vatukulu va yena.

²⁵Leswi Vaamaleke ni Vakanana va akeke enkoveni, mundzuku mi ta hundzuka, mi suka ku ya emananga tlhelo ra Lwandle ro Tshwuka.”

²⁶Yehovha a byela Muxe na Aroni, a ku:

²⁷“Ndzi ta tshika nhlengeletano leyo biha leyi, yi ndzi dzumadzumela ku fikela kwihi? Ndzi yingisile ku dzumadzuma ka vana va Israele lava ndzi dzumadzumelaka.

²⁸U va byela, u ku: ‘Ndza hanya, ku vula Yehovha: ndzi ta mi endlela hilaha mi nga vula etindleveni ta mina hakona.

²⁹Mitsumbu ya n'wina yi ta wa emananga lawa. N'wina hinkwenu lava hlayiweke, loko va hlaya ku sungula hi va malembe ya 20, ni lava tlulaka, lava ndzi dzumadzumeleke,

³⁰mi nga ka mi nga ngheni etikweni leri ndzi hlambanyeke leswaku ndzi ta mi akisa eka rona, loko a nga ri Kalebe, n'wana Yefune, na Yoxuwa, n'wana Nuni.

³¹Vananyana va n'wina lava mi nga te henhla ka vona leswaku va ta khomiwa hi valala, ndzi ta va nghenisa, kutani va ta tiva tiko leri mi ri sandzeke.

³²Loko mi ri n'wina, mitsumbu ya n'wina yi ta wa emananga;

³³kutani vana va n'wina va ta tshama va risa emananga hi malembe ya 40, va ta rhwala nandzu wa vuoswi bya n'wina ku ko ku hela mitsumbu ya n'wina emananga.

³⁴Kukotisa leswi mi nga heta masiku ya 40 ku kamba tiko, mi ta rhwala milandzu ya n'wina hi malembe ya 40 lembe rin'we hi siku; kutani mi ta tiva leswaku ku tshama ekule na mina i yini!’

³⁵Mina Yehovha ndzi vurisile, ndzi ta endlisa sweswo eka nhlengeletano leyo biha leyi hlengeletaneke ku lwa na mina, va ta hela emananga lawa, va fa kona.”

³⁶Kutani vavanuna lava Muxe a va rhumeleke ku ya kamba tiko, lava, loko va vuyile va dzumadzumerisa nhlengeletano hinkwayo ehenhla ka Yehovha hi ku sandza tiko,

³⁷vanhu valavo lava sandzeke tiko, va fa hi rifu emahlweni ka Yehovha.

³⁸Loko a ri Yoxuwa, n'wana Nuni, na Kalebe, n'wana Yefune va sala va hanyile exikarhi ka vanhu lava fambeke ku ya kamba tiko.

³⁹Muxe a byela marito lawa eka vana hinkwavo va Israele; kavaloko tiko ri humesa xirilo lexikulu.

⁴⁰Kutani va pfuka nimixo, va famba, va khandziya enhlohlorhini ya ntshava, va ku: “Hi lava! Hi ta khandziya endhawini leyi Yehovha a yi vuleke, hikuva hi dyohile.”

⁴¹Kutani Muxe a ku: “Mi tlulela yini ku lerisa ka Yehovha? Mi nga ka mi nga hluri!

⁴²Mi nga tshuki mi khandziya, hikuva Yehovha a nga kona exikarhi ka n'wina; mi nga tshuki mi ya biwa hi valala va n'wina;

⁴³hikuva Vaamaleke ni Vakanana va kona emahlweni ka n'wina; ingi mi ta wa hi tlhari, hikuva mi fularhele Yehovha; Yehovha a nga ka a nga vi na n'wina.”

⁴⁴Kambe va tikurisa, va ya khandziya enhlohlorhini ya ntshava; ntsena areka ya vumbhoni ya Yehovha yi sala na Muxe, yi nga sukangi exikarhi ka mixaxa.

⁴⁵Kavaloko Vaamaleke, ni Vakanana lava akeke entshaveni leyi, va xika, va lwa na vona, va va dlaya, va va heta, ku ya fika eHorma.