Read tsonga Tinhlayo 17 Bible Online

Tinhlayo 17 - tsonga bible

Tinhlayo 17

¹Yehovha a byela Muxe, a ku:

²“Byela vana va Israele va ku tisela tinhonga; nhonga yin'we hi nyimba ya vatata wa vona, ti ri tinhonga ta 12, ti huma eka tihosi hinkwato ta vona, hi tinyimba ta vatata wa vona; u ta tsala vito ra un'wana ni un'wana enhongeni ya yena;

³u ta tsala vito ra Aroni enhongeni ya Levhi, hikuva yi ta va nhonga yin'we hi hosi yin'wana ni yin'wana ya tinyimba ta vatatana.

⁴U ta ti veka etabernakeleni ya nhlengeletano, emahlweni ka vumbhoni, laha ndzi nga ta hlangana kona na n'wina.

⁵Munhu loyi ndzi nga ta n'wi hlawula, nhonga ya yena yi ta hluka, kutani ndzi ta hetisa ku dzumadzuma ka vana va Israele ehenhla ka n'wina.”

⁶Muxe a byela vana va Israele mhaka leyi, kutani tihosi hinkwato ta vona ti n'wi tisela tinhonga, hosi yin'wana ni yin'wana nhonga yin'we, hi tinyimba ta vatata wa vona, ti ri tinhonga ta 12; nhonga ya Aroni a yi ri exikarhi ka tin'wana.

⁷Kutani Muxe a veka tinhonga emahlweni ka Yehovha, etabernakeleni ya vumbhoni.

⁸Hi siku leri tlhandlamaka, Muxe a nghena etabernakeleni ya vumbhoni, kutani maswivo, ku hlukile nhonga ya Aroni leyi nga ya nyimba ya Levhi; yi hlukile kunene yi balekile swiluva yi vekile ni mihandzu leyi vupfeke.

⁹Muxe a teka tinhonga hinkwato emahlweni ka Yehovha, a ti neha eka vana va Israele; kuteloko va ti vonile va teka un'wana ni un'wana nhonga ya yena.

¹⁰Yehovha a ku eka Muxe: “Tlherisa nhonga ya Aroni emahlweni ka vumbhoni, yi ta hlayisiwa kona, xi ri xitsundzuxo xa vana va ku tiarisa; u ta hetisa sweswo ku dzumadzuma ka vona leswaku va nga tshuki va fa.”

¹¹Kutani Muxe a endlisa sweswo, a endla hilaha Yehovha a n'wi leriseke hakona.

¹²Kavaloko vana va Israele va ku eka Muxe: “Waswivo, hi file, hi lovile, hi lovile hinkwerhu!

¹³Un'wana ni un'wana la tshinelelaka Yindlu ya Yehovha a fa. Xana hi ta hela hinkwerhu hi ku fa xana?”