Read tsonga Tinhlayo 18 Bible Online

Tinhlayo 18 - tsonga bible

Tinhlayo 18

¹Yehovha a ku eka Aroni: “Wena ni vana va wena, ni yindlu ya tata wa wena, mi ta rhwala milandzu ya vukwetsimelo, kutani wena ni vana va wena, mi ta rhwala milandzu ya ntirho wa vuprista bya n'wina.

²U ta tshineta eka wena ni ka vamakwenu va nyimba ya Levhi, nyimba ya tata wa wena, va ta tshama na wena, va ku tirhela loko wena ni vana va wena mi yima emahlweni ka tabernakela ya vumbhoni.

³Va ta hlayisa leswi vekeriweke wena, ni swa tabernakela hinkwayo; kambe va nga tshuki va tshinelela swibya swa vukwetsimelo ni alitari, leswaku mi nga tshuki mi fa, hambi vona hambi n'wina.

⁴Va ta tshama na wena, va hlayisa leswi fanelaka ku hlayiseriwa tabernakela ya nhlengeletano, ni mitirho hinkwayo ya tabernakela; kambe ku nga vi na muluveri la nga ta mi tshinelela.

⁵Mi ta hlayisa swibya swa vukwetsimelo ni swa alitari leswaku vukari byi nga ha vi kona ehenhla ka vana va Israele.

⁶Vonani, ndzi tekile vamakwenu, vana va Levhi, exikarhi ka vana va Israele; va nyikiwile Yehovha, kambe va nyikiwile n'wina ku tirha ntirho wa tabernakela ya nhlengeletano.

⁷Loko u ri wena ni vana va wena mi ta tirha mitirho ya vuprista bya n'wina bya hinkwaswo swa alitari, ni bya leswi nga emahlweni ka xisirhelo; mi ta tirha ntirho wa n'wina kona. Vuprista bya n'wina i ntirho, leyi nga nyiko ntsena, kutani wa le handle la nga ta tshinela u ta dlawa.”

⁸Yehovha a byela Aroni, a ku: “Vona, exikarhi ka swilo hinkwaswo leswi hlawuriweke swa vana va Israele, ndzi ku nyikile leswi va ndzi pambulelaka swona, ndzi ku nyika swona wena ni vana va wena, ku va ku averiwa ka wena hi ku lerisa loku nga heriki.

⁹Leswi nga ta va swa wena exikarhi ka swilo leswi hlawuriweke, ehandle ka leswi hisiwaka, hi leswi: mihlengo hinkwayo ya vona, ni tinyiko hinkwato, ni magandzelo hinkwawo ya xidyoho, ni magandzelo hinkwawo ya ku riha, lawa va ndzi rihelaka ha wona, swilo leswi hlawuriweke ngopfu swi ta va swa wena ni swa vana va wena.

¹⁰U ta swi dya exivandleni lexo kwetsima ngopfu; wanuna un'wana ni un'wana u ta swi dya: swi ta va leswo kwetsima eka wena.

¹¹“Kambe leswi nga ta va swa wena hi leswi: leswi pamburiweke emihlengweni ya vona, ni hinkwaswo leswi ndziwitiweke swa vana va Israele; ndzi ku nyika swona ni vana va wena va xinuna ni va xisati, hi ku lerisa loku nga heriki. Un'wana ni un'wana la tengeke endlwini ya wena, u ta swi dya.

¹²Ndzi ku nyika ni swirhangana leswi va nga ta swi tisa eka Yehovha, swi ri leswo saseka hinkwaswo swa mafurha, ni leswo saseka hinkwaswo swa vhinyo ni swa mavele.

¹³Swirhangana hinkwaswo swa leswi milaka etikweni ra vona leswi va nga ta swi tisa eka Yehovha, swi ta va swa wena. Un'wana ni un'wana la tengeke endlwini ya wena, u ta swi dya.

¹⁴Swilo hinkwaswo leswi nyikiwaka Xikwembu eIsraeleni swi ta va swa wena.

¹⁵Mativula hinkwawo ya tinyama hinkwato leti va ti humeselaka Yehovha, hambi va ri vanhu, hambi swi ri swifuwo, ma ta va ya wena. Ntsena u ta kutsula mativula ya munhu, u kutsula ni mativula ya leswi nga tengangiki.

¹⁶U ta ma kutsula ma ri ya n'hweti yin'we ni lama tlulaka hi ku ringanisa kantlhanu wa tixikele, hi xikele ya vukwetsimelo, leyi nga ni tigera ta 20.

¹⁷Kambe mativula ya tihomu ni mativula ya tinyimpfu, ni mativula ya timbuti, u nga ka u nga ma kutsuli, ma hlawulekile. U ta halata ngati ya wona ealitarini, kutani u ta hisa mafurha ya wona; i gandzelo leri hisiwaka, leri nun'hwelaka eka Yehovha.

¹⁸Nyama ya wona yi ta va ya wena swin'we ni xifuva lexi ndziwitiweke, ni nenge wa xinene.

¹⁹Hinkwaswo leswi pamburiwaka eka swilo leswi hlawuriweke, leswi vana va Israele va swi pambulelaka Yehovha, ndzi ku nyikile swona wena ni vana va wena hi ku lerisa loku nga heriki. I ntwanano lowu tiyeke, lowu nga heriki emahlweni ka Yehovha, wu ri wa wena ni wa vatukulu va wena.”

²⁰Yehovha a ku eka Aroni: “U nga ka u nga kumi ndzhaka etikweni ra vona, u nga ka u nga vi na ku averiwa exikarhi ka vona; hi mina ndzi nga ku averiwa ka wena ni ndzhaka ya wena exikarhi ka vana va Israele.

²¹Loko va ri vana va Levhi, ndzi va nyikile ku pambula hinkwako ka vukhume lebyi humesiwaka eIsraeleni, yi va ndzhaka ya vona; swi ta ringaniswa ntirho lowu va wu tirhaka wu ri ntirho wa tabernakela ya nhlengeletano.

²²Kutani vana va Israele va nga ha tshineleli tabernakela ya nhlengeletano, va nga ti tshuka va tirhwexa nandzu lowu fanelaka hi rifu.

²³Valevhi va ta tirha ntirho wa tabernakela ya nhlengeletano, kutani va ta rhwala milandzu ya vona. I ku lerisa loku nga heriki etinxakeni ta tinxaka; va nga ka va nga vi na ndzhaka exikarhi ka vana va Israele.

²⁴Hikuva ku avanyisa ka vukhume loku vana va Israele va nga ta pambulela Yehovha, ndzi nyikile Valevhi, yi va ndzhaka ya vona; hikwalaho ndzi vurile leswaku va nga ka va nga vi na ndzhaka exikarhi ka vana va Israele.”

²⁵Yehovha a byela Muxe, a ku:

²⁶“U ta byela Valevhi, u ku eka vona: ‘Kutakuloko mi amukela eka vana va Israele ku pambula ka vukhume lebyi ndzi mi nyikeke hi vito ra vona leswaku yi va ndzhaka ya n'wina, mi ta pambulela Yehovha nhlengo, hi leswaku vukhume bya vukhume;

²⁷kutani ku pambula ka n'wina ku ta hlayeriwa n'wina kukotisa leswi pamburiweke emaveleni exivuyeni, ni ka leswi andzeke exikhuvutelweni.

²⁸Mi ta pamburisa sweswo na n'wina nhlengo wa Yehovha eka vukhume hinkwabyo lebyi mi nga ta byi amukela eka vana va Israele; kutani mi ta nyika nhlengo lowu wa Yehovha eka muprista Aroni.

²⁹Eswilweni hinkwaswo leswi mi nga ta nyikiwa swona, mi ta pambula nhlengo hinkwawo wa Yehovha, eka swilo hinkwaswo leswo saseka, mi ta pambula nhlengo lowu hlawuriweke.’

³⁰U ta ku eka vona: ‘Kuteloko mi pamburile leswo saseka eka swona, leswi nga ta sala, swi ta va swa Valevhi, kukotisa leswi humaka exivuyeni ni leswi humaka exikhuvutelweni.

³¹Mi ta swi dya hinkwaswo, n'wina ni va tindlu ta n'wina; hikuva i hakelo ya n'wina leyi ringanaka ntirho wa n'wina etabernakeleni ya nhlengeletano.

³²Kuteloko mi pamburile leswo saseka eka swona, mi nga ka mi nga vekeriwi nandzu ni wun'we kambe mi nga tshuki mi sandza swilo leswi hlawuriweke swa vana va Israele, mi nga ti tshuka mi fa.’ ”