Read tsonga Tinhlayo 29 Bible Online

Tinhlayo 29 - tsonga bible

Tinhlayo 29

¹“Hi n'hweti ya 7, hi siku ro rhanga ra n'hweti, mi nga va ni nhlengeletano leyi hlawuriweke; mi nga tshuki mi tirha ntirho ni wun'we lowo tika, ri ta va siku ra ku yimba tinanga eka n'wina.

²Mi ta humesa holokosta ya risuna eka Yehovha, yi va nkunzi ni khuna, ni swinyimpfana swa 7 swa lembe, swi nga ri na xivati;

³ni nyiko ya mapa layo saseka, lama pfuviweke hi mafurha: ku avanyisa ka vukhume loku hlayiwaka kanharhu ku va ka nkunzi ni ku avanyisa ka vukhume loku hlayiwaka kambirhi eka khuna,

⁴ni ku avanyisa ka vukhume ka xinyimpfana xin'wana ni xin'wana.

⁵Mi ta humesa ni xiphongo xa gandzelo ra vudyoho; mi tiphahlela mhamba ha xona.

⁶Mi ta swi humesa ehenhla ka holokosta ya n'weti ni nyiko ya yona, ni le henhla ka holokosta leyi nga heriki ni nyiko ya yona, ni vucheleto bya swona, hi nawu wa swona; i gandzelo leri hisiwaka hi ndzilo, leri nga ni risuna leri nun'hwelaka eka Yehovha.

⁷“Hi siku ra khume ra n'hweti leyi ya 7, mi ta va ni nhlengeletano leyi hlawuriweke, mi ta tsongahata mimoya ya n'wina, mi nga tshuki mi tirha ntirho ni wun'we;

⁸mi ta humesela Yehovha holokosta ri va risuna; yi va nkunzi, ni khuna, ni swinyimpfana swa 7 swa lembe: mi swi teka swi nga ri na xivati.

⁹Nyiko ya swona yi ta va ya mapa layo saseka, lama pfuviweke hi mafurha: ku avanyisa ka vukhume loku hlayiweke kanharhu ku va ka nkunzi;

¹⁰ni ku avanyisa ka vukhume loku hlayiweke kambirhi eka khuna, ni ku avanyisa ka vukhume eka xinyimpfana xin'wana ni xin'wana xa swinyimpfana swa 7;

¹¹mi ta humesa ni xiphongo xa gandzelo ra vudyoho, ehandle ka gandzelo ra ku riha, ni holokosta ya masiku, ni nyiko ya yona, ni vucheleto bya swona.

¹²“Hi siku ra 15 ra n'hweti ya 7, mi ta va ni nhlengeletano leyi hlawuriweke, mi nga tshuki mi tirha ntirho lowo tika, kambe hi masiku ya 7 mi ta endlela Yehovha nkhuvo.

¹³Mi ta humesa holokosta, ri va gandzelo leri hisiwaka ni risuna eka Yehovha, tinkunzi ta 13, ni makhuna mambirhi, ni swinyimpfana swa 14 swa lembe, leswi nga riki na xivati.

¹⁴Nyiko ya swona yi ta va ya mapa layo saseka lama pfuviweke hi mafurha: ku ri ku avanyisa ka vukhume loku hlayiweke kanharhu eka nkunzi yin'wana ni yin'wana ya tinkunzi leta 13, ni ku avanyisa ka vukhume loku hlayiweke kambirhi, eka khuna rin'wana ni rin'wana ra makhuna lamambirhi,

¹⁵ni ku avanyisa ka vukhume ka xinyimpfana xin'wana ni xin'wana xa swinyimpfana swa 14;

¹⁶mi ta humesa ni xiphongo xa gandzelo ra vudyoho ehandle ka holokosta ya masiku, ni nyiko ya yona, ni vucheleto bya yona.

¹⁷“Hi siku ra vumbirhi mi ta humesa tinkunzi ta 12, ni makhuna mambirhi, ni swinyimpfana swa 14 swa lembe, leswi nga riki na xivati;

¹⁸mi ta humesa ni tinyiko ni vucheleto, swi ri swa tinkunzi ni swa makhuna ni swa swinyimpfana hi ntsengo wa swona, ni nawu wa swona;

¹⁹ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

²⁰“Hi siku ra vunharhu, tinkunzi ta 11 ni makhuna mambirhi, ni swinyimpfana swa 14, swa lembe, leswi nga riki na xivati,

²¹ni tinyiko ni vucheleto, swi ri swa tinkunzi, ni swa makhuna, ni swa swinyimpfana, hi ntsengo wa swona, ni nawu wa swona;

²²ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya vona.

²³“Siku ra vumune, tinkunzi ta khume, ni makhuna mambirhi ni swinyimpfana swa 14 swa lembe;

²⁴ni tinyiko ni vucheleto, swi ri swa tinkunzi ni swa makhuna, ni swa swinyimpfana, hi ntsengo wa swona, ni nawu wa swona,

²⁵ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya yona.

²⁶“Hi siku ra vuntlhanu, tinkunzi ta 9, ni makhuna mambirhi, ni swinyimpfana swa 14, swa lembe, leswi nga riki na xivati;

²⁷ni tinyiko ni vucheleto, swi ri swa tinkunzi, ni swa makhuna, ni swa swinyimpfana hi ntsengo wa swona, ni nawu wa swona;

²⁸ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

²⁹“Hi siku ra ntlhanu na rin'we, tinkunzi ta 8, ni makhuna mambirhi, ni swinyimpfana swa 14, swa lembe, leswi nga riki na xivati;

³⁰ni tinyiko ni vucheleto, swi ri swa tinkunzi, ni swa makhuna, ni xa swinyimpfana, hi ntsengo wa xona, ni nawu wa swona;

³¹ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

³²“Hi siku ra ntlhanu na mambirhi, tinkunzi ta 7, ni makhuna mambirhi, ni swinyimpfana swa 14, swa lembe, leswi nga riki na xivati;

³³ni nyiko ni vucheleto, swi ri swa tinkunzi ni swa makhuna, ni swa swinyimpfana, hi ntsengo wa swona, ni nawu wa swona;

³⁴ni xiphongo xa gandzelo ra vudyoho, ehandle ka holokosta ya masiku ni nyiko ya yona, ni vucheleto bya yona.

³⁵“Hi siku ra ntlhanu na manharhu, mi ta va ni nhlengeletano leyi hlawuriweke, mi nga tshuki mi tirha ntirho ni wun'we lowo tika;

³⁶mi ta humesa holokosta, ri va gandzelo leri hisiwaka ra risuna eka Yehovha, nkunzi, ni khuna, ni swinyimpfana swa 7 swa lembe, leswi nga riki na xivati,

³⁷ni nyiko, ni vucheleto; swi ri swa nkunzi ni swa khuna ni swa swinyimpfana hi ntsengo wa swona, ni nawu wa swona,

³⁸ni xiphongo xa gandzelo ra vudyoho, ehandle ka holokosta ya masiku, ni nyiko ya yona, ni vucheleto bya yona.

³⁹“Hi swona leswi mi nga ta humesela Yehovha emikhubyeni ya n'wina, ehenhla ka magandzelo lawa mi ma humesaka ku tiyisa ku hlambanya ka n'wina, ni mihlengo ya ku tirhandzela ka n'wina, ti ri tiholokosta, ni tinyiko, ni vucheleto, ni magandzelo ya ku khensa.”