Read tsonga Tinhlayo 31 Bible Online

Tinhlayo 31 - tsonga bible

Tinhlayo 31

²“Rihisela vana va Israele eka Vamidiyani; kutani u ta rhurhela eka varikwenu.”

³Kutani Muxe a byela tiko, a ku: “Vavanuna exikarhi ka n'wina va ta hloma va huma nyimpi, va ya hlasela Midiyani ku rihisela Yehovha eka Vamidiyani.

⁴Mi ta rhuma enyimpini vavanuna va 1 000 hi nyimba yin'wana ni yin'wana ya Vaisraele, va ta huma etinyimbeni hinkwato.”

⁵Ku hume vanhu va 1 000, enyimbeni yin'wana ni yin'wana exikarhi ka magidi ya Israele va ri vavanuna va 12 000 lava hlomeke ku huma nyimpi.

⁶Muxe a va rhuma eku lweni, va ri na Finiyasi, n'wana Eliyazara, muprista, a tamele swibya leswi hlawuriweke, ni tinanga leto pfuma.

⁷Va ya lwa na Midiyani hilaha Yehovha a leriseke Muxe hakona; va dlaya vavanuna hinkwavo.

⁸Va dlaya ni tihosi ta Midiyani a ri Evhi, na Rekemu, na Suru, na Huru, na Reba, ti ri tihosi ta ntlhanu ta Midiyani; va dlaya hi tlhari na Balaama, n'wana Beyori.

⁹Vana va Israele va khoma vavasati va Midiyani ni swihlangi swa vona; va teka ni swifuwo swa vona hinkwaswo, ni mitlhambi ya vona hinkwayo, ni rifuwo ra vona hinkwaro.

¹⁰Kutani va hisa miti hinkwayo leyi va akeke eka yona, ni mixaxa hinkwayo ya vona.

¹¹Va teka xuma ni hinkwaswo leswi va swi khomeke, hambi vanhu hambi swifuwo.

¹²Kutani va tisa eka Muxe ni ka Eliyazara muprista ni ka nhlengeletano hinkwayo ya vana va Israele, vakhomiwa, ni leswi va swi khomeke ni xuma, va swi tisa emixaxeni, erivaleni ra Mowabu, ekusuhi na Yordani na Yeriko.

¹³Muxe na Eliyazara, muprista ni tihosi hinkwato ta nhlengeletano va huma ku ya hlangana na vona ehandle ka mixaxa.

¹⁴Kavaloko Muxe a karihela tindhuna ta nyimpi ti ri tindhuna ta magidi ni tindhuna ta madzana leti vuyeke eku lweni.

¹⁵Muxe a ku eka vona: “Xana mi tshikile vavasati hinkwavo va hanya xana?

¹⁶Kasi hi vona loko va byeriwe i Balaama, lava susumeteke vana va Israele ku dyohela Yehovha emhakeni ya Peyori kutani ku humelele ntungu enhlengeletanweni ya Yehovha.

¹⁷Sweswi, dlayani wanuna un'wana ni un'wana exikarhi ka swihlangi, mi dlaya ni vavasati hinkwavo lava tivaneke ni vavanuna.

¹⁸Kambe vanhwanyana lava nga tivanangiki ni vavanuna mi va tshika va hanya, va ta va va n'wina.

¹⁹Loko mi ri n'wina, mi ta gova masiku ya 7 ehandle ka mixaxa, hinkwenu lava mi dlayeke munhu ni hinkwenu lava mi khumbeke mufi, mi ta tibasisa siku ra vunharhu, ni siku ra vu-7, mi ri n'wina ni vakhomiwa va n'wina.

²⁰Mi ta basisa tinguvu hinkwato, ni madzovo hinkwawo, ni hinkwaswo leswi lukiweke hi mavoya ya timbuti, ni swibya hinkwaswo swa ku vatliwa.”

²¹Eliyazara, muprista, a ku eka vanhu va nyimpi lava humeke eku lweni: “Hi kona ku lerisa ka nawu lowu Yehovha a wu leriseke Muxe.

²²Loko wu ri nsuku, ni silivhere, ni koporo, ni nhumbu, ni thini, ni ntsopfu,

²³hinkwaswo leswi nga tshwiki endzilweni, mi ta swi nghenisa endzilweni, kutani swi ta va swi tengile; hambiswiritano swi ta basisiwa hi mati ya ku basisa. Hinkwaswo leswi nga tshwaka endzilweni, mi ta swi nghenisa ematini.

²⁴Mi ta hlantswa tinguvu ta n'wina hi siku ra vu-7, kutani mi ta tenga; kavaloko mi ta nghena emixaxeni.”

²⁵Yehovha a ku eka Muxe:

²⁶“Hlaya leswi khomiweke, vanhu ni swifuwo, u swi hlaya u ri na Eliyazara, muprista, ni tihosi ta tindlu ta nhlengeletano.

²⁷Kutani u ta avanyisa leswi khomiweke exikarhi ka lava hlomeke, lava humeke nyimpi, ni nhlengeletano hinkwayo.

²⁸U ta pambulela Yehovha nhlengo eku averiweni ka lava hlomeke, lava humeke nyimpi, nhloko yin'we hi ntlhanu wa madzana, hambi vanhu, hambi tihomu, ni timbhongolo, ni swifuwo leswitsongo.

²⁹Mi ta swi pambula ehenhla ka hafu ya leswi va swi kumeke, kutani u ta swi nyika Eliyazara, muprista, wu va nhlengo lowu pambuleriweke Yehovha.

³⁰Eku avanyisiweni ka vana va Israele, u ta pambula nhloko yin'we eka ntlhanu wa makume, hambi vanhu, hambi tihomu, ni timbhongolo, ni swifuwo leswitsongo, ni leswi hanyaka hinkwaswo; u ta swi nyika Valevhi lava hlayisaka yindlu ya Yehovha.”

³¹Muxe na Eliyazara va endla hilaha Yehovha a leriseke Muxe hakona.

³²Leswi khomiweke, swi ri leswi seleke swa xuma lexi vanhu va nyimpi va xi tekeke, a ti ri tinhloko ta swifuwo leswitsongo ta 675 000 ni tihomu ta 72 000,

³³ni timbhongolo ta 61 000;

³⁴ni vanhu, va nga vavasati lava nga tivanangiki na vavanuna, va 32 000.

³⁵Hafu ya swona ku ve ku averiwa ka lava humeke nyimpi,

³⁶a swi ri swifuwo leswitsongo swa 337 500;

³⁷ni nhlengo wa Yehovha wa swifuwo leswitsongo a swi ri swa 675;

³⁸hafu ya tihomu, ti ri ta 36 000, ni nhlengo wa Yehovha wa tihomu ti ri ta 72;

³⁹hafu ya timbhongolo, ti ri ta 30 500, ni nhlengo wa Yehovha wa timbhongolo ti ri ta 61,

⁴⁰hafu ya vanhu, va ri va 16 000, ni nhlengo wa Yehovha wa vanhu va ri va 32.

⁴¹Kutani Muxe a nyika Eliyazara muprista, nhlengo lowu pambuleriweke Yehovha, hi laha Yehovha a leriseke Muxe hakona.

⁴²Loko yi ri hafu leyi averiweke vana va Israele, leyi Muxe a yi avanyiseke ni leyi ya vanhu va nyimpi,

⁴³ku averiwa ka nhlengeletano a swi ri swifuwo leswitsongo swa 337 500;

⁴⁴ri swifuwo leswikulu swa 36 000;

⁴⁵ni timbhongolo ta 30 500;

⁴⁶ni vanhu va 16 000.

⁴⁷Eka hafu ya vana va Israele, Muxe a pambula nhloko yin'we eka tinhloko ta 50 ta vanhu ni ta swifuwo; kutani a ti nyika Valevhi lava hlayisaka yindlu ya Yehovha, hilaha Yehovha a leriseke Muxe hakona.

⁴⁸Kavaloko tindhuna ta makume ya madzana ta nyimpi, ti ri tindhuna ta makume ya madzana ni ta madzana, ti ta ka Muxe, ti ku eka yena:

⁴⁹“Hina, malandza ya wena, hi hlayile vanhu va nyimpi lava nga ehansi ka hina, kutani a ku pfumariwi munhu exikarhi ka hina.

⁵⁰Kutani hi tisile nhlengo wa Yehovha, un'wana ni un'wana leswi a swi kumeke, swi ri swilo swa nsuku, tiketananyana, ni masindza, ni swingwavila ni swingwavila swa tindleve, ni tintlhama, hi ta tiphahlela ha swona mhamba emahlweni ka Yehovha.”

⁵¹Muxe na Eliyazara, muprista, va amukela eka vona nsuku lowu, swi ri hinkwaswo swa mitirho leyo saseka.

⁵²Nsuku hinkwawo lowu pamburiweke lowu va wu humeseleke Yehovha, a wu ri wa tixikele ta 16 750, swi huma eka tindhuna ta makume ya madzana, ni ka tindhuna ta madzana.

⁵³Vanhu va nyimpi va tihlayisele un'wana ni un'wana leswi a swi phangeke.

⁵⁴Kavaloko Muxe na Eliyazara, muprista, va teka nsuku wa tindhuna ta makume ya madzana ni ta madzana, kutani va wu tisa etabernakeleni ya nhlengeletano, swi va xitsundzuxo xa vana va Israele emahlweni ka Yehovha.