Read tsonga Tinhlayo 34 Bible Online

Tinhlayo 34 - tsonga bible

Tinhlayo 34

¹Yehovha a byela Muxe, a ku:

²“Lerisa vana va Israele, u ku eka vona: Kutakuloko mi nghenile etikweni ra Kanana, hi rona tiko leri nga ta va ndzhaka ya n'wina: i tiko ra Kanana, hi mindzilekana ya rona.

³“Tlhelo ra le dzongeni, ri sungula emananga ya Sini, ku ya fika eEdomu, kutani ndzilakana wa n'wina wa le dzongeni wu ta sungula emakun'wini ya Lwandle-ra-ku-fa, evuxeni;

⁴ndzilakana wu ta rhendzeleka edzongeni hi ndlela leyi tlhandlukaka ya Akrabimi, kutani wu ta hundzela Sini, wu ya fika edzongeni, eKadexe-Bariniya; kutani wu ta kongoma eHasari-Adara, wu tsemakanya Asimoni.

⁵Ku suka eAsimoni, ndzilakana wu ta kongoma exinambyana xa Egipta, wu ya fika eLwandle.

⁶“Ndzilakana wa n'wina wa vupeladyambu ri ta va Lwandle Lerikulu: hi wona ndzilakana wa n'wina wa vupeladyambu.

⁷“Ndzilakana wa n'wina, wa le n'walungwini, hi lowu. Ku suka eLwandle Lerikulu, mi ta wu fikisa entshaveni ya Hori;

⁸loko mi suka entshaveni ya Hori, mi ta wu fambisa hi ndlela ya Hamata, kutani ndzilakana wu ta ya fika eSedada;

⁹wu ta hundza eZifironi, kutani wu ta fika eHasari-Enana: hi wona ndzilakana wa n'wina wa le n'walungwini.

¹⁰“Mi ta pandza ndzilakana wa n'wina wa le vuxeni, ku suka eHasari-Enana ku ya fika eXefamu;

¹¹kutani ndzilakana wu ta suka eXefamu, wu rhelela eRibila, evuxeni bya Ayini; ndzilakana wu ta rhelela, wu lulama hi Lwandle ra Kinereta, evuxeni;

¹²kutani ndzilakana wu ta rhelela eYordani, wu ya fika eLwandle-ra-ku-fa. Hi rona tiko ra n'wina ni mindzilekana ya rona ematlhelweni hinkwawo.”

¹³Muxe a lerisa vana va Israele, a ku: “Hi rona tiko leri mi nga ta ri averiwa hi vuhlolotwana, leri Yehovha a leriseke ku ri nyika tinyimba ta ntlhanu na mune ni hafu.

¹⁴Hikuva nyimba ya vana va Rhuveni, hi tindlu ta vatata wa vona, ni nyimba ya vana va Gadi, hi tindlu ta vatata wa vona, ni hafu ya nyimba ya vana va Manase va tekile ndzhaka ya vona.

¹⁵“Tinyimba letimbirhi ni hafu ya nyimba, va tekile ndzhaka ya vona ehase ka Yordani, ni wa Yeriko, evuxeni.”

¹⁶Kutani Yehovha a byela Muxe, a ku:

¹⁷“Hi wona mavito ya vavanuna lava nga ta mi avanyisela tiko: Eliyazara, muprista, na Yoxuwa, n'wana Nuni;

¹⁸mi ta teka ni hosi yin'we hi nyimba yin'wana ni yin'wana ku mi avanyisela tiko.

¹⁹Hi wona mavito ya vanhu lava:

²⁰“wa nyimba ya Yuda: Kalebe n'wana Yefune; wa nyimba ya vana va Simiyoni: Xemuwele, n'wana Amihudi:

²¹wa nyimba ya Benjamini: Elidada n'wana Kisiloni;

²²wa nyimba ya vana va Dani: hosi Buki, n'wana Yogili;

²³wa vana va Yosefa, wa nyimba ya vana va Manase: hosi Haniele, n'wana Efodi;

²⁴wa nyimba ya vana va Efrayimi: Hosi Kemuwele, n'wana Xifitani;

²⁵wa nyimba ya vana va Zebuloni hosi Elisafani, n'wana Parinaka;

²⁶wa nyimba ya vana va Isakara: hosi Palatiele, n'wana Azana;

²⁷wa nyimba ya vana va Asere: hosi Ahihudu, n'wana Xelomi;

²⁸wa nyimba ya vana va Neftali: hosi Padahele, n'wana Amihudi.”

²⁹Hi vona lava Yehovha a va leriseke ku avanyisela vana va Israele tiko ra Kanana.