Read tsonga Mikiya 3 Bible Online

Mikiya 3 - tsonga bible

Mikiya 3

¹Kutani ndzi ri: Yingisani, n'wina tihosi ta yindlu ya Yakobo, na n'wina tihosi ta Israele! Xana a hi n'wina mi fanelaka ku tiva leswi lulameke?

²N'wina, mi vengaka vunene, mi rhandza swo biha, mi xindlaka vanhu miri, mi susa ni nhlonge henhla ka marhambu va vona?

³Va dya nyama ya vanhu va tiko ra mina, va yevula nhlonge va faya ni marhambu ya vona, va pulukanya swange va longela embiteni, va gavela ni nyama ya vona, swange va ya longela embiteni leyikulu.

⁴Enkarhini lowo va ta huwelela eka Yehovha, kambe a nga va yingisi; u ta va fihlela mombo wa yena enkarhini lowo, hikuva va onhile ku famba ka vona.

⁵Ku vula Yehovha ematshan'weni ya vaprofeta lava xisaka tiko ra mina, volavo, loko va ha nhlampfunha hi meno va vula ku rhula, kambe loko va nga nyikiwanga nchumu, va ri pfuxela nyimpi.

⁶Hikwalaho mi ta humeleriwa hi vusiku, ku nga ri hi ku vona; mi ta va ni munyama, ku nga ri ku hlavutelwa! Dyambu ri ta pelela vaprofeta, ni ku vonakala ka nhlekanhi ku ta endla ntima ehenhla ka vona.

⁷Vavoni va ta tsana, vangoma va ta khomiwa hi tingana, kutani va ta fihla malebvu ya vona hikuva a ku na nhlamulo leyi humaka eka Xikwembu.

⁸Kambe mina, ndzi tele matimba, ndzi tele Moya wa Yehovha, ni ku lulama ni vunhenha, swi ri leswaku ndzi ta byela Yakobo ku tlhela ka yena, na Israele, xidyoho xa yena.

⁹Yingisani, n'wina tihosi ta yindlu ya Yakobo, na n'wina, tihosi ta Israele, n'wina mi sandzaka ku lulama, mi hundzuluxaka eka hinkwaswo leswi lulameke;

¹⁰n'wina mi akaka Siyoni hi ngati, na Yerusalema, hi ku homboloka.

¹¹Tihosi ta yena ti avanyisa hi ku lava tinyiko, ni vaprista va dyondzisa hi ku lava hakelo, ni vabvumbi va bvumbhela mali; va tikhomelela ha Yehovha, va ku: “Xana Yehovha a nga le xikarhi ka hina xana? Ku biha ku nga ka ku nga fiki exikarhi ka hina!”

¹²Hikwalaho ka nandzu wa n'wina, Siyoni u ta rimiwa kukota nsimu, Yerusalema, u ta kotisa nhulu ya maribye, ni ntshava ya yindlu ya Yehovha yi hundzuka ntshava leyi teleke hi mirhi.