Read tsonga Mikiya 6 Bible Online

Mikiya 6 - tsonga bible

Mikiya 6

¹Yingisani leswi vuriwaka hi Yehovha: “Yima, u vulavula emahlweni ka tintshava; ni switsunga, a swi yingise rito ra wena!

²N'wina tintshava, yingisani ku rhamba ka Yehovha, yingisani, n'wina, masungulo layo tiya ya misava; hikuva ku rhamba ku kona exikarhi ka Yehovha ni tiko ra yena, u ta tenga na Israele:

³Tiko ranga, ndzi endle yini eka wena? Xana ndzi ku pfukile ha yini?

⁴Ndzi hlamule! Ndzi ku humesile etikweni ra Egipta, ndzi ku kutsurile endlwini ya vukhumbi, ndzi ku rhangele emahlweni ha va Muxe, na Aroni, na Meriyamu.

⁵Tiko ranga, anakanya makungu lawa Balaka, hosi ya Mowabu ingi a ma lunghisile, ni leswi Balaama, n'wana Beyori, a n'wi hlamuleke swona, ni leswi humeleleke Xitimi ku ya fika eGiligala, u ta tiva ku endla ka Yehovha loku lulameke.”

⁶Ndzi ta hlanganisa Yehovha ha yini ndzi va ndzi korhama exivandleni lexi tlakukeke xa Xikwembu? Xana ndzi ta n'wi hlanganisa hi magandzelo lama hisiwaka, ni marhole ya lembe rin'we?

⁷Xana Yehovha u ta tsakisiwa hi makhuna ya makume ya madzana, ni madzana ya madzana ya milambu ya mafurha? Xana ndzi ta humesa n'wana wa mina wa mativula ematshan'weni ya ku homboloka ka mina ni loyi a humeke ekhwirini ra mina hikwalaho ka xidyoho xa moya wa mina?

⁸Wena munhu u tivisiwile leswi lulameke, ni leswi Yehovha a swi lavaka eka wena; hileswaku u endla leswi lulameke, u rhandza tintswalo, ni ku famba hi ku titsongahata emahlweni ka Xikwembu xa wena.

⁹Rito ra Yehovha ri huwelele muti; kutani la nga ni vutlhari u ta chava vito ra wena! “Yingisani nhonga ni loyi a yi leriseke.

¹⁰Xana rifuwo lero biha ra ha ri kona endlwini ya la nga lulamangiki, ni ku pima loku hungutiweke, loku rhukaniweke?

¹¹Xana ndzi nga va la baseke, loko ndzi pima hi xikalo xa ku homboloka, ndzi ri ni maribye ya ku xisa enkwameni?

¹²Vafuwi va muti wolowo va tele ku xisa ni vaaki va wona va vulavula mavunwa; ririmi ra vona ra kanganyisa enon'wini wa vona.

¹³Loko ndzi ri mina, ndzi ta ku vavisa hi ku ku ba, ndzi ku onha hikwalaho ka ku dyoha ka wena.

¹⁴U ta dya, kambe u nga ka u nga xurhi, ndlala yi ta sala endzeni ka wena; u ta rhwala xuma kambe xi nga ka xi nga poni; lexi u nga xi ponisaka, ndzi ta xi nyiketa tlhari!

¹⁵U ta byala, kambe u nga ka u nga tshoveri; u ta khuvuta mihandzu ya mitlhwari, kambe a ku nga toli mafurha ya yona; u ta kama mihandzu ya tivhinya, kambe a ku nga nwi vhinyo.

¹⁶Ku karhi ku hlayisiwa ku lerisa ka Omri, ni mikhuva hinkwayo ya yindlu ya Akabu. Mi ya hi makungu ya vona leswaku ndzi ku nyiketa eku onhakeni, ni lava akeke emutini va ve xisandzu, kutani mi ta rhwala xisandzu xa tiko ra mina.”