Read tsonga Nahumu 2 Bible Online

Nahumu 2 - tsonga bible

Nahumu 2

¹Wena, Ninivha, u hlomeriwa hi la nga ta ku hangalasa, hlayisa khokholo, risa tindlela, titiyise xisuti u tinyika matimba lamakulu!

²Hikuva Yehovha u ta tiyisa ku kwetsima ka Yakobo, ku nga ku kwetsima ka Israele; hikuva vaonhi va onhile va hetile marhavi ya vhinya ya vona.

³Switlhangu swa tinhenha ta yena swi tshwukile; vakarihi va yena va funengele scarlet; tinsimbhi ta tigolonyi ta hatima kukotisa ndzilo esikwini lero a hlomaka ha rona; matlhari ya vona ma hatimisiwa.

⁴Tigolonyi ti tsutsuma hi matimba etindleleni; ti tsutsuma erivaleni; ti languteka tanihi swisa; ti hatima kukotisa rihati.

⁵Ninivha wa anakanya vatlhavani va yena, va khunguvanyeka eku fambeni ka vona, va tsutsumela erirhangwini ra yena, va lunghisa xisirheleto.

⁶Tinyangwa ta milambu ta pfuriwa! Yindlu ya vuhosi ya mbundzuka!

⁷Swi herile: Ninivha u phangiwile, u yisiwe ekule; malandza ya yena ya xisati ma rila hi swirilo leswi kotisaka swa matuva, loko ma tiba swifuva.

⁸Emikarhini ya khale Ninivha a kotisa mati lamanyingi ya tiva; kambe sweswi va tsutsuma, va ku: “Yimani, yimani,” kambe ku nga ri na loyi a langutaka endzhaku.

⁹Phangani silivhere, mi phanga ni nsuku. A swi na ku hela exumeni xa swilo leswi hlayisiweke; i tinyandzanyandza ta mitirho hinkwayo leyi navetaka.

¹⁰Ka byisiwa, ka phangiwa, ka onhiwa! Mbilu ya n'oka, matsolo ma gudlagudla, swisuti hinkwaswo swi khomiwe hi ku vaviseka, mimombo hinkwayo yi ondzile!

¹¹Vukale bya tinghala byi kwihi, lebyi ingi tinghalanyana ti dyela eka byona, laha ingi ku rhata nghala ya matsune ni ya ntswele, ni swivanana swa nghala, ku nga ri na la nga ti chavisaka?

¹²Nghala leyi a yi handzulela swivanana swa yona, yi kamanyetela tinghala ta tintswele ta yona, yi va yi tata mabakwa ya yona hi nyama yi tata ni mikale ya yona hi mitsumbu leyi handzuleriweke!

¹³Vona, ndzi ta eka wena, ku vula Yehovha wa mavandla; ndzi ta hisa tigolonyi ta wena, ndzi ma hundzula musi, kutani tinghalanyana ta wena ti ta dyiwa hi fumu. Ndzi ta susa leswi phangiweke swa wena emisaveni, kutani rito ra varhumiwa va wena a ri nga ha twakali.