Read tsonga Habakuku 3 Bible Online

Habakuku 3 - tsonga bible

Habakuku 3

¹Xikhongelo xa muprofeta Habakuku; (xi ta yimbeleriwa hi mukhuva wa xirilo.)

²Yehovha, ndzi ti tivile timhaka ta wena, ndzi vuya ndzi chava! Oho Yehovha, ntirho wa wena u wu fikisa exikarhi ka malembe; u wu kombisa exikarhi ka malembe! Eku kariheni u tsundzuka ku tsetselela!

³Xikwembu xa ta, xi pfa le Temani, Mukwetsimi u pfa entshaveni ya Parani! Ku kwetsima ka yena ku funengete matilo, misava yi tele ku dzuna ka yena.

⁴Ku humelela ku kwetsima loku ngi i ka dyambu; miseve ya ku vonakala yi pfa eka yena; hilaha matimba ya yena ma fihliweke kona.

⁵U rhangeriwa emahlweni hi ntungu, rifu leri hisaka ri n'wi landza hi le ndzhaku.

⁶A yima, kutani a pima misava; a languta, kutani a rhurhumerisa matiko; tintshava ta khale ti mbundzuka, switsunga swa khale swi byatsama. Tindlela ta yena i ta khalekhale.

⁷Ndzi vone mitsonga ya Etiyopiya yi yimile hi khombo, ku rhurhumela ni tinguvu ta matende ya tiko ra Midiyani.

⁸Xana Yehovha u karihele milambu-ke? Xana vukari bya yena byi pfurhele milambu? Kumbe u karihela lwandle, loko u famba hi tihanci ta wena, ni tigolonyi ta wena ta ku ponisa xana?

⁹Vurha bya wena byi tshunxiwile, byi le rivaleni; miseve ya wena i marito ya wena lawa u ma vuleke.

¹⁰U handzula misava ku yi hundzula milambu. Tintshava ta ku vona, kutani ta tsekatseka; ku hundza ndhambi ya mati swidziva swi tlakusa rito ra swona, swi yimisela mavoko ya swona ehenhla.

¹¹Dyambu ni n'weti swi yima exivandleni xa swona hi ku tshuka ku vangama ka miseve ya wena loko yi hundza, ni ku kwetsima ka fumu ra wena loku hatimaka.

¹²U handzula tiko hi ku kariha, u kandziyela tiko hi vukari.

¹³U humela ku ponisa tiko ra wena, ku ponisa mutotiwa wa wena! U faya xihlungwana xa yindlu ya lowo biha, u va u mbundzuxa masungulo ya yona u yi onha ku fika elwangwini.

¹⁴Hi miseve ya wena, u tlhava tinhloko ta tinhenha ta yena, lava taka kukotisa xidzedze ku ta hi hangalasa, lava veke va tsakisisa ingi hiloko va dya swisiwana exihundleni.

¹⁵U famba ehenhla ka lwandle hi tihanci ta wena, ehenhla ka magandlati ya mati lamakulu.

¹⁶Ndzi swi twile, kutani miri wa mina wu rhurhumela; eritweni rolero, milomu ya mina yi tsekatseka, ku bola ku nghena emarhambyini ya mina, ndzi ri karhi ndzi rhurhumela, loko ndzi fanekele ku languta ndzi wisile siku lero ra khombo, siku leri tiko ri nga ta hlomeriwa hi la nga ta ta ri hlasela.

¹⁷Hikuva nkuwa wu nga ka wu nga baleki, ni vhinya yi nga ka yi nga veki nchumu; mihandzu ya mutlhwari a yi nga ha vi kona, masimu ma nga ka ma nga humesi swakudya; tinyimpfu ti ta pfumaleka ematshangeni, a ku nga ha vi na tihomu eswitaleni.

¹⁸Kambe mina, ndzi ta titsakela eka Yehovha, ndzi tsakisisa eka Xikwembu xa ku ponisiwa ka mina.

¹⁹Yehovha, yena Hosi, i matimba ya mina; u ta hundzuluxa milenge ya mina, yi kotisa ya swiharhi; u ta ndzi fambisa eswitsungeni swa mina. Eka n'wini wa xiyimbeleri; hi magupu ya mina.