Read tsonga Sofaniya 2 Bible Online

Sofaniya 2 - tsonga bible

Sofaniya 2

¹Tiyingiseleni, tiyingiseleni, n'wina vanhu va tiko leri nga riki na tingana, makungu ya Yehovha ma nga si tswala,

²ku nga si ta siku lero kukotisa mungu lowu hahisiwaka vukari bya ku pfurha ka Yehovha byi nga si ta eka n'wina hi siku ra vukari bya Yehovha.

³Lavani Yehovha, n'wina, vatitsongahati hinkwavo va tiko, lava endlaka hi ku lerisa ka yena, lavani ku lulama, mi lava ku titsongahata; kumbe mi ta tifihla esikwini ra vukari bya Yehovha.

⁴Hikuva Gaza u ta sukeriwa, Axikeloni a hundzuka mananga; Axidodo, va ta n'wi hlongola ninhlekanhi lowukulu; Ekroni a tsuvuriwa.

⁵Va ni khombo lava akeke etikweni leri nga etlhelweni ra lwandle, tiko ra Vakereti! Rito ra Yehovha ri kona ehenhla ka wena, Kanana, tiko ra Vafilista; ndzi ta ku lovisa, u va u pfumala ni la nga ta aka eka wena!

⁶Tiko leri hambaneke ni lwandle ri ta hundzuka vudyelo, ni vuako bya varisi, ni matshanga ya tinyimpfu.

⁷Ri ta va tiko ra nsalo wa yindlu ya Yuda; va ta dyisela mitlhambi ya vona kona; nimadyambu, va etlela etindlwini ta Axikeloni; hikuva Yehovha, Xikwembu xa vona, u ta va endzela, a tlherisela vabohiwa va vona.

⁸“Ndzi twile ku sandza ka Mowabu ni tinhlambha ta vana va Amoni lava sandzeke tiko ra mina, va tikurisa hi le ndzilakaneni wa vona.”

⁹Hikwalaho, Yehovha wa mavandla, Xikwembu xa Israele, u ri: “Ndza hanya, ndzi ri, Mowabu u ta kotisa Sodoma, vana va Amoni va kotisa Gomora, yi nga ndzhaka ya mitwa, ni migodi ya munyu, ni mananga hilaha ku nga heriki; nsalo wa tiko ra mina wu ta va phanga, ni lava seleke va tiko ra mina va ta va fuma hi mukhuva wa ndzhaka.”

¹⁰Leswo swi ta va humelela hikwalaho ka ku tikukumuxa ka vona; hikuva va sandzile, kutani va tikukumuxela ehenhla ka tiko ra Yehovha wa mavandla.

¹¹Yehovha u ta chavisa ehenhla ka vona, hikuva u ta herisa swikwembu hinkwaswo swa misava; va ta ta n'wi khinsamela, un'wana ni un'wana hi ku suka exivandleni xa yena, swi nga swihlale hinkwaswo swa matiko.

¹²Na n'wina Vakuxi, mi ta va lava dlayiweke hi fumu ra mina!

¹³Kambe Yehovha u ta tshambulutela voko ra yena hitlhelo ra n'walungu, a dlaya Asiriya, a hundzula Ninivha rhumbi ni ku oma loku kotisaka mananga!

¹⁴Mitlhambi yi ta etlela ehansi exikarhi ka wona; tinxaka hinkwato ta swiharhi leto tala, mampfana, ni tinhloni, swi ta etlela exikarhi ka timhandze ta kona; ku twakala nyanyana leyi yimbaka noti efasitereni; enyangweni i tinhulu ta swilo leswi mbundzukeke, hikuva Yehovha u veke mapulangi ya tikedari exikombisweni.

¹⁵Hi wona muti lowu tsakisiseke ingi wu tshamisile hi ku rhula, lowu ingi wu ku embilwini ya wona: “Hi mina ntsena, a ku na wumbe!” Wu hundzukise ku yini rhumbi laha ku etlelaka swiharhi kona xana? Un'wana ni un'wana la hundzaka emahlweni ka wona u ta yimba noti, a va a tsekatsekisa voko.