Read tsonga Hagayi 2 Bible Online

Hagayi 2 - tsonga bible

Hagayi 2

¹Hi n'hweti ya ntlhanu na timbirhi, hi siku ra makume mambirhi na rin'we ra n'hweti, rito ra Yehovha ri va kona hi muprofeta Hagayi, ri ku:

²“Vulavula sweswi, eka Zerubabele, mufumi wa Yuda, n'wana Salatiele, na Yoxuwa, muprista lonkulu, n'wana Yosadaki ni nsalo wa tiko, u ku:

³‘I mani eka n'wina la seleke eka lava nga vona yindlu leyi, eku kwetsimeni ka yona loko sungula xana? Kasi sweswi, mi yi vonisa ku yini xana? A hi nchumu emahlweni ya n'wina loko mi yi ringanisa na yona xana?

⁴Kutani sweswi, tiyisela, Zerubabele; ku vula Yehovha; tiyisela, na wena Yoxuwa, muprista lonkulu, n'wana Yosadaki! Tiyisani, na n'wina hinkwenu vanhu va tiko leri, ku vula Yehovha, mi va mi tirha; hikuva ndzi na n'wina, ku vula Yehovha wa mavandla;

⁵rito ra ntwanano lowu ndzi nga endla na n'wina, siku mi humaka eEgipta, ni moya wa mina wu tshame exikarhi ka n'wina. Mi nga chavi!

⁶Hikuva Yehovha wa mavandla u vulavula, a ku: Ndza ha ta tsekatsekisa kan'we, enkarhini lowu nga ekusuhana, tilo ni misava, ni lwandle ni tiko leri omeke.

⁷Ndzi ta tsekatsekisa ni matiko hinkwawo kutani leswi rhandzekaka swa matiko hinkwawo swi ta ta kwala, ndzi va ndzi tata yindlu leyi hi ku kwetsima, ku vula Yehovha wa mavandla.

⁸Silivhere i ya mina, ni nsuku i wa mina, ku vula Yehovha wa mavandla.

⁹Ku kwetsima ka yindlu ya le ndzhaku ku ta tlula ka leyo sungula, ku vula Yehovha wa mavandla; exivandleni lexi, ndzi ta veka ku rhula, ku vula Yehovha wa mavandla.’ ”

¹⁰Hi siku ra makume mambirhi na mune ra n'hweti ya ntlhanu na yin'we, hi lembe ra vumbirhi ra ku fuma ka Dariyosi, rito ra Yehovha ri va kona hi muprofeta Hagayi, ri ku:

¹¹“Yehovha wa mavandla u te, vutisa sweswi, vaprista ehenhla ka nawu, u ku:

¹²‘Kungakuloko munhu a khomile nyama leyi hlawulekeke hi nguvu ya yena, kutani hi nguvu leyi, a khoma vuswa, ni loko ma ri matsavu, kumbe vhinyo, kumbe mafurha, kumbe swakudya swihi ni swihi, xana swi ta hlawuleka-ke?’ ” Vaprista va hlamula, va ku: “E-e.”

¹³Hilaha Hagayi a nge: “Loko munhu la nyamisiweke hikwalaho ka mufi a khoma xin'wana eka swilo leswo, xi ta nyama-ke?” Vaprista va hlamula, va ku: “Xi ta nyama.”

¹⁴Hilaha Hagayi a hlamulaka, a ku: “Swi tano ni vanhu lava, swi tano ni rixaka leri emahlweni ka mina, ku vula Yehovha, swi tano ni ntirho hinkwawo wa mavoko ya vona, ni leswi va swi tisaka kwala: Swi ni thyaka.

¹⁵Kutani sweswi, lavisisani etimbilwini ta n'wina ta siku ra namuntlha ni ta le ndzhaku, ku nga siki vekiwaka ribye ehenhla ka ribye etempeleni ya Yehovha.

¹⁶Emikarhini leyo, loko un'wana a ta eka nhulu yin'we leyi nga ni makume mambirhi ya mimpimo ya koro, ku kumiwa leya khume ntsena; a ta emphongolweni wa vhinyo ku ta ka mimpimo ya ntlhanu wa makume; kutani ku kumiwa ya makume mambirhi ntsena.

¹⁷Ndzi mi bile hi ku kurha, ni rivungu, ni xihangu, emitirhweni hinkwayo ya mavoko ya n'wina, kambe a ku na un'we eka n'wina la tlheleleke eka mina, ku vula Yehovha.

¹⁸Langutani-ke etimbilwini ta n'wina; ku suka esikwini leri, ku tlhelela endzhaku, ku suka esikwini ra makume mambirhi na mune ra n'hweti ya ntlhanu na mune ku yisa esikwini leriya leri yindlu ya Yehovha ingi yi yimisiwile ha rona, lavisisani timhaka etimbilwini ta n'wina.

¹⁹Mbewu ya ha ri kona exivuyeni xana? Swi tsandza ni vhinya, ni makuwa, ni girenada, ni mutlhwari, a swa ha vekanga. Kambe ku suka siku leri, ndzi ta mi katekisa.”

²⁰Rito ra Yehovha ri ta eka Hagayi ra vumbirhi, hi siku ra makume mambirhi na mune ra n'hweti, ri ku:

²¹“Vulavula eka Zerubabele, mufumi wa Yuda, u ku: ‘Ndzi ta tsekatsekisa tilo ni misava, ndzi mbundzuxa swiluvelo swa vuhosi,

²²ndzi lovisa matimba ya ku fuma ka matiko, ndzi andlala tigolonyi ni lava fambaka ha tona; tihanci ni vakhandziyi va tona va ta wa un'wana ni un'wana hi fumu ra warikwavo.

²³Esikwini lero, ku vula Yehovha wa mavandla, ndzi ta ku teka, wena Zerubabele, n'wana Salatiele, nandza wa mina, ku vula Yehovha, kutani ndzi ta ku endla u kotisa xingwavila xa mfungho, hikuva ndzi ku hlawurile, ku vula Yehovha wa mavandla.’ ”