Read tsonga Zakariya 7 Bible Online

Zakariya 7 - tsonga bible

Zakariya 7

¹Elembeni ra vumune ra ku fuma ka hosi Dariyosi, rito ra Yehovha ri ta eka Zakariya, hi ra vumune ra n'hweti ya ntlhanu na mune, yi nga ya Kislevhu,

²va Betele va rhuma Xarezere, na Regemu-Meleke, ni vavanuna va yena ku ya khongela Yehovha,

³ni ku vutisa vaprista va yindlu ya Yehovha wa tinyimpi ni vaprofeta, leswaku: “Xana ndza ha ta rila ni ku titsona swakudya hi n'hweti ya vuntlhanu tanihi leswi ndzi swi endleke hi malembe layo nghasi?”

⁴Kutani rito ra Yehovha wa tinyimpi ri ta eka mina, ri ku: “U byela vanhu hinkwavo va tiko, ni vaprista, u ku:

⁵Leswi mi tshamaka mi titsona swakudya mi va mi rila hi n'hweti ya vuntlhanu, ni ya vuntlhanu na timbirhi, hi malembe walawo ya ntlhanu wa makume ni makume mambirhi, xana a mi titsonela mina-ke?

⁶Loko mi ri karhi mi dya, mi nwa, xana a hi n'wina lava dyaka, lava nwaka xana?

⁷Xana a mi tsundzuki marito lawa Yehovha a nga vulavula hi vaprofeta vo sungula, loko muti wa Yerusalema, wa ha akiwile wu tshamile hi ku rhula, miti ya wona yi ri matlhelo ya wona, tiko leri nga edzongeni ni banyi swa ha akiwile xana?”

⁸Rito ra Yehovha ri ta eka Zakariya, ri ku:

⁹“Yehovha wa tinyimpi u ri: Avanyisani hi ku avanyisa lokunene, mi endla hi tintswalo ni nsovo, un'wana ni un'wana eka makwavo;

¹⁰mi nga xanisi noni, ni xisiwana, ni wamatiko, ni mupfumari, kutani mi nga kungeleli makwenu khombo etimbilwini ta n'wina.”

¹¹Kambe va arile ku yingisa, va nonon'hwisa makatla ya vona, va pfala tindleve ta vona, leswaku va nga twi.

¹²Timbilu ta vona va ti hundzule dayimani, leswaku va nga twi nawu ni marito ya Yehovha wa tinyimpi lawa a va rhumeleke wona hi vaprofeta vo rhanga, hi Moya wa yena. Kutani ku humelela ku kariha lokukulu ka Yehovha wa tinyimpi.

¹³“Leswi a nga vitana, va nga twangiki, va vitanile kutani a ndzi yingisanga,” ku vula Yehovha wa tinyimpi.

¹⁴“Ndzi va hangalasile hi mheho exikarhi ka matiko hinkwawo lawa va nga ma tivangiki, tiko ri sala ri onhakile endzhaku ka vona, ku pfumaleka la hundzaka kona ni la tlhelelaka kona, va hundzurile tiko lerinene rhumbi.”