Read tsonga Zakariya 8 Bible Online

Zakariya 8 - tsonga bible

Zakariya 8

¹Rito ra Yehovha wa tinyimpi ri ta, ri ku:

²“Yehovha wa tinyimpi u ri: Ndzi vavisekela Siyoni, ndzi vaviseka hi ku vaviseka lokukulu.

³Yehovha u ri: Ndzi tlhelela eSiyoni, ndzi ta aka exikarhi ka Yerusalema; Yerusalema, u ta vuriwa muti wa vunene, ntshava ya Yehovha wa tinyimpi yi vuriwa ntshava leyi nga hlawuleka!

⁴“Yehovha wa tinyimpi u ri: Ku ta va ni vavanuna ni vavasati lavakulu lava nga ta tshamisa emindyangwini ya Yerusalema kukotisa khale, un'wana ni un'wana a khomile nhonga evokweni ra yena, hikwalaho ka ku dyuhala ngopfu,

⁵mitsendzele ya muti yi ta tala varisanyana ni vanhwanyana lava tlangaka kona.

⁶“Yehovha wa tinyimpi u ri: Ni loko mhaka leyi yi nga nonon'hwa emahlweni ka masalela ya tiko leri emasikwini wolawo, xana ni le ka mina yi nga nonon'hwa-ke, ku vula Yehovha wa tinyimpi?

⁷“Yehovha wa tinyimpi u ri: Vonani, ndzi ta ponisa vanhu va mina etikweni ra vuxa, ni le vusikwini;

⁸ndzi va tisa, va ta aka eYerusalema ri ta va tiko ra mina, mina ndzi va Xikwembu xa vona hi vunene ni ku lulama.”

⁹Yehovha wa tinyimpi u ri: “Mavoko ya n'wina a ma tiye, n'wina lava twaka marito lama humaka emilon'wini ya vaprofeta emikarhini leyi ku nga sunguriwa ha yona yindlu ya Yehovha wa tinyimpi, yi nga tempele, leswaku yi akiwa.

¹⁰Hikuva emahlweni ka masiku wolawo, a ku nga ri na hakelo ya munhu ni xifuwo a xi nga ri na hakelo; la humaka ni la tlhelelaka a va nga ri na ku rhula hikwalaho ka nala; a ndzi tshiketa vanhu leswaku va lwa.

¹¹Kambe sweswi, eka masalela ya tiko leri, a ndzi nga ha vi lexi ngi ndzi ri xona emikarhini ya khale, ku vula Yehovha wa tinyimpi.

¹²Ndzi byala ku rhula, murhi wa vhinya wu ta veka mihandzu ya wona, ni misava yi ta veka swakudya swa yona, ni tilo ri nyika mberha ya rona, hinkwaswo sweswo ndzi ta swi nyika masalela ya tiko leri, yi va ndzhaka ya wona.

¹³Kukota leswi ngi mi ri xisandzu ematikweni, n'wina, yindlu ya Yuda, na n'wina, yindlu ya Israele, ndzi ta mi hanyisa sweswi, mi va ku kateka. Mi nga chaveni, mavoko ya n'wina a ma tiye!”

¹⁴Yehovha wa tinyimpi u ri: “Leswi ndzi nga tsundzuka ku mi onha siku vatata wa n'wina va ndzi karihiseke, ku vula Yehovha wa tinyimpi, kutani ndzi nga hundzukangiki,

¹⁵ndzi tsundzukile kambe emasikwini lawa ku endla Yerusalema, ni yindlu ya Yuda swinene. Mi nga tshukeni!

¹⁶Kambe leswi mi faneleke ku swi endla hi leswi: Un'wana ni un'wana a vula leswi tiyeke eka warikwavo; avanyisani swinene hi ku rhula etihubyeni ta n'wina;

¹⁷mi nga kungeleli vamakwenu khombo etimbilwini ta n'wina, mi nga rhandzi ku hlambanya ka vunwa, hikuva sweswo hinkwaswo ndzi swi vengile, ku vula Yehovha.”

¹⁸Kutani rito ra Yehovha wa tinyimpi ri ndzi tela, ri ku:

¹⁹“Yehovha wa tinyimpi u te: Ku titsona swakudya ka n'hweti ya vumune, ni ka ya vuntlhanu, ni ka ya vuntlhanu na timbirhi ni ka ya vukhume, swi ta hundzukela yindlu ya Yuda ku tsaka ni mikhuvo leyinene; ntsena mi tirhandzela ntiyiso ni ku rhula.

²⁰“Yehovha wa tinyimpi u ri: Ka ha ta ta matiko ni vaaki va miti le yo tala;

²¹vaaki va muti wun'wana va ta ya eka va wun'wana muti, va ri karhi va ku: ‘A hi yeni! Hi ya khongela Yehovha, ni ku lava Yehovha wa tinyimpi! Na mina, ndzi ta ya!’

²²Kutani matiko layo tala, ni tinxaka leta matimba ti ta ta ku lava Yehovha wa tinyimpi eYerusalema, ni ku khongela Yehovha.

²³“Yehovha wa tinyimpi u ri: Emasikwini lawa vavanuna va khume va tindzimi hinkwato ta matiko, va ta tikhomelela hi ndzungo wa nguvu ya Muyuda, va ku: ‘Hi ta ya na n'wina, hikuva hi twile leswaku Yehovha u na n'wina.’ ”