Read tsonga Matewu 10 Bible Online

Matewu 10 - tsonga bible

Matewu 10

¹Kutani loko a vitanele eka yena vadyondzisiwa va yena va khume na vambirhi, a va nyika matimba ya ku hlula mimoya leyo biha ni ku yi hlongolela ehandle, ni ku hanyisa ma vabyi hinkwawo, ni lava hlulekaka hinkwavo.

²Mavito ya vaapostola lava khume na vambirhi hi walawo: lowo rhanga, i Simoni, la thyiweke Petro, na Andriya makwavo; na Yakobo n'wana Zebediya, na Yohane makwavo;

³Filipi na Bartolomi, Tomasi na Matewu muluvisi; Yakobo n'wana Alfiya na Lebiya;

⁴Simoni wa Kanana na Yudasi Iskariyota loyi a nga xenga Yesu.

⁵Yesu a rhuma lava khume na vambirhi volavo, a va lerisa, a ku: “Mi nga tshuki mi ya eka vamatiko, mi nga tshuki mi nghena emutini wihi ni wihi wa Vasamariya,

⁶kambe mi ya eka tinyimpfu leti lahlekeke ta yindlu ya Israele.

⁷Kutani loko mi ri karhi mi famba, dyondzisani, mi ku: ‘Ku fuma ka matilo ku tshinerile.’

⁸Hanyisani lava vabyaka, pfuxani vafi, mi basisa va nhlokonho, mi hlongola mademona. Mi nyikiwile ntsena; na n'wina, va nyikeni ntsena.

⁹Mi nga tshuki mi tilongela mbuva hambi ti ri tipondho, ni macheleni, ni tipeni emabandeni ya n'wina,

¹⁰ni loko wu ri nkwama wa ndlela, hambi ti ri tinguvu timbirhi, ni tintanghu, ni nhonga, hikuva la tirhaka u faneriwe hi swakudya swa yena.

¹¹“Kutani loko mi nghene emutini, kumbe ximutaneni xihi ni xihi, mi vutisa leswaku i mani la fanelaka ku mi amukela, mi tshama eka yena mi kondza mi suka.

¹²Kutakuloko mi nghene endlwini, mi yi xeweta.

¹³Loko yindlu yoleyo swi yi fanela, ku rhula ka n'wina a ku te ehenhla ka yona kambe loko swi nga yi faneri, ku rhula ka n'wina a ku tlhelele eka n'wina.

¹⁴Kutani emikarhini hinkwayo, loko va nga mi amukeri, kumbe loko va nga yingisi marito ya n'wina, loko mi huma endlwini yoleyo, kumbe emutini wolowo, mi phumunha ntshuri emilengeni ya n'wina.

¹⁵Kunene ndzi ri eka n'wina: ku biwa ka muti wolowo ku ta tlula ka Sodoma na Gomora hi siku ra ku avanyisiwa.

¹⁶“Vonani, ndza mi rhuma mi fana ni tinyimpfu exikarhi ka mahlolwa, hikwalaho-ke tlharihani kukota tinyoka, mi va lavo kala mano kukota magugurhwana.

¹⁷Kambe mi tivonela vanhu, hikuva va ta mi yisa etihubyeni, va ta mi xupula emasinagogeni ya vona.

¹⁸Kambe va ta mi yisa emahlweni ka tindhuna, ni le mahlweni ka tihosi hikwalaho ka mina, mi va timbhoni ta mina eka vona, ni ka vamatiko.

¹⁹Kambe siku va mi nyiketaka vona, mi nga tshuki mi kanakana hilaha mi nga ta vulavula hakona, ni leswi mi nga ta swi vula, hikuva leswi mi nga ta swi vula, mi ta swi nyikiwa enkarhini wolowo.

²⁰Hikuva a hi n'wina lava mi nga ta vulavula, kambe i moya wa Tata wa n'wina lowu nga ta vulavula ha n'wina.

²¹“Makwavo u ta nyiketa makwavo eku dlaweni, na tatana n'wana wa yena, vana va ta hundzukela vatswari va vona hi matimba, va va dlaya.

²²Kutani hinkwavo va ta mi venga hikwalaho ka vito ra mina; kambe la tiyiselaka ku fika siku ra makumu, hi yena la nga ta hlayiseka.

²³Kutani kutakuloko va mi xanisa emutini wun'wana, tsutsumelani eka wun'wana, hikuva kunene ndzi ri eka n'wina: N'wana wa Munhu u ta humelela mi nga si hlanganisa miti hinkwayo ya Israele.

²⁴“Mudyondzisiwa a hi nkulukumba eka mufundhisi wa yena, ni nandza a hi nkulukumba eka hosi ya yena.

²⁵Swi ringene mudyondzisiwa loko a endliwa kukotisa hosi ya yena. Loko va vurile n'wini wa yindlu Belzebule, va yindlu ya yena va ta vuriwa ku tlurisa ngopfu.

²⁶Mi nga tshuki mi va chava, hikuva a ku na nchumu xa lexi pfariweke lexi nga tiki pfuriwa, kutani a ku na nchumu exihundleni lexi nga tiki tiviwa.

²⁷Leswi ndzi mi byelaka swona emunyameni, swi vuleni eku vonakaleni; kutani leswi mi swi yingiseke swi hleveteriwa etindleveni, swi twariseni eswihlungwini swa tindlu.

²⁸“Mi nga tshuki mi chava lava dlayaka miri, kambe va hava matimba yo dlaya moya; kambe chavani loyi a nga ni matimba yo lovisa miri ni moya wa munhu etiheleni.

²⁹“Xana swindzingiri swimbirhi a swi xaviwi hi peni yin'we ntsena? Kambe a ku nga wi xin'wana xa swona ehansi, loko ku nga ri hi ku rhandza ka Tata wa n'wina.

³⁰“Loko mi ri n'wina, misisi ya tinhloko ta n'wina, yi hlayiwile hinkwayo.

³¹Hikwalaho mi nga tshuki mi chava, mi tlurisa swindzingiri leswo tala.

³²“Un'wana ni un'wana la nga ta ndzi vula emahlweni ka vanhu, na mina, ndzi ta n'wi vula emahlweni ka Tatana la nga ematilweni.

³³Kambe un'wana ni un'wana la nga ta ndzi landzula emahlweni ka vanhu, na mina, ndzi ta n'wi landzula emahlweni ka Tatana la nga ematilweni.

³⁴“Mi nga tshuki mi anakanya leswaku ndzi tile ku tisa ku rhula emisaveni; ndzi tile ku tisa fumu ku nga ri ku rhula.

³⁵Hikuva ndzi tele ku hambanyisa munhu ni tata wa yena, wanhwana ni mana wa yena, n'wingi ni n'wingi wa yena,

³⁶ni malandza ya munhu, va ta va valala eka yena.

³⁷La rhandzaka tata wa yena, hambi a ri mana wa yena ku tlula mina, a nga ndzi faneli, ni la rhandzaka n'wana wa yena wa wanuna, hambi a ri wa wanhwana ku tlula mina, a nga ndzi faneli.

³⁸Kutani la nga tekiki xihambano xa yena a ndzi landza, a nga ndzi faneli.

³⁹La hlayisaka vutomi bya yena, u ta lahlekeriwa hi byona; kambe la lahlekeriwaka hi vutomi bya yena hikwalaho ka mina, u ta tlhela a byi kuma.

⁴⁰“La mi rhurhelaka wa ndzi rhurhela; ni la ndzi rhurhelaka u rhurhela la ndzi rhumeke.

⁴¹La rhurhelaka muprofeta hi leswi a nga muprofeta, u ta nyikiwa hakelo ya muprofeta; ni la rhurhelaka la lulameke hi leswi a lulameke, u ta nyikiwa hakelo ya la lulameke.

⁴²Kutani un'wana ni un'wana la nyikeke ndzheko, hambi wu ri wun'we, wa mati yo titimela eka un'wana wa lavatsongo, hi leswi a nga mudyondzisiwa wa mina, kunene ndzi ri eka n'wina: A nga ka a nga pfumali hakelo ya yena.”