Read tsonga Matewu 13 Bible Online

Matewu 13 - tsonga bible

Matewu 13

¹Hi siku rero, Yesu a huma endlwini, a tshama ekusuhi ni lwandle.

²Kutani mitshungu leyikulu yi hlengeletana eka yena; hikwalaho Yesu a nghena ebyatsweni, a tshama eka byona; ntshungu hinkwawo a wu yime eribuwini.

³Kutani a va byela timhaka leto tala hi swifaniso, a ku: “Vonani, muhaxi u humile ku ya haxa.

⁴Kakuloko a haxa, timbewu tin'wana ti wela endleleni; kutani tinyanyana ti ta, ti ta ta dya.

⁵“Tindzhoho tin'wana ti wela emaribyeni, laha ku nga riki na misava yo tala, kutani ti hatlisa ti mila, hikuva ti nga ri na misava, a yi nga entanga.

⁶Kutani dyambu loko ri tlhava, ti vuna, ti tshwa hi ku pfumala timitsu.

⁷Tin'wanyana ti wela exikarhi ka mitwa; kutani mitwa yi kula, yi ti kama.

⁸Kambe tin'wanyana ti wela emisaveni leyinene, kutani ti veka swakudya, ndzhoho yin'wana yi veka dzana, yin'wana ntlhanu wa makume na khume rin'we, yin'wana makume manharhu.

⁹La nga ni tindleve ku yingisa a a yingise.”

¹⁰Vadyondzisiwa va tshinela, va ku eka yena: “Xana u vulavulela yini na vona hi swifaniso?”

¹¹A va hlamula, a ku: “Hikuva n'wina mi nyikiwile ku tiva swihundla swa ku fuma ka le tilweni, kambe vona a va nyikiwanga.

¹²Hikuva la nga na swona, u ta nyikiwa a taleriwa; kambe la nga riki na nchumu, u ta tekeriwa ni leswi a nga na swona.

¹³Hikwalaho ndzi vulavulaka na vona hi swifaniso hileswaku, hambi va vona, va nga ka va nga vonisisi, hambi va yingisa, va nga ka va nga yingisi ni ku swi twisisa.

¹⁴Kutani ku hetisekile eka vona leswi nga bvumbhiwa hi Esaya, loko a te: ‘Hi ku yingisa, mi ta yingisa, kambe mi nga ka mi nga twisisi, mi ta vona hi mahlo, kambe mi nga ka mi nga vonisisi.

¹⁵Hikuva timbilu ta tiko leri ti nonile, ni tindleve ta vona va ti nonon'hwisile, ni mahlo ya vona va ma pfarile, leswaku va nga tshuki va vona hi mahlo, ni ku yingisa hi tindleve, ni ku twisisa hi timbilu, ni ku hundzuka leswaku ndzi nga ti tshuka ndzi va hanyisa.’

¹⁶“Kambe loko mi ri n'wina, mahlo ya n'wina ma katekile hikuva ma vona, na tona tindleve ta n'wina, hikuva ta yingisa.

¹⁷Ndzi vurisile ndzi ri eka n'wina: Vaprofeta lavo tala ni lava lulameke lavo tala, va naverile ku vona leswi mi swi vonaka, kambe a va swi vonanga; ni ku yingisa leswi mi swi yingisaka, kambe a va swi yingisanga.

¹⁸Loko mi ri n'wina, yingisani timhaka ta xifaniso xa muhaxi:

¹⁹“Un'wana ni un'wana loko a yingisa rito ra ku fuma, a nga ri twisisi, lowo biha a ta eka yena, a n'wi tekela leswi byariweke embilwini ya yena; hi la byariweke ekusuhi ni ndlela.

²⁰La byariweke emaribyeni, i munhu la yingisaka marito, a hatlisa a ma amukela hi ku tsaka,

²¹kambe a nga na timitsu endzeni ka yena; wa tiya nkarhinyana ntsena, kutani loko makhombo kumbe ku xanisa swi humelela hikwalaho ka rito, a hatlisa a khunguvanyeka.

²²Loko a ri loyi a byariweke emitweni, i munhu la yingisaka rito, kambe a tikarhatela swilo swa misava, ni ku kanganyisiwa hi xuma; kutani swi tsondziyela rito, ri ko ri nyumba.

²³Kambe la byariweke emisaveni leyinene, i munhu la yingisaka rito a ri twisisa; kutani a veka tindzhoho, yin'wana yi veleka dzana, yin'wana ntlhanu wa makume na khume rin'we, yin'wana makume manharhu.”

²⁴Yesu a va vekela xifaniso xin'wana, a ku: “Ku fuma ka le tilweni ku fana ni munhu la byaleke mbewu leyinene ensin'wini ya yena.

²⁵Kutani loko vanhu va etlele, ku ta nala wa yena, a ta byala mfava emaveleni, a tifambela.

²⁶Kuteloko mavele ma tlhavile, ri ri khava, na wona mfava wu vonaka.

²⁷Kutani malandza ya n'wini wa yindlu ma ta ma ku eka yena: ‘Hosi, a hi ku u byarile mbewu leyinene ensin'wini ya wena; xana mfava lowu wu pfa kwihi-ke?’

²⁸A ku eka vona: ‘I ku endla ka nala.’ Malandza ma ku eka yena: ‘A ku swi rhandzi leswaku hi ya tsuvula mfava-ke?’

²⁹A ku eka vona: ‘E-e, kumbexana loko mi ya tsuvula mfava, mi nga tsuvula ni mavele:

³⁰Swi tshikeni ha swimbirhi, swi kula kun'we, ku kondza ku fika ku tshovela! Hilaha ndzi nga ta ku eka vatshoveri: Rhangani hi mfava, mi tsuvula, mi wu boha hi tinyandza, mi hisa, kambe mavele, mi ma hlengeleta exivuyeni xa mina.’ ”

³¹Kutani a va vekela xifaniso xin'wana, a ku: “Ku fuma ka matilo ku fana ni ndzhoho ya sinapi yoleyo munhu a yi tekeke, a ya yi byala ensin'wini ya yena.

³²Kunene yi ri yona leyitsongo eka timbewu hinkwato kambe loko yi mirile, yi tlula matsavu hinkwawo, yi hundzuka murhi lowukulu, kutani tinyanyana ta le henhla ti ta aka emarhavini ya wona.”

³³A va byela xifaniso xin'wana, a ku: “Ku fuma ka matilo ku fana ni comela lexi wansati a xi tekeke, a xi fihla mapeni ya mipimo minharhu, ma ko ma kukumuka hinkwawo.”

³⁴Timhaka teto hinkwato Yesu a byela ntshungu hi swifaniso, a nga vulavuri na vona hi swimbe,

³⁵leswaku ku ta endleka rito ra Muprofeta la nga te: “Ndzi ta ahlamisa nomu wa mina hi swifaniso ndzi xaxameta ni timhaka leti ngi ti fihliwile ka ha ri mpfhuka misava yi vumbiwa.”

³⁶Kuteloko Yesu a tlherisile ntshungu, a nghene endlwini, vadyondzisiwa va yena va ta eka yena, va ku: “Hi hlamusele xifaniso xa mfava wa le nsin'wini.”

³⁷Kutani a va hlamula, a ku:

³⁸“La byaleke mbewu leyinene, i N'wana wa Munhu; nsimu, i misava; mbewu leyinene, i vana va ku fuma; mfava i vana va lowo biha.

³⁹Nala la byaleke mfava, i Diyavulosi; ku tshovela, i makumu ya mikarhi leyi; vatshoveri, vona, i tintsumi.

⁴⁰Kukotisa loko mfava wu tsuvuriwa, wu ya hisiwa endzilweni swi ta va sweswo emakun'wini ya mikarhi leyi.

⁴¹N'wana wa Munhu u ta rhuma tintsumi ta yena, ti ta humesa ehandle ka ku fuma ka yena vakhunguvanyisi hinkwavo, ni lava endlaka leswo biha.

⁴²Ti ta va cukumeta ekheleni ra ndzilo, laha mikosi yi nga ta va kona, ni ku getsela ka meno.

⁴³Enkarhini wolowo lavo lulama va ta hatima kukotisa dyambu eku fumeni ka Tata wa vona. La nga ni tindleve ku yingisa, a a yingise.

⁴⁴“Kambe ku fuma ka matilo ku fana ni xuma lexi fihliweke ensin'wini; ku nga te loko munhu a xi kumile, a xi fihla, kutani, eku tsakeni ka yena, a xavisa swilo swa yena hinkwaswo, a tixavela nsimu yoleyo.

⁴⁵Ku fuma ka le tilweni kukotisa muxavi la lavaka tidayimani letinene;

⁴⁶kutani loko a kumile dayimani yin'wana ya nxavo lowukulu, a ya xavisa swilo hinkwaswo leswi a nga na swona, a tixavela yona.

⁴⁷“Kambe ku fuma ka le tilweni ku kotisa nkukuto lowu petiweke elwandle, kutani wu phasa swilo swa tinxakaxaka;

⁴⁸loko wu tele va wu kokela eribuwini, va tshamisa, va hlengeleta leswinene eswibyeni swa vona, va cukumeta leswo biha.

⁴⁹Swi ta va tano emakun'wini ya mikarhi leyi; tintsumi ti ta huma, ti hlawula lavo homboloka eka lava lulameke,

⁵⁰ti va cukumeta ekheleni ra ndzilo laha mikosi yi nga ta va kona, ni ku getsela ka meno.”

⁵¹Yesu a ku eka vona: “Xana ma ti twa timhaka leti hinkwato xana?” Va ku eka yena: “Ina, Hosi.”

⁵²Kutani a ku eka vona: “Hilaha ndzi nge: Mutsari un'wana ni un'wana la dyondzisiweke hi ta ku fuma ka le tilweni, u kotisa munhu la nga n'wini wa yindlu la humesaka evukosini bya yena swilo leswintshwa ni leswa khale.”

⁵³Kuteloko Yesu a hetile swifaniso sweswo, a suka kwalaho;

⁵⁴kuteloko a fikile emutini wa rikwavo, a dyondzisa vanhu esinagogeni ya vona va va va hlamala, va ku: “Xana loyi u byi kume kwihi vutlhari lebyonghasi, ni mahlori layonghasi?

⁵⁵Yeloyi a hi n'wana wa muvatli-ke? A hi ku mana wa yena hi loyi va nge i Mariya; ni vamakwavo, xana a hi Yakobo, na Yosefa, na Simoni, na Yuda-ke?

⁵⁶Ni vamakwavo va xisati, a va kona laha eka hina hinkwavo xana? Kasi leswi hinkwaswo, swi n'wi humelerise ku yini-ke?”

⁵⁷Kutani va khunguvanyeka eka yena. Kambe Yesu a ku eka vona: “Muprofeta a nga soriwi, loko ku nga ri etikweni ra yena, ni le ndlwini ya yena.”

⁵⁸Kutani kwalaho a nga endlanga mahlori yo tala, hi leswi va nga pfumelangiki eka yena.