Read tsonga Matewu 17 Bible Online

Matewu 17 - tsonga bible

Matewu 17

¹Masiku ya ntlhanu na rin'we loko ma hundzile, Yesu a teka Petro, na Yakobo, na Yohane, makwa Yakobo a ya na vona hitlhelo, entshaveni leyo leha.

²Kutani a hundzuka emahlweni ka vona; mombo wa yena wu kwetsima kukotisa dyambu; na tona tinguvu ta yena ti hundzuka leto basa, ti vangama.

³Hi nomu wolowo Muxe na Eliya va humelela eka vona, va vulavula na yena.

⁴Hikwalaho Petro a angula, a ku eka Yesu: “Hosi, swi sasekile loko hi tshama la; loko u swi rhandza, hi nga aka mitsonga minharhu kwala, wun'wana wu va wa wena, wun'wana wa Muxe, wun'wana wa Eliya.”

⁵A ku a ha vulavula, papa lero vangama ri humelela ri va khubumeta; kutani ku twakala rito leri humaka epapeni ri ku: “Loyi, i n'wananga la rhandziwaka, loyi ndzi n'wi tsakelaka: n'wi yingiseni.”

⁶Kutani vadyondzisiwa, loko va twa rito rero, va wa hi mimombo, va chava ngopfu.

⁷Kambe Yesu a va tshinelela a va khumba a ku eka vona: “Pfukani, mi nga chavi.”

⁸Kutani loko va tlakusa mahlo, va vona Yesu a ri swakwe, ku nga ri na umbe.

⁹Kakuloko va rhelela entshaveni, Yesu a va laya, a ku: “Leswi mi swi voneke, mi nga tshuki mi byela vanhu, N'wana wa Munhu a nga si pfuka eku feni.”

¹⁰Kutani vadyondzisiwa va yena va n'wi vutisa, va ku: “Xana vatsari va vulela yini, va ku: Swi fanele leswaku Eliya a rhanga a ta.”

¹¹Yesu a va hlamula, a ku eka vona: “Kunene Eliya u fanele ku ta, ku ta tlherisela hinkwaswo eku lulameni.

¹²Kambe ndzi ri eka n'wina: Eliya u tile, kambe a va n'wi tivanga; kutani va n'wi endlile hinkwaswo leswi va swi rhandzeke. N'wana wa Munhu, na yena, u ta twisiwa ku vaviseka hi vona.”

¹³Kambe vadyondzisiwa va twisisa leswaku a a va hlambanyisela ta Yohane Mukhuvuri.

¹⁴Kuteloko va vuye entshungwini, munhu a n'wi tshinelela a khinsama hi matsolo, a ku:

¹⁵“Hosi, twela n'wananga vusiwana, hikuva u ni rihuhu ra n'hweti, a vabya ngopfu, hikuva wa andze ku wela endzilweni ni le matini ngopfu.

¹⁶Ndzi n'wi tisile eka vadyondzisiwa va wena, kambe a va tivanga ku n'wi hanyisa.”

¹⁷Yesu a hlamula, a ku: “Rixaka leri nga pfumeriki, lero homboloka, ndzi ta va na n'wina ku yisa kwihi xana? Ndzi ta mi lehisela mbilu ku yisa kwihi xana? N'wi neheni laha ka mina.”

¹⁸Kutani Yesu a holovela ngopfu e rihuhu, kutani ri huma eka n'wana yeloyi, a hanya hi nkarhi wolowo.

¹⁹Kutani vadyondzisiwa va ta eka Yesu hitlhelo, va ku eka yena; “Xana hi tsandzeke ha yini ku hlongola demona leri?”

²⁰Yesu a ku eka vona: “Hikwalaho ka ku tsana ka vupfumeri bya n'wina. Hikuva ndzi vurisile ndzi ri eka n'wina: Loko ngi mi ri ni ku pfumela loku kotisaka nhlampfu ya sinapi, hambi mi nga ku eka ntshava leyi: Rhurhela lahaya, yi nga ya kona; ku nga ha ri na nchumu lexi mi tsandzaka.

²¹Kambe rixaka leri ra mademona, a ri humi loko ku nga ri hi ku khongela, ni ku titsona swakudya.”

²²Kakuloko va ha ri eGaleliya, Yesu a ku eka vona: “N'wana wa Munhu u ta nyiketiwa emavokweni ya vanhu;

²³va ta n'wi dlaya, kambe u ta pfuka hi siku ra vunharhu,” kutani vadyondzisiwa va va ni tingana ngopfu.

²⁴Kuteloko va fika eKapernawume lava hlengeletaka tidragma letimbirhi ta ndzuvo va ta eka Petro, va ku eka yena: “Xana mufundhisi wa n'wina a nga humesi tidragma timbirhi xana?”

²⁵A ku: “Ina, wa humesa.” Kutani loko a nghene endlwini, Yesu a n'wi rhangela, a ku eka yena: “Swo yini ka wena, Simoni? Tihosi ta misava ta luvisa, kumbe ti kungisa mani xana? Xana i vana va vona, kumbe i vamatiko xana?”

²⁶Petro a ku eka yena: “I vamatiko.” Yesu a ku eka yena: “Loko swi ri sweswo, vana va vona va va tshika.

²⁷Kambe hileswaku hi nga va khunguvanyisi, yana e lwandle, u ya hoxa xinjovo kona, kutani u ta khoma nhlampfi leyi nga ta rhanga yi papama; kutakuloko u yi ahlamise nomu, u ta kuma statera kona, u yi teka u va nyika yona, u humesela mina na wena.”