Read tsonga Matewu 19 Bible Online

Matewu 19 - tsonga bible

Matewu 19

¹Yesu kuteloko a hetile ku vulavula loku, a suka eGaleliya, a ya ekusuhi ni tiko ra Yudiya, entsungeni wa hase wa Yordani.

²Kutani mitshungu leyikulu yi n'wi landza, yena a va hanyisa kona.

³Vafarisi va ta eka yena ku n'wi ringa, va ku: “Xana munhu wa pfumeleriwa ku tshika nsati wa yena hikwalaho ka mhaka yihi ni yihi xana?”

⁴Kambe yena a va hlamula, a ku: “Xana a mi hlayanga leswaku la nga va endla eku sunguleni, u endle wanuna ni wansati ntsena,”

⁵a engeta a ku: “Hikwalaho, munhu u ta siya tata wa yena ni mana wa yena, a namarhela nsati wa yena; lavambirhi, yi ta va nyama yin'we ntsena.

⁶Loko swi ri tano a va nga ha tshami va ri vambirhi, kambe va ta va nyama yin'we. Hilaha ndzi nge: Leswi Xikwembu xi swi hlanganiseke, swi nga ka swi nga avanyisiwi hi munhu.”

⁷Kutani va ku eka yena: “Muxe u lerise ha yini ku nyika wansati papila ra ku n'wi tshika?”

⁸A ku eka vona: “Muxe u mi pfumelele ku tshika vasati va n'wina hikwalaho ka ku nonon'hwa ka timbilu ta n'wina; kambe eku sunguleni, a swi nga ri tano.

⁹Ndzi ri eka n'wina: Un'wana ni un'wana la tshikeke nsati wa yena loko ku nga ri hikwalaho ka vuoswi, kutani a teka un'wana, wa oswa; ni la tekaka la tshikiweke, wa oswa.”

¹⁰Vadyondzisiwa va yena va ku eka yena: “Loko timhaka ta wanuna ehenhla ka wansati ti ri tano, a swi saseki ku teka.”

¹¹Kambe a ku eka vona: “A hi hinkwavo lava nga ni ku twisisa ka mhaka yoleyo, kambe hi vona ntsena lava nyikiweke vona.

¹²Hikuva vatsheniwa va kona lava nga tswariwa va ri tano emakhwirini ya vamana va vona; vatsheniwa va kona lava endliweke vatsheniwa hi vanhu, vatsheniwa va kona kambe lava nga titshena hikwalaho ka ku fuma ka Xikwembu. La nga twisisaka mhaka leyi, a a yi twisise.”

¹³Kutani ku tisiwa vana eka Yesu leswaku a va tlhandleka mavoko, a va khongelela; kambe vadyondzisiwa va holovela lava va va tisaka.

¹⁴Kambe Yesu a ku eka vona: “Tshikani, mi nga tshuki mi sivela vana ku ta eka mina hikuva ku fuma ka matilo i ka lava fanaka na vona.”

¹⁵Kuteloko a va tlhandlekile mavoko, a suka kwalaho.

¹⁶Kutani munhu a ta, a ku eka yena: “Mufundhisi lonene, leswinene ndzi ta tirha swihi ku va ni vutomi lebyi nga heriki?”

¹⁷Yesu a hlamula, a ku eka yena: “U ndzi vutisela yini ta leswinene? Lonene i un'we ntsena. Kambe loko u rhandza ku nghena evutomini, hlayisa milawu.”

¹⁸A ku eka yena: “Hi yihi?” Yesu a n'wi hlamula, a ku: “Hi leyi nge: U nga tshuki u dlaya, u nga tshuki u endla vuoswi, u nga tshuki u yiva, u nga tshuki u hembela munhu;

¹⁹chava tata wa wena, ni mana wa wena, u rhandza warikwenu kukota loko u tirhandza.”

²⁰Jaha leri ri ku eka yena: “Ndzi yi hlayisile, ndza ha ri ntsongo, ndzi kondza ndzi fika sweswi; xana ndza ha pfumala yini?”

²¹Yesu a ku eka yena: “Loko u rhandza ku va la hetisekeke, famba u ya xavisa leswi u nga na swona, u avela swisiwana kwalaho u ta va ni xuma etilweni, kutani u ta, u ndzi landza.”

²²Kambe jaha leri, loko ri twa ku vulavula loku, ri famba ri ri ni gome ngopfu hikuva a ri fuwile ngopfu.

²³Kutani Yesu a ku eka vadyondzisiwa va yena: “Ndzi vurisile ndzi ri eka n'wina: Swa nonon'hwa eka mufuwi ku nghena eku fumeni ka matilo:

²⁴Ndzi engeta ndzi ku eka n'wina: Swi nga olova loko kamela yi nghena hi xuva ra neleta, ku tlula loko mufuwi a nghena eku fumeni ka Xikwembu.”

²⁵Vadyondzisiwa loko va swi twa, va hlamala ngopfu, va ku: “Loko swi ri tano, ku ta pona mani xana?”

²⁶Yesu a va languta, a ku eka vona: “Loko va ri vanhu, i mhaka leyi va tsandzaka, kambe Xikwembu a xi tsandzi hi nchumu.”

²⁷Kutani Petro a angula, a ku eka yena: “Waswivo, hina hi tshike hinkwaswo, hi ku landzelela, ku ta endleka yini eka hina?”

²⁸Yesu a ku eka vona: “Kunene, ndza mi byela, ndzi ri eka n'wina lava mi ndzi landzeke: Hi siku ra ku vuyetela ka hinkwaswo, loko N'wana wa Munhu a ta tshamisa exiluvelweni xa ku kwetsima ka yena, mi ta tshama, na n'wina, eswiluvelweni swa khume na swimbirhi, mi avanyisa tinxaka ta Israele leta khume na timbirhi.

²⁹Kutani un'wana ni un'wana la tshikeke vamakwavo, va xinuna kumbe va xisati, hambi a ri tata wa yena, kumbe mana wa yena, kumbe vana, ni loko ma ri masimu, kumbe tindlu, hikwalaho ka vito ra mina, u ta nyikiwa ka dzana, a dya ndzhaka ya vutomi lebyi nga heriki.

³⁰Kambe lavo tala vo rhanga, va ta va ve ndzhaku, ve ndzhaku va ta va ve mahlweni.