Read tsonga Matewu 2 Bible Online

Matewu 2 - tsonga bible

Matewu 2

¹Yesu, kuteloko a tswariwile Betlehema wa Yudiya, enkarhini wa hosi Heroda, vonani, tintlhari ta le vuxeni ti fika eYerusalema, ti ku:

²“Yi kwihi hosi ya Vayuda leyi tswariweke, hikuva hi vonile nyeleti ya yona hi le vuxeni, kutani hi tile ku ta yi gandzela.”

³Kuteloko hosi Heroda a swi twa, a tshuka, ni va Yerusalema hinkwavo va tshuka na yena.

⁴Kutani a hlengeleta vaprista lavakulu hinkwavo, ni vatsari va tiko, a va vutisa leswaku: “Kriste a fanela ku tswariwa kwihi xana?”

⁵Kutani va n'wi byela, va ku: “EBetlehema wa Yudiya, hikuva ku tsariwile sweswo hi muprofeta, u te:

⁶‘Na wena Betlehema, tiko ra Yuda, a ku ntsongo exikarhi ka tihosi ta Yuda, hikuva ku ta huma eka wena mufambisi la nga ta risa tiko ra mina ra Israele.’ ”

⁷Kwalaho Heroda a vita tintlhari exihundleni, a va vutisa nkarhi lowu nyeleti yi nga vonaka ha wona.

⁸Kutani a va rhuma eBetlehema, a ku: “Yanani, mi ya vutisa swinene timhaka ta n'wana; kutakuloko mi n'wi kumile, mi ta ndzi tivisa, ndzi ta ya n'wi gandzela, na mina.”

⁹Kuteloko va twile hosi va suka; nyeleti yoleyo va nga yi vona evuxeni, yi ri karhi yi va rhangela emahlweni, yi fika yi yima ehenhla, laha n'wana ingi a ri kona.

¹⁰Kuteloko va vona nyeleti, va tsaka hi ku tsaka lokukulu ngopfu.

¹¹Kutani loko va nghena endlwini, va kuma n'wana ni mana wa yena, Mariya; kutani va khinsama hi matsolo, va n'wi gandzela. Kuteloko va tshunxile mirhwalo ya vona, va n'wi nyika nsuku, ni mirhi ya risuna, ni murhi wa mirha.

¹²Kutani loko va kombisiwile hi Xikwembu hi norho leswaku va nga ha hundzi hi le ka Heroda, va tlhelela eka rikwavo hi ndlela yin'wanyana.

¹³Kuteloko va sukile, ntsumi ya Hosi, yi ta eka Yosefa hi norho, yi ku: “Pfuka, u teka xihlangi, ni mana wa xona, u balekela eEgipta, u tshama kona ndzi ko ndzi ku byela, hikuva Heroda u ta lava xihlangi ku xi dlaya.”

¹⁴Kwalaho Yosefa a pfuka a teka xihlangi ni mana wa xona nivusiku, a ya chavela eEgipta,

¹⁵a tshama kona, Heroda a kondza a fa, leswaku ku endleka leswi nga vuriwa hi Hosi, hi muprofeta la nga te: “Ndzi vitanile n'wana wa mina a huma eEgipta.”

¹⁶Kuteloko Heroda a vone leswaku u kanganyisiwile hi tintlhari, a kariha ngopfu, kutani a rhuma vanhu va ya dlaya vana hinkwavo va Betlehema, ni va tiko hinkwaro ra kona, va malembe mambirhi ni lava va tlhandlamaka, a anakanya nkarhi lowu a nga vutisisa tintlhari.

¹⁷Enkarhini wolowo ku endleka leswi nga vuriwa hi muprofeta Yeremiya, loko a te:

¹⁸“Huwa yi twakele eRhama, ya mikosi, ni nhlomulo lowukulu, a nga Rahele a rilelaka vana va yena kutani wa ala ku chaveleriwa, hikuva a va ha ri kona.”

¹⁹Kambe, kuteloko Heroda a file, ntsumi ya Hosi yi humelela eka Yosefa eEgipta hi norho, yi ku:

²⁰“Pfuka, u teka xihlangi ni mana wa xona, u tlhelela etikweni ra Israele, hikuva lava ngi va lava ku dlaya n'wana, va file.”

²¹Kuteloko Yosefa a pfukile, a teka n'wana ni mana wa yena, a tlhelela etikweni ra Israele.

²²Kambe loko a twa leswaku Arkelawusi u fuma Yudiya ematshan'weni ya Heroda tata wa yena, a chava ku ya kona; kuteloko a kombisiwile hi Xikwembu enorhweni, a hambukela etikweni ra Galeliya.

²³Kuteloko a fike kona, a aka emutini lowu vuriwaka Nazareta; leswaku ku endleka leswi nga vula hi vaprofeta, va ku: “U ta vuriwa Munazarene.”