Read tsonga Matewu 21 Bible Online

Matewu 21 - tsonga bible

Matewu 21

¹Kuteloko va tshinelela eYerusalema, va fika eBetefage, eNtshaveni ya Mitlhwari, Yesu a rhuma vadyondzisiwa vambirhi,

²a ku eka vona: “Yanani emutaneni lowu mi wu kongomeke; kutakuloko mi fikile, mi ta kuma mbhongolo ya ntswele yi kulekiwile, yi ri ni ximbhongolwana; mi ti tshunxa, mi ti tisa eka mina.

³Kutakuloko munhu a mi vutisa, mi ta ku eka yena: ‘Hosi ya ti lava’; kutani u ta hatlisa a mi nyiketa.”

⁴Swoleswo hinkwaswo swi endliwile leswaku ku endlakala leswi nga vuriwa hi muprofeta la nga te:

⁵“Byelani N'wana Siyoni, mi ku: Waswivo, Hosi ya wena hi yona leyi taka eka wena yi olovile, yi khandziyile mbhongolo, n'wana wa mbhongolo.”

⁶Kutani vadyondzisiwa va ya, va endla hilaha va lerisiweke hakona hi Yesu,

⁷va neha mbhongolo ni ximbhongolwana xa yona va andlala tinguvu ta vona ehenhla ka xona kutani Yesu a tshamisa ehenhla ka tona.

⁸Kutani vanhu lavo tala va andlala tinguvu ta vona endleleni, van'wanyana va tsema mahlampfu ya mirhi, va andlala endleleni.

⁹Kambe mitshungu leyi n'wi rhangeleke emahlweni, ni leyi n'wi landzelaka endzhaku, va bongosa, va ku: “Hosanna (hileswaku, wanga ponisa), eka N'wana Davhida! A ku khensiwe la taka hi vito ra Hosi! Hosanna ematilweni ya le henhla ka tilo.”

¹⁰Kuteloko a nghene eYerusalema, muti hinkwawo wu yimayima, wu ku: “Loyi, i mani xana?”

¹¹Kutani mitshungu yi ku: “I muprofeta la humaka eNazareta wa Galeliya.”

¹²Kutani Yesu a nghena etempeleni ya Xikwembu, a hlongolela ehandle hinkwavo lava xavisaka, ni lava xavaka etempeleni, a susumeta matafula ya lava bindzulaka hi mali, ni switshamo swa lava xavisaka matuva,

¹³a ku eka vona: “Ku tsariwile va ku: ‘Yindlu ya mina yi ta vuriwa yindlu ya ku khongela,’ kasi n'wina mi yi endle bako ra makhamba.”

¹⁴Kutani ku ta eka yena etempeleni vo fa mahlo, ni vo khwita, kutani a va hanyisa.

¹⁵Kambe vaprista lavakulu ni vatsari, loko va vona mahlori lawa a ma endlaka, na vona vana va huwelelaka etempeleni, va ku: “Hosana eka N'wana Davhida, va hlundzuka ngopfu,”

¹⁶va ku eka yena: “Xana wa swi twa leswi va swi vulaka xana?” Yesu a ku eka vona: “Ina, xana a mi si hlaya timhaka leti nge: ‘Ku dzuniwa ka wena, u ku humesile ka milomu ya vana, ni ya lava an'waka’?”

¹⁷Kutani a va sukela, a huma emutini ku ya Betaniya, a ya etlela kona.

¹⁸Ni mixo, loko a vuyela emutini a twa ndlala,

¹⁹kutani a vona murhi wa nkuwa wu ri kusuhi ni ndlela; a ya eka wona, kambe a nga kumangi nchumu eka wona loko ma nga ri matluka ntsena; a ku eka wona: “Ku nga tshuki ku huma mihandzu eka wena hilaha ku nga heriki!” Kutani murhi wa nkuwa wu oma hi nomu wolowo.

²⁰Vadyondzisiwa loko va swi vona, va hlamala, va ku: “Xana murhi lowa nkuwa wu omise ku yini hi nomulo-ke?”

²¹Yesu a hlamula a ku eka vona: “Ndzi vurisile ndzi ri eka n'wina: Loko mi ri ni ku pfumela, mi nga kanakani, a mi nga endli ntsena kukotisa leswi endliweke emurhini wa nkuwa, kambe ni loko mi nga ku eka ntshava leyi: ‘Suka u ya tihoxa lwandle,’ swi ta endleka;

²²kutani xilo xin'wana ni xin'wana lexi mi nga xi kombelaka hi ku khongela, loko mi pfumela, mi ta nyikiwa.”

²³Kuteloko a fike etempeleni, vaprista lavakulu ni vakulukumba va tiko va ta eka yena a ri karhi a dyondzisa, va ku eka yena: “Swilo leswo, u swi endla hi matimba wahi? Matimba walawo u nyikiwile hi mani xana?”

²⁴Yesu a va hlamula, a ku: “Ndzi ta mi vutisa mhaka, na mina; loko mi ndzi byela yona, na mina ndzi ta mi byela matimba walawo ndzi endlaka swilo leswi ha wona:

²⁵Xana ku khuvula ka Yohane a ku huma kwihi? Xana ku hume etilweni kumbe eka vanhu?” Kambe va anakanyisa swin'we va ku: “Loko hi ku: ‘Ku hume etilweni,’ u ta ku: ‘Loko swi ri tano, a mi pfumelanga ha yini?’

²⁶Loko hi ku: ‘Ku hume eka vanhu,’ hi chava mitshungu, hikuva hinkwavo va ku: ‘Yohane i muprofeta.’ ”

²⁷Kutani va hlamula Yesu, va ku: “A hi swi tivi!” Yena a ku eka vona: “Na mina a ndzi nga mi byeli matimba lawa ndzi endlaka swilo leswi ha wona.

²⁸“Kambe mi ri yini hi mhaka leyi: Munhu a a ri ni vana vambirhi; a ya eka lowo rhanga, a ku eka yena: ‘N'wananga, famba u ya tirha namuntlha ensin'wini ya mina ya vhinya.’

²⁹Yeloyi a hlamula, a ku: ‘Ndza ala,’ kambe ndzhaku a tisola, a ya kona.

³⁰Kutani a ya eka lowa vumbirhi, a n'wi byerisa sweswo. Yeloyi a n'wi hlamula, a ku: ‘Ndza ya, hosi,’ kambe a nga ha yanga.

³¹Xana eka vona vambirhi, hi wihi la nga endla ku rhandza ka tata wa yena?” Va ku eka yena: “Hi lowo rhanga.” Yesu a ku eka vona: “Kunene ndza mi byela, ndzi ri: Valuvisi ni vavasati va vuoswi va mi rhangela eku fumeni ka Xikwembu.

³²Hikuva Yohane u tile eka n'wina hi ndlela leyo lulama, a mi n'wi pfumelanga; kasi valuvisi ni vavasati va vuoswi va pfumerile eka yena; kambe n'wina, hambi mi vona sweswo a mi tisolanga mi va mi pfumela eka yena.

³³“Yingisani xifaniso xin'wana. Munhu a a ri kona, a ri n'wini wa yindlu, a byarile nsimu ya vhinya, a yi biyerile rihlampfu, a cerile xikhuvuto, a ake ni tshala; kutani loko a yi vekile emavokweni ya varimi, a ya endza.

³⁴Kuteloko nkarhi wa mihandzu wu ri ekusuhi, a rhuma malandza ya yena eka varimi ku ya amukela mihandzu ya yena.

³⁵Kutani varimi va khoma malandza ya yena, va ba un'wana, un'wana va n'wi dlaya, un'wana va n'wi khandla hi maribye.

³⁶A engeta a rhuma malandza man'wana, a tlula layo rhanga hi ku tala, kambe, na wona ma endliwa kukota layo rhanga.

³⁷A kondza a rhuma eka vona n'wana wa yena, a ku: ‘Va ta chava n'wana wa mina.’

³⁸Kambe varimi loko va vona n'wana wa yena, va byelana, va ku: ‘Mudyandzhaka hi loyi; tanani hi n'wi dlaya, hi ta teka ndzhaka ya yena.’

³⁹Kutani va n'wi khoma, va n'wi cukumeta ehandle ka nsimu ya vhinya, va n'wi dlaya.

⁴⁰Xana siku n'wini wa nsimu ya vhinya a fikaka, varimi valavo, u ta va endla yini xana?”

⁴¹Va hlamula, va ku eka yena: “U ta onha ni ku lovisa vaonhi valavo, kutani nsimu ya vhinya, u ta yi veka emavokweni ya varimi van'wana lava nga ta n'wi tlherisela mihandzu ya yona emikarhini ya yona.”

⁴²Yesu a ku eka vona: “Xana a mi si hlaya eMatsalweni mhaka leyi nge: ‘Ribye leri vaaki va ri soleke, hi rona leri nga endliwa ribye ro rhanga ra yinhla; leswo swi endliwe hi Hosi, i mhaka leyi hlamarisaka emahlweni ka hina!’

⁴³Hikwalaho ndzi nge eka n'wina: Ku fuma ka Xikwembu, mi ta tekeriwa, ku ta nyikiwa tiko rin'wana leri nga ta veka mihandzu ya kona.

⁴⁴Kutani la nga ta wela ehenhla ka ribye rero u ta handzuka; ri ta phyandlasa yeloyi ri n'wi weleke ehenhla.”

⁴⁵Vaprista lavakulu ni Vafarisi loko va twa swifaniso leswi swa yena, va tiva leswaku u hlambanyisele vona;

⁴⁶kutani va lava ku n'wi khoma, kambe va chava ntshungu, hikuva a va ku: “Yesu i muprofeta.”