Read tsonga Matewu 22 Bible Online

Matewu 22 - tsonga bible

Matewu 22

¹Kutani Yesu a tlhela a vulavula na vona hi xifaniso, a ku:

²“Ku fuma ka matilo ku fana ni hosi leyi endlelaka n'wana wa yona nkhuvo wa vukati.

³Kutani a rhuma malandza ya yena ku ya vitana lava nga rhambiwa enkhubyeni, kambe va ala ku ta.

⁴A engeta a rhuma malandza man'wana, a ku: ‘Byelani lava rhambiweke, mi ku: Maswivo, ndzi lunghisile swakudya swa mina, tihavi ta mina ni swifuwo swo nona swa mina swi tlhaviwile; swilo hinkwaswo swi lunghisiwile, tanani enkhubyeni.’

⁵Kambe valavo va kaneta, va famba un'wana ensin'wini ya yena, un'wana eku xaviseni ka yena;

⁶kutani van'wana va khoma malandza ya yena, va ma endla hi tihanyi, va ma dlaya.

⁷Kutani hosi, loko yi twa timhaka leti, yi kariha yi rhuma mavandla ya yona ku ya lovisa vadlayi valavo, yi hisa ni muti wa vona.

⁸Kutani a byela malandza ya yena, a ku: ‘Nkhuvo wu lunghisiwile kambe lava ngi va vitaniwile a wu nga va fanekelanga.

⁹Sweswi, yanani emahandzeni ya tindlela, mi ya vitana enkhubyeni, hinkwavo lava mi nga ta va kuma.’

¹⁰Kutani malandza wolawo ma huma ma ya etindleleni, ma hlengeleta hinkwavo lava ma va kumaka, lavo biha ni lavo lulama, kutani yindlu ya nkhuvo yi tala hi vanhu lava tshameke eswakudyeni.

¹¹Kuteloko hosi yi nghena ku ta languta lava tshameke eswakudyeni, yi vona munhu la nga ambalangiki nguvu ya nkhuvo,

¹²yi ku eka yena: ‘Nakulorhi, u nghenise ku yini la, u nga ri na nguvu ya nkhuvo?’ Yeloyi a miyela.

¹³Kutani hosi yi ku eka malandza: ‘N'wi boheni milenge ni mavoko, mi n'wi cukumeta emunyameni wa le handle, laha ku nga ni mikosi ni ku getsela ka meno.’

¹⁴Hikuva lava vitaniweke va tele, kambe lava nga hlawuriwa a hi vangani.”

¹⁵Kutani Vafarisi va suka, va ya kanela makungu swin'we hilaha va nga ta n'wi phasa hakona hi marito ya yena.

¹⁶Kutani va rhuma eka yena vadyondzisiwa va vona ni va ka Heroda, va ya n'wi byela, va ku: “Mufundhisi, ha swi tiva leswaku wa vurisa, ni leswaku u dyondzisa ndlela ya Xikwembu hi ntiyiso, u nga chavisiwi hi munhu, hikuva a wu languti nghohe ya munhu.

¹⁷Wa nga hi byela, xana swa hi lulamela ku humesela Khezari ndzuvo, kumbe a hi swona-ke?”

¹⁸Kambe Yesu, hi ku tiva mona wa vona, a ku: “Mi ndzi ringela yini, n'wina vakanganyisi?

¹⁹Ndzi kombeni mali ya ndzuvo. Kutani va n'wi nyika denari.”

²⁰A ku eka vona: “Xifaniso lexi i xa mani, ni matsalwa, i ya mani-ke?”

²¹Va ku eka yena: “I swa Khezari.” Kutani a ku eka vona: “Tlheriselani Khezari leswi nga swa Khezari, ni Xikwembu leswi nga swa Xikwembu.”

²²Kuteloko va twe mhaka yoleyo, va hlamala, kutani va n'wi tshika, va tifambela.

²³Hi siku rero, Vasaduki lava kanetaka ku pfuka ka vafi, va ta eka Yesu, va n'wi vutisa, va ku:

²⁴“Mufundhisi, Muxe u te: ‘Munhu loko a file a nga ri na vana, makwavo u ta teka nsati wa yena, a velekela makwavo vana.’

²⁵Kambe a ku ri kona exikarhi ka hina vamakwavo va ntlhanu na vambirhi; kutani lowa hosi a a tekile nsati, kutani a fa, kutani hikuva a nga si va na n'wana, a siyele ndzisana nsati wa yena.

²⁶Swi endlisa sweswo ni ka lowa vumbirhi, ni ka lowa vunharhu, ku ya fikela eka lowa ntlhanu na vambirhi.

²⁷Endzhaku ka vona hinkwavo, lo wansati, na yena, a fa.

²⁸Xana siku ra ku pfuka ka vafi, nsati loyi, u ta va wa wihi eka lava ntlhanu na vambirhi, hi leswi hinkwavo va n'wi tekeke xana?”

²⁹Kambe Yesu a hlamula, a ku eka vona: “Mi lahlekile, hikuva a mi tivi Matsalwa ni matimba ya Xikwembu.

³⁰Hikuva eku pfukeni ka vafi a va nga ha teki, ni loko ku ri ku tekiwa, kambe va ta fana ni tintsumi ta Xikwembu leti nga etilweni.

³¹Kutani loko ku ri ku pfuka ka vafi, xana a mi hlayanga leswi mi swi byeriweke hi Xikwembu, loko xi te:

³²‘Hi mina Xikwembu xa Abrahama, ni Xikwembu xa Isaka, ni Xikwembu xa Yakobo’? Xikwembu a hi Xikwembu xa lava feke, kambe i xa lava hanyaka.”

³³Kutani mitshungu loko yi yingisa sweswo, yi hlamala hi ku dyondzisa ka yena.

³⁴Kambe Vafarisi loko va yingisa leswaku u miyete Vasaduki, va hlengeletana kun'we.

³⁵Kutani un'wana wa vona loyi a a ri mufundhisi wa nawu, a vutisa Yesu hi ku n'wi ringa, a ku:

³⁶“Mufundhisi, ku lerisa lokukulu ka nawu hi kwihi xana?”

³⁷Yesu a ku eka yena: “Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni ku anakanya ka wena hinkwako.

³⁸Hi wona nawu lowo rhanga lowukulu;

³⁹kutani lowa vumbirhi lowu fanaka na wona, hi lowu nge: ‘Rhandza warikwenu kukota loko u tirhandza.’

⁴⁰Milawu leyimbirhi leyi, i ku sungula ka milawu hinkwayo ni ka vaprofeta.”

⁴¹Vafarisi loko va hlengeletene, Yesu a va vutisa,

⁴²a ku: “Mi ri yini ehenhla ka Kriste xana? I n'wana mani xana?” Va ku eka yena: “N'wana Davhida.”

⁴³Yena a ku eka vona: “Loko swi ri tano, xana Davhida u n'wi vurise ku yini Hosi hi Moya loko a te:

⁴⁴‘Hosi yi te eka Hosi yanga: “Tshamisa evokweni ra xinene ra mina, ndzi kondza ndzi veka lava nga valala eka wena evukandziyweni bya milenge ya wena.” ’

⁴⁵Xana Davhida loko a n'wi vula hosi ya yena i n'wana wa yena hi mukhuva wihi xana?”

⁴⁶Kutani a ku vanga na munhu la tivaka ku n'wi hlamula nchumu, ku suka nkarhi wolowo, a ka ha tanga ni un'we la tiyaka mbilu ku n'wi vutisa.