Read tsonga Matewu 24 Bible Online

Matewu 24 - tsonga bible

Matewu 24

¹Kuteloko Yesu a humile etempeleni, a famba, vadyondzisiwa va n'wi tshinelela ku n'wi komba maakela ya tempele.

²Kambe Yesu a ku: “A mi swi voni leswi hinkwaswo xana? Kunene ndzi ri eka n'wina: Ku nga ka ku nga tshikiwi ribye ehenhla ka ribye rin'wana leri nga taka ri nga mbundzuxiwi.”

³Kuteloko a tshamile eNtshaveni ya Mitlhwari, vadyondzisiwa va yena va ta eka yena va ri swavo, va ku eka yena: “Hi byele nkarhi lowu swi nga ta humelela ha wona, ni lexi nga ta va xikombiso xa ku ta eka wena, ni xa ku hela ka misava.”

⁴Yesu a va hlamula, a ku: “Tilanguteleni, mi nga ti tshuka mi xisiwa hi munhu.

⁵Hikuva lavo tala va ta ta hi vito ra mina, va ku: ‘Hi mina Kriste’; kutani va ta hambukisa lavo tala.

⁶Mi ta twa tinyimpi, ni mpfumawulo wa tinyimpi, kambe tivoneleni leswaku mi nga ti tshukisiwa; sweswo hinkwaswo swi fanele ku humelela, kambe ku ta va ku nga si va wona makumu.

⁷Hikuva tiko rin'wana ri ta pfukela tiko rin'wana matimba, ni ku fuma kun'wana ku ta lwa ni ku fuma kun'wana; tindlala ti ta va kona ni ku tsekatseka ka misava hi matlhelo layo tala.

⁸Kambe sweswo hinkwaswo ku ta va ku sungula ntsena ka khombo.

⁹Enkarhini wolowo va ta mi nyiketa ku xanisiwa, ni ku dlawa; mi ta vengiwa hi matiko hinkwawo hikwalaho ka vito ra mina.

¹⁰Hikwalaho lavo tala va ta khunguvanyeka, kutani va ta hehlana ni ku vengana.

¹¹Ku ta humelela vaprofeta lavo tala va mavunwa va ta hambukisa lavo tala.

¹²Kutani rirhandzu ra lavo tala ri ta tsana hikwalaho ka ku andza ka ku homboloka.

¹³Kambe la nga ta tiyisela ku fikela emakumu, hi yena la nga ta hlayiseka.

¹⁴Kutani Evhangeli leyi ya ku fuma yi ta vuriwa emisaveni hinkwayo leswaku byi va vumbhoni eka matiko hinkwawo; hi kona ku nga ta humelela makumu.

¹⁵“Kutakuloko mi vona manyala ya ku herisiwa, lama nga vuriwa hi muprofeta Daniele, ma yimile exivandleni lexi hlawuriweke (la hlayaka u fanele ku anakanya);

¹⁶enkarhini wolowo, lava nga eYudiya a va balekele etintshaveni;

¹⁷la nga ehenhla ka yindlu, a nga ka a nga xiki a ya teka swa le ndlwini ya yena;

¹⁸ni la nga emasin'wini, a nga ka a nga tlheli ekaya ku ya teka tinguvu ta yena.

¹⁹Va ta va ni khombo vavasati lava tikeke ni lava an'wisaka enkarhini wolowo.

²⁰Khongelani leswaku ku tsutsuma ka n'wina ku nga humeleri nivuxika, hambi ku ri hi Savata;

²¹hikuva enkarhini wolowo, nhlomulo wu ta va lowukulu; ka ha ri mpfhuka ku tumbuluke misava ku fikela sweswi, khombo lero tano a ri si va kona, kutani ri nga ka ri nga tlheli ri va kona, ni siku ni rin'we.

²²Loko ngi masiku lawa a ma nga hungutiwanga, a ku nga ti hanya munhu ni un'we, kambe hikwalaho ka vahlawuriwa, mikarhi yoleyo yi ta hungutiwa.

²³“Enkarhini wolowo, loko munhu a ku eka n'wina: ‘Vonani, Kriste u la,’ kumbe ‘Kriste u lahaya,’ mi nga tshuki mi pfumela.

²⁴Hikuva ku ta humelela lava tivulaka Kriste hi vunwa, kambe vaprofeta va mavunwa va ta endla masingita lamakulu, ni mahlori lama nga ta hambukisa na vona vahlawuriwa, loko swi nga koteka.

²⁵Maswivo, ndzi rhangile ndzi mi byela timhaka leti;

²⁶hikwalaho loko va ku eka n'wina: ‘Vonani, u le mananga!’ Mi nga yi kona; kumbe loko va ku: ‘Vonani u le tindlwini!’ Mi nga tshuki mi pfumela.

²⁷Hikuva kukotisa loko rihati ri huma evuxeni, ri hatima ku ya fika evupeladyambu, ku ta ka N'wana wa Munhu ku ta endlisa sweswo.

²⁸Hikuva laha ntsumbu wu nga kona, hilaha makoti ma nga ta hlengeletana kona.

²⁹“Kutakuloko mahlomulo ya mikarhi yoleyo ma herile, dyambu ri ta endla ntima, ni n'weti wu nga ha humesi ku vonakala ka wona, ni tinyeleti ti ta wa hi le henhla, kutani matimba ya le tilweni ma ta tsekatseka.

³⁰Enkarhini wolowo, xikombiso xa le tilweni, hi kona matiko hinkwawo ya misava ma nga ta tiba xifuva, va ta vona N'wana wa Munhu a ta hi mapapa ya le tilweni, hi matimba lamakulu, ni ku vonakala lokukulu.

³¹U ta rhuma tintsumi ta yena leti yimbaka tinanga ta mpfumawulo lowukulu, ti ta hlengeleta vahlawuriwa va yena etimhehweni leta mune, ku sungula emakun'wini ya matilo, ku yisa emakun'wini man'wana.

³²“Dyondzani hi murhi wa nkuwa xifaniso lexi; marhavi ya wona, loko ma sungula ku olova, ma humesa matluka, ma swi tiva leswaku ximumu xi kusuhi.

³³Na n'wina, kutakuloko mi vona hinkwaswo leswo, tivisisani leswaku N'wana wa Munhu u kusuhi, u le nyangweni.

³⁴Kunene, ndzi ri eka n'wina, rixaka leri, ri nga ka ri nga hundzi, leswo hinkwaswo swi nga si humelela.

³⁵Tilo ni misava swi ta hundza, kambe marito ya mina ma nga ka ma nga hundzi.

³⁶“Loko ri ri siku lero ni nkarhi, a ku na loyi a wu tivaka; swi tsandza ni tintsumi ta le matilweni, a ti wu tivi, hambi a ri N'wana; kambe ku tiva Tatana a le swakwe.

³⁷Kambe kukotisa leswi nga humelela emikarhini va Nowa, swi ta va tano ni le ku teni ka N'wana wa Munhu;

³⁸hikuva kukotisa emikarhini ya ndhambi ya mati, loko vanhu a va ri karhi va dya, va nwa, va teka, va hlomisana, ku ko ku fika siku leri Nowa a ngheneke engalaveni ha rona,

³⁹a va anakanyanga nchumu ku ko ku fika ndhambi, kutani va dyiwa hinkwavo hi yona; swi ta endlisa sweswo eku teni ka N'wana wa Munhu.

⁴⁰“Enkarhini wolowo, eka vanhu vambirhi lava nga ta va emasin'wini, un'wana u ta tekiwa, un'wana a siyiwa;

⁴¹eka vavasati vambirhi lava nga ta sila eribyeni, un'wana u ta tekiwa, un'wana a siyiwa.

⁴²Hitekani-ke, hikuva a mi tivi nkarhi lowu Hosi ya n'wina yi nga ta ta ha wona.

⁴³“Kambe tivani leswi: Loko ngi n'wini wa yindlu a tiva nkarhi lowu khamba ri nga ta ta ha wona, a ta langutela, a nga pfumeri leswaku yindlu ya yena yi boxiwa.

⁴⁴Na n'wina, tilunghiseni hakona, hikuva N'wana wa Munhu u ta ta hi nkarhi lowu mi nga wu anakanyiki.

⁴⁵“Xana i mani nandza lonene, wo tlhariha, loyi Hosi ya yena yi n'wi vekeke mulanguteri wa malandza ya yona ku va nyika swakudya enkarhini wa swona?

⁴⁶Ku katekile nandza yeloyi Hosi ya yena, siku yi fikaka, yi nga ta n'wi kuma a endlise sweswo.

⁴⁷Kunene ndzi ri eka n'wina, u ta n'wi veka muhlayisi wa hinkwaswo leswi a nga na swona.

⁴⁸Kutakuloko nandza yeloyi a hombolokile, kutani a tianakanya embilwini ya yena, a ku: ‘Hosi yanga yi hlwela ku fika;’

⁴⁹kutani a sungula ku ba malandzakulobye, a dya, a nwa ni lava pyopyaka,

⁵⁰hosi ya nandza yeloyi yi ta fika enkarhini lowu a nga wu langutelangiki, ni le nkarhini lowu a nga wu tiviki;

⁵¹kutani yi ta n'wi pulukanyisa, yi n'wi nyika ku averiwa ku ri kun'we ni vamanyunyu; hilaha swirilo swi nga ta va kona ni ku getsela ka meno.